ساتباەۆ ۋنيۆەرسيتەتىنىڭ جامبىل وبلىسى مايلى قاراتاۋ جوتاسىنىڭ ماڭىندا ورنالاسقان پوليگونى گەولوگتاردىڭ تاجىريبەلىك ورنىنا اينالدى, مۇندا 5 كۇن بويى ەلىمىزدىڭ توعىز جوعارى وقۋ ورنى مەن ءبىر كوللەدج ستۋدەنتتەرى ءوز داعدىلارى مەن جەر تۋرالى عىلىم بويىنشا بىلىمدەرىن سىناستى, دەپ حابارلايدى Egemen.kz ۋنيۆەرسيتەتتىڭ ءباسپاسوز قىزمەتىنە سىلتەمە جاساپ.
ۋنيۆەرسيادا قورىتىندىسى بويىنشا سەمەي گەولوگيالىق بارلاۋ كوللەدجىنىڭ كومانداسى 1-ورىندى, ساتباەۆ ۋنيۆەرسيتەتىنىڭ كومانداسى 2-ورىندى يەلەنسە, ۇزدىك ۇشتىكتى نازارباەۆ ۋنيۆەرسيتەتىنىڭ ستۋدەنتتەرى تۇيىندەدى.
ۋنيۆەرسيادا باعدارلاماسى عالىمدار مەن پراكتيكتەردىڭ جالپى جانە قۇرىلىمدىق گەولوگيا, كريستاللوگرافيا جانە مينەرالوگيا, پەتروگرافيا, پالەونتولوگيا, گيدروگەولوگيا جانە گەوفيزيكا بويىنشا لەكتسيالارى مەن كەڭەستەرىن قامتىدى.
قاتىسۋشىلار ءۇشىن شاتىرلى قوسىن قۇرىلدى. ولار وسىندا تۇنەپ, كۇندىز ناعىز گەولوگتارعا لايىق, جوسپارلانعان مارشرۋتتار بويىنشا جورىققا شىعىپ, ءبىر-بىرىمەن جارىستى, مينەرالدى تاستار مەن پايدالى قازبالاردى قاعىپ ءوتتى. ال كەشكىسىن ولار كەڭسە جۇمىستارىمەن اينالىسىپ, كارتالار جاسادى جانە كۇنىمەن ىستەگەن جۇمىستارى تۋرالى گيتارانىڭ اسەم اۋەنىمەن وتتىڭ اينالاسىندا تالقىلادى.
بولاشاق گەولوگتار كاسىبي شەبەرلىكپەن قاتار سپورتتىق سايىستارعا قاتىسىپ, شىعارماشىلىق جارىستار دا وتكىزدى.
ۇيىمداستىرۋشىلار سونىمەن قاتار ستۋدەنتتەرگە ارنالعان گەولوگيالىق كۆەست ويلاستىردى, بۇل جاس ماماندار مەن گەولوگيا عىلىمىنىڭ كورنەكتى وكىلدەرىنە ءبىر-بىرىمەن قارىم-قاتىناس جاساۋعا جانە ءوزارا تاجىريبە الماسۋعا قوسىمشا مۇمكىندىك بولدى.
ساتباەۆ ۋنيۆەرسيتەتىنىڭ قاراتاۋ گەولوگيالىق پوليگونى تاراز قالاسىنان 60 شاقىرىم جەردە ورنالاسقان. عالامشار بەتىندەگى بۇل نۇكتە – جەر تاريحىنىڭ ميللياردتاعان جىلدارىن قامتيتىن بىرنەشە گەولوگيالىق داۋىرلەرگە جاتادى. بۇل تابيعي وقۋ قۇرالى عالامشار تاريحىنا قول جەتكىزۋگە, گەولوگيالىق پروتسەستەردىڭ دالەلدەرىن ءوز كوزىڭىزبەن كورۋگە جانە قازاقتىڭ ۇلى عۇلاما عالىمى قانىش يمانتاي ۇلى ساتباەۆتىڭ ىزىمەن زەردەلەي وتىرىپ, ولاردى قولداعى بالعامەن اشىق گەولوگيالىق كارتا ارقىلى تۇيسىنۋگە مۇمكىندىك بەرەدى.
ء«بىزدىڭ جەر قويناۋىمىزدىڭ كەن رەسۋرستارى وراسان زور ەكەنىنە جانە مەندەلەەۆ تابليتساسىنداعى بارلىق مەتالداردىڭ بار ەكەنىنە قاراماستان, كوپتەگەن كەن قورلارىمىز سوناۋ كەڭەستىك كەزەڭنەن بەرى بارلانىپ كەلەدى, ولاردىڭ كوبى سارقىلۋعا جاقىن. قازىرگى جاعدايدا گەولوگيا سالاسىنا جاڭا كوزقاراس, جاڭا ىزدەنىس قاجەت, بۇل كومىرسۋتەكتەر سالاسىنداعى عانا ەمەس, سونىمەن قاتار تسيفرلىق يندۋسترياعا جانە باسقا دا سالالارعا قاجەتتى سيرەك كەزدەسەتىن مەتالدار سالاسىندا جاڭا كەن ورىندارىن اشۋ ارقىلى ەكونوميكانى دامىتۋعا ەلەۋلى مۇمكىندىكتەر تۋعىزادى», دەيدى ساتباەۆ ۋنيۆەرسيتەتى ق.تۇرىسوۆ اتىنداعى گەولوگيا جانە مۇناي-گاز ءىسى ينستيتۋتىنىڭ ديرەكتورى اسقار سىزدىقوۆ.
ۋنيۆەرسيادانى وتكىزۋگە باستاماشى بولعان – قازاقستان رەسپۋبليكاسىنىڭ گەولوگيا كوميتەتى, ال نەگىزگى ۇيىمداستىرۋشىسى – ساتباەۆ ۋنيۆەرسيتەتىنىڭ ق.تۇرىسوۆ اتىنداعى گەولوگيا جانە مۇناي-گاز ءىسى ينستيتۋتى. ۋنيۆەرسيتەت بارلىق دايىندىقتى ءوز قولىنا الدى, باي جانە جان-جاقتى كونكۋرستىق باعدارلاما ازىرلەدى, جەتەكشى مامانداردى تارتىپ, قاتىسۋشىلار ءۇشىن بارلىق قاجەتتى جاعدايلاردى قامتاماسىز ەتتى. اتالمىش ءىس-شاراعا «قازاقمىس بارلاۋ», «ERG Exploration» جانە «KAZ Minerals» سەكىلدى ءىرى كومپانيالار قولداۋ كورسەتىپ, ۋنيۆەرسيادانى جوعارى دەڭگەيدە وتكىزۋگە مۇمكىندىك بەردى, ال ەلىمىزدىڭ ءار وڭىرىندەگى ۋنيۆەرسيتەتتەر مەن كوللەدجدەردەن كەلگەن بەلسەندى وكىلدەرى ءىس-شاراعا ۇلكەن ءمان بەردى.