اتامەكەنىن اڭساپ كەلگەن قانداستار تاڭدايتىن وبلىستىڭ قاتارىندا اتىراۋ دا بار. بيىل 5 ايدا مۇنايلى وڭىرگە ورالعان ەتنوستىق قازاقتىڭ دەنى بۇرىن كورشىلەس ەلدەردە تۇرعان.
اتىراۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءباسپاسوز قىزمەتى ءمالىم ەتكەندەي, 1 ماۋسىمعا دەيىن 6 ەلدەن 89 وتباسى اتامەكەنىنە ورالىپ وتىر. بۇل وتباسىلاردىڭ قۇرامىنداعى 108 ەتنوستىق قازاقتىڭ بارىنە «قانداس» مارتەبەسى بەرىلگەن.
قانداستاردىڭ دەنى – 86 مۇشەسى بار 71 وتباسى وزبەكستان رەسپۋبليكاسىنان قونىس اۋدارعان. «ال كورشىلەس رەسەي فەدەراتسياسىنان 9 وتباسى (10 ادام), قىتاي حالىق رەسپۋبليكاسىنان 6 وتباسى (9 ادام), ۋكراينادان, تاجىكستان مەن تۇرىكمەنستان رەسپۋبليكاسىنان 3 وتباسى (3 ادام) ورالدى. قانداستىڭ ءبارى ەلىمىزدە تۇراقتى تۇرۋعا نيەت ءبىلدىردى», دەپ حابارلادى باسقارمانىڭ ءباسپاسوز قىزمەتى.
قانداستاردىڭ اراسىنان 78 وتباسى اتىراۋ قالاسىندا تۇراقتاپ قالۋدى ءجون كورىپتى. بۇل وتباسىلاردا 97 ادام بار. ال 4 وتباسى (4 ادام) جىلىوي اۋدانىن, 1 وتباسى (1 ادام) ماحامبەت اۋدانىن تاڭداپتى. سونداي-اق ماقاتقا 2 وتباسى (2 ادام), قۇرمانعازىعا 2 وتباسى (2 ادام) جانە يندەر اۋدانىنا 2 وتباسى (2 ادام) كوشىپ بارعان.
«قازىر اتىراۋ وبلىسىندا قانداستاردى ۋاقىتشا ورنالاستىرۋ ورتالىعى جۇمىس ىستەيدى. بىراق بۇل ورتالىقتا ۋاقىتشا تۇراتىن ەتنوستىق قازاقتار تىركەلگەن جوق. ال تۇرعىن ءۇي كەزەگىندە 43 قانداس تىركەۋدە تۇر. مانساپ ورتالىقتارىندا 14 قانداس جۇمىسسىز رەتىندە تىركەۋگە الىندى. الەۋمەتتىك جۇمىس ورنىنا 1, قوعامدىق جۇمىسقا 1 ادام تارتىلدى», دەپ مالىمدەدى باسقارمانىڭ ءباسپاسوز قىزمەتىنەن.
اتىراۋ وبلىسى