جاقىندا «قازاقستان تەمىر جولى» ۇك» اق-تا 2014 جىلدىڭ جۇمىس قورىتىندىسى مەن 2015 جىلعا ارنالعان باسىمدىقتار بويىنشا كەڭەس وتكىزىلدى.
كەڭەس بارىسىندا قتج پرەزيدەنتى اسقار مامين كومپانيانىڭ وتكەن جىلعى جۇمىس قورىتىندىسىن جاساپ, 2015 جىلعا ارنالعان باسىمدىقتارى تۋرالى باياندادى.
«كومپانيا جالپى جۇك تاسىمالىنىڭ تومەندەگەنىنە قاراماستان 2014 جىلدى 166,5 ملرد. تەڭگە تازا كىرىسپەن قورىتىندىلادى. ول جوسپارلى كورسەتكىشتىڭ 56% پايىزعا ارتقاندىعىن كورسەتەدى. بۇل ءتۇسىم قوسىمشا جۇكتەردى تارتۋ, كوممەرتسيالىق ترانزيتتىك جۇكتەردىڭ كوبەيۋى, سونىمەن قاتار شىعىنداردى 61 ملرد. تەڭگەگە قىسقارتۋ ارقىلى ورىندالدى. جالپى جۇك تاسىمالىنىڭ تومەندەۋى قازاقستاندىق ەكسپورتتىق تاۋارلارعا حالىقارالىق نارىقتان سۇرانىستىڭ ازايۋى, ايماقتاعى ساۋدا كولەمىنىڭ تومەندەۋىنەن ورىن الدى», دەپ اتاپ ءوتتى ا.مامين.
«قازىرگى تاڭدا, كومپانيا كىرىسىنىڭ 25% ترانزيتتىك تاسىمالدان تۇسكەن. ءبىز ونى تاياۋ بولاشاقتا 50%-عا دەيىن كوتەرۋىمىز كەرەك», دەپ تولىقتىردى وسى ورايدا كومپانيا باسشىسى ءوز ءسوزىن.
«2014 جىل كومپانيانىڭ سوڭعى جىلدارى جۇرگىزىپ جاتقان ستراتەگيالىق دامۋ باعدارلاماسىنىڭ تيىمدىلىگىن ءارى دۇرىستىعىن ۋاقىت كورسەتتى. كومپانيا ۇزاق مەرزىمدى دامۋ كەزەڭىندە ىشكى جانە حالىقارالىق نارىقتا مۋلتيمودالدىق جانە ترانزيتتىك تاسىمالداردىڭ ۇلەسىن ارتتىرادى. وعان جوعارى ساپالى باسەكەلەستىككە ساي كولىكتىك-لوگيستيكالىق قىزمەت ءونىمىن, ءداستۇرلى تاجىريبەلەردى جەتىلدىرە وتىرىپ سالاداعى الەمدىك جەتەكشى كومپانيالاردىڭ دەڭگەيىنە دەيىن كوتەرۋىمىز قاجەت», دەدى ول.
كومپانيا بىلتىر اسا ءىرى جوبالاردى جۇزەگە اسىردى. ونىڭ ىشىندە جالپى ۇزىندىعى 1200 شاقىرىمدىق جەزقازعان – بەينەۋ جانە ارقالىق –شۇباركول, سونداي-اق, پايدالانۋعا بەرىلگەن ترانسقۇرلىقتىق «وزەن – بەرەكەت – گورگان» جول تەلىمىنىڭ قازاقستاندىق بولىگىنىڭ قۇرىلىسى 2013 جىلى اياقتالعان بولاتىن. اقتوبەدەگى رەلس-ارقالىق زاۋىتى رەسمي تۇردە اشىلدى. «قورعاس-شىعىس قاقپاسى» اەا قۇرعاق پورتىنىڭ 1-ءشى كەزەگى پايدالانۋعا بەرىلىپ, ليانيۋنگان تەڭىز پورتىنداعى لوگيستيكالىق تەرمينالدىڭ قۇرىلىسى اياقتالدى. بورجاقتى – ەرساي تەمىرجول جەلىسىنىڭ قۇرىلىسى باستالىپ, استانا مەن شىمكەنت قالالارىندا كولىكتىك-لوگيستيكالىق ورتالىقتاردىڭ قۇرىلىسى جۇرگىزىلۋدە. ستراتەگيانىڭ كەزەڭ-كەزەڭىنە وراي, ترانسفورماتسيالىق باسقارۋ جۇيەسىنە كوشۋ, تاپسىرىس بەرۋشىلەردىڭ ىڭعايىنا قاراي بەيىمدەلۋ ۇدەرىستەرىنە سايكەس قىزمەت كورسەتۋ تيىمدىلىگى مەن ساپاسىن كوتەرۋ, كورپوراتيۆتىك مادەنيەتتى جاساقتاۋ جالعاسۋدا.
كەڭەستى قورىتىندىلاي كەلىپ, اسقار مامين ەلباسى نۇرسۇلتان نازارباەۆتىڭ «نۇرلى جول – بولاشاققا باستار جول» اتتى قازاقستان حالقىنا جولداۋىنداعى تاپسىرمالاردى تياناقتى ورىنداۋعا توقتالدى.
«الداعى بەس جىلدا مەملەكەتتىك داعدارىسقا قارسى جوسپاردى جۇزەگە اسىرۋدا كولىكتىك ينفراقۇرىلىمدى دامىتۋعا باسا نازار اۋدارىلعان. ءبىز كومپانيانى دامىتۋدىڭ بارلىق ستراتەگيالىق باعىتتارىندا جۇمىستارىمىزدى بەلسەندىلىكپەن اتقارىپ, كولىكتىك ينفراقۇرىلىمدى جەدەل دامىتىپ, كولىكتىك-لوگيستيكالىق باسەكەلەستىككە ساي قىزمەتتى جاساقتاپ, ەلىمىزدىڭ ترانزيتتىك الەۋەتىن جۇزەگە اسىرۋىمىز قاجەت», دەپ كومپانيا باسشىسى باسىم باعىتتارعا توقتالدى.
«ەگەمەن-اقپارات».