جاعىمسىز ادەتكە قارسى كۇرەس

دسم قوعامدىق دەنساۋلىق ساقتاۋ ۇلتتىق ورتالىعى باس­قار­ما توراعاسىنىڭ ورىنباسارى سالتانات نازاروۆا قوعامدىق دەنساۋلىق ساقتاۋ ءىس-شارالارىن قولداۋ مەن نىعايتۋ ءۇشىن جۇرگىزىلىپ جاتقان جۇمىستاردىڭ ماڭىزى تۋرالى ايتىپ بەردى.

سالاماتتى ءومىر سالتىن ۇستا­ناتىن حالىقتىڭ ۇلەسىن ارتتىرۋ ءۇشىن دەنساۋلىق ساقتاۋ سالاسىن دامىتۋدىڭ 2026 جىلعا دەيىنگى تۇجىرىمداماسى شەڭبەرىندە جامان ادەت فاكتورلارى, ونىڭ ىشىندە تەمەكى شەگۋ پروفيلاكتيكاسىن ارتتىرۋ جونىندەگى شارالار جوسپارلانعان.

«حالىق دەنساۋلىعى جانە دەن­ساۋلىق ساقتاۋ جۇيەسى تۋرالى» كودەكسكە ەنگىزىلگەن ۆەيپتەر­گە تىيىم سالۋ تۋرالى تالاپ حا­لىق­تىڭ دەنساۋلىعىن ساقتاۋعا جانە قوعامدىق ءال-اۋقاتتى جاق­سارتۋعا, اتاپ ايتقاندا, جاس­تاردى قورعاۋعا باعىتتالعان. ماسەلەن, قوعامدا 100% ءتۇتىنسىز ورتانى قالىپتاستىرۋ, جارنامانى باقىلاۋ, قوعامدىق ورىنداردا تەمەكى شەگۋگە تىيىم سالۋ تۇرىندە تەمەكى ونىمدەرىن تۇتىنۋدى ازايتۋ جونىندەگى شارالار كەشەنىن ىسكە اسىرۋ كوزدەلگەن.

دەگەنمەن ماماننىڭ ايتۋىنشا, تەمەكى شەگۋگە قارسى كۇرەستىڭ ەڭ تانىمال ءادىسى – سالىق شارالارى. ەلىمىزدە تەمەكى ونىمدەرىنە اكتسيز 1995 جىلى ەنگىزىلدى. كەيىنگى 10 جىلدا اكتسيزدەر مولشەرلەمەسى ءوسىپ, سالىق ساياساتى قاتاڭداتىلدى. اتاپ ايتقاندا, سۇزگىسى بار تەمەكىگە اكتسيز مولشەرلەمەلەرى شامامەن 13 ەسە ءوستى, ال سۇزگىسى جوق تەمەكىنىڭ مولشەرلەمەسى 1000 داناسىنا شاققاندا 21 ەسە كوبەيدى.

سالتانات نازاروۆا قوعام­دىق دەنساۋلىق ساقتاۋ ۇلتتىق ورتالىعى الەۋمەتتىك جەلى­لەردەگى, باق-تاعى اقپارات­تىق جۇمىستاردى, وقۋ ورىن­دا­رىنداعى ءبىلىم بەرۋ ءىس-شارا­لا­رىن, ۆەيپ, تەمەكى جانە باسقا دا تەمەكى ونىمدەرىن تۇتى­نۋ­دىڭ زيانى تۋرالى تانىمدارىن ارتتىرۋ ماقساتىندا وتكى­زىلگەن دوڭگەلەك ۇستەلدەردى قامتيتىن اقپاراتتىق-ءتۇسىندىرۋ جۇمىستارىن بەلسەندى جۇرگىزىپ جاتقانىن اتاپ ءوتتى. جامان ادەتتەرگە ءۇيىر جاستار مەن جاس­وسپىرىمدەرگە, اسىرەسە وسال توپ­تارعا كوپ كوڭىل بولىنەدى. ەلى­مىزدە تەمەكى شەگۋگە توسقاۋىل قويۋ ماقساتىندا 88 كابينەت جۇمىس ىستەيدى. ولار ادامدارعا تاۋەلدىلىكتى جەڭۋگە كومەكتەسۋگە دايىن.