كىتاپ – عالامنىڭ عاجايىبى. مۇنى ماكسيم گوركي ايتقان. وسى عاجاپ دۇنيەنىڭ الەمدە سان ءتۇرى بار. جۇقاسى, قالىڭى. ءتىپتى ىشىندە ەشتەڭەسى جوق كىتاپ تا جۇرتشىلىقتىڭ كوڭىلىنەن شىعىپتى.
ءبىر سۇحباتىندا بەرنارد شوۋعا ء«سىز وزىڭىزبەن بىرگە ادام تۇرمايتىن ارالعا قانداي 5 كىتاپ اكەتەر ەدىڭىز؟» دەگەن سۇراق قويىلىپتى. سوندا ول «ىشىندە» ەشتەڭە جازىلماعان 5 كىتاپ الار ەدىم دەپ جاۋاپ بەرگەن. بۇل ويدى 1974 جىلى امەريكالىق «Harmony Books» باسپاسى ءىلىپ الىپ, 192 بوس بەتتەن تۇراتىن «ەشتەڭەسى جوق كىتاپتى» شىعاردى. كىتاپ اتاۋىن العان شىعارىلىم حالىقتىڭ ىقىلاسىنا بولەنىپ, قايتا-قايتا باسىلعان.
مەكتەپكە اپارار جول
كەزىندە ءۇيدىڭ ۇلكەندەرى مەكتەپكە قالاي بارعاندارىن ايتقاندا ەرتەگىدەي كورۋشى ەدىك. ونداي قىم-قيعاش جولدار قازىر دە بار. ال كولۋمبيا بالالارى مەكتەپكە جولمەن ەمەس, بولات كابەلدەر ارقىلى جەتەدى ەكەن.
كولۋمبيانىڭ كەيبىر تاۋلى ايماقتارىندا تۇراتىن بالالاردىڭ مەكتەپكە قاتىناۋى قيىن. بىراق ەرەسەكتەر ءبىر ايلا تاپقان كورىنەدى. تاۋ باسىنا ۇلكەن دىڭگەك قاداپ, بولات كابەلدەر جۇيەسىن جاساعان. كابەلدىڭ ەكىنشى ۇشى قيىردا. مەكتەپ تە سول جەردە. وسىلايشا, وقۋشىلار وزەندەردى, جارتاستاردى باسىپ ءوتىپ, ءبىلىم ورداسىنا جەتەدى. مىسالى, ءسىز كورىپ تۇرعان سۋرەتتە 9 جاسار قىز 65 كم/ساع جىلدامدىقتا كابەلمەن تومەن قاراي قۇلديلاپ بارا جاتىر.
قايىرىمدى پوچو
جەر شارىنداعى بارشا تىرشىلىك يەسى ءبىر-بىرىمەن تىعىز بايلانىستى. اسىرەسە ادام مەن جانۋار دوستىعىن ءجيى كەزدەستىرەمىز. دەسە دە قولتىراۋىن مەن گيلبەرتتىڭ 20 جىلعى نازىك بايلانىسىن ەستىگەندە, تاڭعالدىق.
1991 جىلى كوستا-ريكا ازاماتى گيلبەرت شەددەن وزەن جاعاسىندا جاتقان جارالى قولتىراۋىندى كورەدى. سول كوزى شىققان, جارالانعان جانۋاردىڭ ءحالى مۇشكىل ەدى. جىگىت قولتىراۋىندى قايىققا سالىپ, ۇيىنە الىپ كەتەدى. التى اي بويى كۇتىم جاساپ, ەمدەيدى. «پوچو» دەپ ات قويادى. ارادا ءبىرشاما ۋاقىت ءوتىپ, پوچو جازىلادى. گيلبەرت ونى وزەنگە اپارىپ, بايىرعى تىرشىلىگىنە جىبەرمەك بولعاندا قولتىراۋىن ارتىنان ۇيگە ەرىپ كەلەدى. ءسويتىپ, مەيىرىمدى جىگىتتىڭ ۇيىنە جاقىن توعاندا ءومىر سۇرەدى. ولار كۇن سايىن بىرگە ءجۇزىپ, ويناپ, قىزىقتى ۋاقىت وتكىزەدى. ادامعا ۇيىرسەك قولتىراۋىن 2011 جىلى ءولدى دەسەدى.