85 جىلدىق تاريحى بار قازاق ۇلتتىق اگرارلىق ۋنيۆەرسيتەتىندەگى تاربيە جۇمىسىنىڭ بىرەگەي كورسەتكىشى – جوعارى وقۋ ورىندارى اراسىندا تۇڭعىش رەت اشىلعان «دوستىق» ستۋدەنتتىك اسسامبلەياسى. 2004 جىلى نەگىزى قالانعان بۇل ستۋدەنتتىك اسسامبلەيا ۋنيۆەرسيتەتىمىزدە ءبىلىم الۋشى سلاۆيان, نەمىس, ۇيعىر, تاتار, كورەي سىندى 21 ۇلتتىڭ ستۋدەنت جاستارىن ءبىر شاڭىراق استىنا بىرىكتىرۋدە جانە ولاردىڭ ءوزارا ىنتىماعى مەن دوستىعىن نىعايتۋدا ماڭىزدى ءرول اتقارۋدا. ستۋدەنتتىك اسسامبلەيا ۇلتارالىق تاتۋلىق پەن كەلىسىمدى ناسيحاتتاۋعا, قازاقستاندا ءومىر سۇرەتىن ۇلتتاردىڭ سالت-ءداستۇرىن, مادەنيەتى مەن تاريحىن قۇرمەتتەۋدى تاربيەلەۋگە ەرەكشە ءمان بەرەدى. اسسامبلەيا ستۋدەنت جاستار اراسىندا جاڭا قازاقستاندىق پاتريوتيزم مەن دوستىقتى قالىپتاستىرۋ ماقساتىندا ەلىمىزدە ءومىر سۇرەتىن ءتۇرلى ۇلتتاردىڭ مەرەكەلەرىنە, مادەني قۇندىلىقتارىنا ارنالعان كوپتەگەن ءىس-شارالار, فلەش-موبتار وتكىزىپ كەلەدى. اسسامبلەيانى ستۋدەنتتەر وزدەرى باسقارادى. ول ستۋدەنتتىك دەموكراتيانى دامىتۋدىڭ دا وڭتايلى تەتىگىنە اينالدى.
بۇگىنگى كۇنى ۋنيۆەرسيتەتتەگى «دوستىق» ستۋدەنتتىك اسسامبلەياسىنىڭ ءوز ورتالىعى مەن ارنايى جاساقتالعان مۇراجايى وقۋ ورداسىندا وقيتىن ءارتۇرلى ۇلت وكىلدەرىنىڭ ۇنەمى باس قوساتىن جانە ءتۇرلى باعىتتاعى ءىس-شارالاردى ۇيلەستىرەتىن رۋحاني ورتالىعىنا اينالىپ وتىرعاندىعىن ايرىقشا اتاپ وتكىم كەلەدى. مۇراجاي جىل سايىن اسسامبلەيا قاتارىنا كەلىپ قوسىلاتىن ستۋدەنتتەردىڭ باستاماسىمەن ۇلتتار مەن ۇلىستاردىڭ سالت-داستۇرىنەن, تاريحى مەن مادەنيەتىنەن حابار بەرەتىن جاڭا ماعلۇماتتارمەن, جادىگەرلەرمەن تولىقتىرىلىپ كەلەدى. مۇراجايدا الماتى قالاسىنداعى ورىس, ۋكراين, كۇرد, ۇيعىر, كورەي, نەمىس, چەشەن, تۇرىك, پولياك, بەلورۋس ەتنوستارى مادەني بىرلەستىكتەرىمەن بىرىگىپ, وسى ۇلتتاردىڭ ەتنوگرافياسىنان, تاريحىنان, مادەنيەتىنەن, شارۋاشىلىعى مەن ءداستۇر-سالتتارىنان مول مالىمەتتەر ۇسىناتىن جەكەلەگەن كورمەلەر مەن تۇساۋكەسەرلەر, وسى باعىتتا ءتۇرلى مادەني شارالار ۇيىمداستىرۋ جولعا قويىلعان. مۇراجاي ەكسپوناتتارى ەلدەگى ۇلتتار مەن ۇلىستار ءومىرىنىڭ كورنەكى بەينەسىندەي اسەر قالدىرادى.
ۋنيۆەرسيتەتتەگى مۇراجاي جۇمىسىنا «قازاقستان حالقى اسسامبلەياسى» رەسپۋبليكالىق قورىنىڭ توراعاسى ۆ.ي.گرەبنەۆ, قازاقستانداعى ورىس, سلاۆيان, كازاك قاۋىمداستىعى توراعاسىنىڭ ورىنباسارى ا.پ.چەسنوكوۆ, الماتى وبلىستىق «ەلەفتەريا» گرەكتەردىڭ قوعامدىق بىرلەستىگىنىڭ ءتوراعاسى گ.ك.يوردانيدي, «قازاقستان ۇيعىرلارىنىڭ مادەنيەتى» قوعامىنىڭ توراعاسى ف.ت.حاسانوۆ سىندى تۇلعالار ۇنەمى ءوز كومەكتەرىن كورسەتىپ كەلەدى. سونىمەن قاتار, الماتى قالاسىنداعى ا.ا.حاجاليەۆ باسقاراتىن چەشەن-ينگۋش مادەني ورتالىعى, ن.ن.وسيپەنكو جەتەكشىلىك ەتەتىن ۋكراين مادەني ورتالىعى, و.چەرۆينسكي باسشىلىق جاسايتىن پولياك مادەني ورتالىعى سىندى ەتنومادەني بىرلەستىكتەر مەن ءبىزدىڭ ستۋدەنتتىك اسسامبلەيا ءوزارا ءتيىمدى بايلانىستار ورناتقان.
تولە ءبيدىڭ «جالعاندا ويلاپ تۇرساڭ, بىرلىك كەرەك, بىرلىكتى ويلاۋ ءۇشىن تىرلىك كەرەك» دەگەن اتالىق وسيەتىن ءبىزدىڭ ستۋدەنتتەر جۇزەگە اسىرۋدا. 2006 جىلى اسسامبلەيا مۇشەلەرى استانا قالاسىندا ءوتكەن رەسپۋبليكالىق جاستار فورۋمىنا قاتىستى. 2008 جىلى ۋنيۆەرسيتەتتىڭ كوشباسشى ستۋدەنتتەرىنىڭ ءبىرى, اسسامبلەيا مۇشەسى ايسيات بالاەۆا قازاقستانداعى گەندەرلىك ساياسات ماسەلەلەرى بويىنشا ەلباسى ن.نازارباەۆپەن بولعان كەزدەسۋگە قازاق ۇلتتىق اگرارلىق ۋنيۆەرسيتەتى ستۋدەنتتەرى اتىنان قاتىسۋ قۇرمەتىنە يە بولدى. ول وسى كەزدەسۋدە ۋنيۆەرسيتەتتىڭ تاربيە سالاسىنداعى تاجىريبەسى تۋرالى ايتىپ بەردى.
2012 جىلدىڭ 27 ساۋىرىندە استانادا وتكەن قازاقستان حالقى اسسامبلەياسىنىڭ ءحىح سەسسياسىنا «دوستىق» ستۋدەنتتىك اسسامبلەياسىنىڭ بەلسەندى مۇشەلەرى, ۋنيۆەرسيتەتىمىزدىڭ بەلسەندى جاستارى – زارينا تالۋەنكو, زۋليحان كاريموۆا, وكسانا گەفتتىڭ دەلەگات رەتىندە قاتىسۋى – ستۋدەنتتىك اسسامبلەيا قىزمەتىنىڭ جاقسى كورسەتكىشى. وسى سەسسيا جۇمىسى بارىسىندا ءبىزدىڭ ۋنيۆەرسيتەت پەن «قازاقستان حالقى اسسامبلەياسى» رەسپۋبليكالىق قوعامدىق قورى اراسىندا ىنتىماقتاستىق تۋرالى مەموراندۋمعا قول قويىلدى. 2014 جىلى اسسامبلەيانىڭ كەزەكتى سەسسياسىنىڭ دەلەگاتى, ۋنيۆەرسيتەتىمىزدىڭ ستۋدەنتى, «دوستىق» ستۋدەنتتىك اسسامبلەياسىنىڭ مۇشەسى ۆلاديسلاۆ تسوي ەلوردادا ن.ءا.نازارباەۆتىڭ «قازاقستان – 2050» ستراتەگياسى: بەيبىتشىلىك, رۋحانيات جانە كەلىسىم مادەنيەتى» تاقىرىبىنداعى بايانداماسىن تالقىلاۋعا قاتىستى.
سەسسيا قارساڭىندا ءبىزدىڭ ستۋدەنتتىك اسسامبلەيانىڭ 40 مۇشەسى الماتى قالاسىنىڭ اكىمدىگى ۇيىمداستىرعان قازاقستان حالقى اسسامبلەياسى جاستار ەتنومادەني بىرلەستىكتەرى كوشباسشىلارىنىڭ فورۋمى جۇمىسىنا بەلسەنە اتسالىستى. اسسامبلەيا جۇمىسىن جانداندىرۋدا تاتار ا.سارافەەۆا, بەلورۋس ۆ.سادرا, ورىس ە.مولچانوۆا, ازەربايجان س.يۋسۋپوۆا, ۋكراين ە.كيرپيچەنكو, كورەي ا.كيم, ۇيعىر ك.ۋزەر, تاعى باسقالار ەرەكشە بەلسەندىلىكتەرىمەن كوزگە ءتۇستى. وسى فورۋمدا قازاقستان حالقى اسسامبلەياسىنىڭ «جاراسىم» رەسپۋبليكالىق جاستار قاناتىن قۇرۋ تۋرالى شەشىم قابىلداندى.
تاعى ءبىر تىلگە تيەك ەتە كەتەتىن جەتىستىك رەتىندە ۋنيۆەرسيتەتىمىزدىڭ 2012 جىلى حالىقارالىق «رۋسسكي مير» قورىنان گرانتتىق جوباسىن جەڭىپ العانىن ماقتانىشپەن ايتا الامىز. بۇل كونكۋرسقا الەمنىڭ تۇكپىر-تۇكپىرىنەن, اتاپ ايتقاندا, تمد, ەۋروپا, ازيا, افريكا, اۆستراليا, امەريكا جانە باسقا ەلدەردەن بارلىعى 405 ءوتىنىم بەرىلگەن بولاتىن. اشىق كونكۋرستا ۋنيۆەرسيتەتىمىزدىڭ «ك ديالوگۋ كۋلتۋر چەرەز رۋسسكي يازىك» گرانتتىق جوباسى جەڭىمپازدار قاتارىنان تابىلىپ, ونى جۇزەگە اسىرۋ «دوستىق» ستۋدەنتتىك اسسامبلەياسىنا ۇسىنىلدى. بۇل جوبانى ورىنداۋ بارىسىندا ستۋدەنتتەر رەسەيدىڭ قازاقستانداعى كونسۋلدىعى تاراپىنان شىعارماشىلىق قولداۋعا يە بولدى. جوبا اياسىندا «ۆ ميرە رۋسسكوي كۋلتۋرى» تاقىرىبىندا وليمپيادا, ستۋدەنتتەردىڭ شىعارماشىلىق الەۋەتىن ارتتىرۋ ماقساتىندا ورىس تىلىندەگى پوەزيالىق شىعارمالاردى مانەرلەپ وقۋ كونكۋرسى, ورىس حالىق اندەرىنىڭ بايقاۋى ۇيىمداستىرىلدى. ورىس جانە قازاق حالىقتارىنىڭ ءداستۇرلى دوستىعىنىڭ تەرەڭدەۋىنە ۋنيۆەرسيتەت ۇجىمى وسىلايشا ءوز ۇلەسىن قوستى.
ستۋدەنتتىك اسسامبلەيا قۇرىلعان كۇنىنەن باستاپ, رەسپۋبليكانىڭ قوعامدىق-مادەني ومىرىنە, رۋحاني تىنىس-تىرشىلىگىنە بەلسەنە ارالاسىپ كەلەدى. وتكەن جىلى عانا اسسامبلەيا مۇشەلەرى الماتىدا ۇيىمداستىرىلعان «تىلدەر مەن مادەنيەتتەر جارمەڭكەسى» فەستيۆالىنە قاتىسىپ, ايتۋلى تابىستارعا قول جەتكىزدى. الماتى قالاسىنىڭ جوعارى وقۋ ورىندارىندا وقيتىن ءتۇرلى ۇلتتار مەن ۇلىستاردىڭ وكىلدەرى, «قازاقستان حالقى اسسامبلەياسى» رەسپۋبليكالىق قورى, قالاداعى ەتنومادەني بىرلەستىكتەر وكىلدەرىنىڭ باسىن قوسقان فەستيۆالدە قازاق, ورىس, بەلورۋس, ۋكراين, تاتار, وزبەك, ۇيعىر, كورەي, چەشەن جانە ت.ب. تىلدەردە ءان-جىر شىرقالىپ, وسى ەتنوستاردىڭ مادەنيەتىمەن, تاريحىمەن, سالت-داستۇرىمەن تانىسىپ, كەڭىنەن ناسيحاتتاۋ جۇرگىزىلدى.
ءىس-شاراعا قاتىسقان رەسەي فەدەراتسياسىنىڭ الماتىداعى كونسۋلى, قازاقستان رەسپۋبليكاسىنداعى «روسسوترۋدنيچەستۆو» مەكەمەسى باسشىسىنىڭ ورىنباسارى ي.پەرەۆەرزەۆا حانىم: «بۇگىنگى قازاقستان الەمگە دوستىق پەن بەيبىتشىلىكتىڭ ۇلگىسىن كورسەتىپ كەلەدى. بۇل رەتتە قازاق ۇلتتىق اگرارلىق ۋنيۆەرسيتەتىنىڭ جاستار اراسىنداعى پاتريوتيزم مەن ۇلتارالىق تاتۋلىقتى نىعايتۋ ماقساتىندا اتقارىپ جۇرگەن جۇمىستارىنا ءتانتىمىن. ۋنيۆەرسيتەتتىڭ ون جىلدىق تاريحى بار «دوستىق» ستۋدەنتتىك اسسامبلەياسىنىڭ جۇيەلى جۇمىسى وسى سوزىمە دالەل بولا الادى», – دەپ لايىقتى باعاسىن بەردى.
الەمگە قازاقستاننىڭ دوستىعى مەن ىنتىماقتاستىعى, بىرلىگى مەن بەرەكەسى جاراسقان ەل بولىپ تانىلۋىنا بارىنشا ۇلەسىن قوسىپ كەلە جاتقان ۋنيۆەرسيتەتىمىزدەگى «دوستىق» ستۋدەنتتىك اسسامبلەياسى 2014 جىلى ءوزىنىڭ ون جىلدىعىن جان-جاقتى اتاپ ءوتتى. مەرەيلى كۇنگە ارنالعان اسەرلى كەشتەر, قويىلىمدار, كەزدەسۋلەر «ءبىز – قازاقستاننىڭ ءبىرتۇتاس حالقىمىز!», ءبىز – قازاقستاندىقتارمىز!» ۇراندارىمەن ۇيىمداستىرىلدى. ەلباسىنىڭ: «جاستاردى اسسامبلەيانىڭ بارلىق دەڭگەيدەگى جۇمىستارىنا, قوعامدىق كەلىسىمدى قالىپتاستىرۋ شارالارىنا بارىنشا تارتقان ماڭىزدى. ەڭ باستىسى – اكەلەرىمىز بىزگە قالدىرعان ءوزارا ءتۇسىنىستىك, تولەرانتتىلىق پەن دوستىق ۇعىمىن بالالارىمىزعا, نەمەرەلەرىمىزگە جەتكىزۋ – ءبىزدىڭ پارىزىمىز. ال وسى ۇدەرىسكە قاتىسقان جاستار ءوزىن ءوزى تاربيەلەپ شىعادى», دەگەن سوزدەرى جاستار اراسىندا جۇرگىزىلەتىن وسىنداي جۇمىستاردىڭ ماڭىزدىلىعىن كورسەتىپ وتىر. سوندىقتان ۋنيۆەرسيتەت باسشىلىعى ستۋدەنتتەردىڭ ءوزىن ءوزى باسقارۋ ۇردىسىنە, ولاردىڭ شىعارماشىلىق تۇرعىدان ىزدەنۋىنە بارىنشا قولايلى جاعداي تۋعىزۋعا ۇمتىلادى.
بۇل رەتتە حالىقارالىق جانە رەسپۋبليكالىق كونكۋرستاردىڭ لاۋرەاتى, ۋنيۆەرسيتەتتىڭ ماقتانىشىنا اينالعان, ستۋدەنتتىك اسسامبلەياسىنىڭ «دوستىق» بي انسامبلىنىڭ رەپەرتۋارىندا الەم حالىقتارىنىڭ 30-عا جۋىق ءبيى مەن قويىلىمى بار ەكەنىن اۋىز تولتىرىپ ايتا الامىز. انسامبل ءوز ورىنداۋىنداعى «دوستىق», «شاتتىق», «جاۋىنگەر», «حورەزم», «ءاندىجان پولكاسى», «نازىم», ورىس, ۋكراين, وزبەك, تۇرىك, ءۇندى, تاتار جانە ت.ب. بيلەرى ارقىلى قازاق جەرىندەگى ءارتۇرلى ۇلتتاردىڭ ءداستۇرلى مادەنيەتى مەن بي ونەرىن دامىتۋعا, ناسيحاتتاۋعا تولاسسىز ەڭبەك ءسىڭىرىپ كەلەدى. بي ۇجىمى 2005 جىلى رەسەيدىڭ سامارا قالاسىندا وتكەن جاستار فەستيۆالىنىڭ ديپلومانتى اتانسا, 2007 جىلى الماتى – اتىراۋ – استراحان – ۆولگوگراد ساپارلارىندا ءساتتى ونەر كورسەتىپ, ۇلكەن ماراپاتتارعا يە بولدى. ءانسامبلدىڭ 2012 جىلى تۇركيادا وتكەن «تۇركى الەمى» حالىقارالىق فەستيۆالىندە جۇلدەلى I ورىن يەگەرى بولۋى – ۇجىمنىڭ ۇلتتار مەن ۇلىستار اراسىنداعى كەلىسىم مەن تاتۋلىقتى نىعايتۋعا قوسقان ۇلەسىنە حالىقارالىق دەڭگەيدە بەرىلگەن ۇلكەن باعا.
بۇعان قوسا, ۋنيۆەرسيتەتىمىزدەگى ءمادەني شارالاردا ونەر كورسەتىپ جۇرگەن دارىندى ستۋدەنتتەرىمىزدىڭ رەپەرتۋارىنا قازاق تىلىندەگى اندەرمەن بىرگە ورىس, قىرعىز, وزبەك جانە اعىلشىن تىلدەرىندەگى اندەردىڭ ەنۋى دە تاتۋلىقتى تۋ ەتكەن ءبىزدىڭ ۋنيۆەرسيتەتىمىزدەگى اتقارىلعان جۇمىستاردىڭ ءبىر بولشەگى. بۇل جۇمىستاردىڭ بارلىعى جاستار اراسىندا ۇلتتىق تاتۋلىق پەن كەلىسىمدى تاربيەلەۋدى كۇشەيتە بەرەتىنىنە سەنىم مول. ستۋدەنتتەر بۇقارالىق جانە قوعامدىق ساياسي شارالارعا ءوز ەرىكتەرىمەن, وقۋ ۇدەرىسىنەن تىس ۋاقىتتا عانا قاتىسادى. وسى قاعيداتتى ۇستانۋ ءبىلىم مەن تاربيەنىڭ ءبىرىن ءبىرى تولىقتىرۋىنا جەتكىزەدى دەپ ەسەپتەيمىز.
مەملەكەتىمىزدە ءومىر سۇرەتىن ەتنوستاردىڭ مادەنيەتى مەن ءتىلىن ناسيحاتتاۋ باعىتىندا ستۋدەنتتىك اسسامبلەيانىڭ ۇيىمداستىرۋىمەن ءار وقۋ جىلىندا «ءبىر شاڭىراق استىندا» قويىلىمى, «قازاقستان – ءبىزدىڭ ورتاق ءۇيىمىز» كەشى, «زدراۆستۆۋي, ماسلەنيتسا!», «سابانتوي» مەرەكەلەرى, «ءمادەنيەتتەر جارمەڭكەسى» فەستيۆالى سىندى ونەگەلى ءىس-شارالار تۇراقتى تۇردە ءوتىپ وتىرادى. بۇل شارالاردا مىڭداعان ستۋدەنت ءوز ونەرلەرىن كورسەتەدى. مىسالى, 2010 جىلدىڭ مامىر ايىندا «دوستىق» ستۋدەنتتىك اسسامبلەياسى ۋنيۆەرسيتەتتىڭ 80 جىلدىعىنا وراي «ناۋرىز بەن ماسلەنيتسا» ەرتەگى-سپەكتاكلىن ساحنالادى. مۇنداعى باستى يدەيا – ءارتۇرلى ۇلتتىڭ سالت-ءداستۇرى مەن دىنىنە قاراماستان ءوزارا تاتۋ بولۋىنىڭ ماڭىزىن جانە ەتنوسارالىق دوستاستىقتى ناسيحاتتاۋ.
ەلباسىنىڭ ءۇش تۇعىرلى ءتىل تۇجىرىمداماسىنا نەگىزدەلگەن تىلدەر ساياساتىن جۇزەگە اسىرۋ ماقساتىندا «دوستىق» اسسامبلەياسى قازاقستان حالقى تىلدەرى مەرەكەسىن جىل سايىن «وزگە ءتىلدىڭ ءبارىن ءبىل, ءوز ءتىلىڭدى قۇرمەتتە!», «ۆ سەمە ەدينوي», «تىلدەر كەرۋەنى» سياقتى ءىس-شارالارمەن مازمۇندى تۇردە اتاپ وتەدى. بۇگىندە بىرنەشە ءتىلدى جەتىك مەڭگەرگەن ستۋدەنتتەر مەن ماگيسترانتتارىمىز الەمنىڭ ونداعان وزىق ۋنيۆەرسيتەتتەرىندە ءبىلىمدەرىن جەتىلدىرۋدە. ستۋدەنتتىك اسسامبلەيا مۇشەلەرى – ۋنيۆەرسيتەتىمىزدىڭ تالانتتى جاستارى قالالىق, اۋداندىق دەڭگەيدەگى ءارتۇرلى بايقاۋلارعا قاتىسىپ, بەلسەندىلىك تانىتىپ كەلەدى. 2008 جىلى ە.كاەل ەسىمدى ستۋدەنتىمىز «قازاقستان» ارناسى ۇيىمداستىرعان «ءتىل – تاتۋلىق تىرەگى» بايقاۋىندا جەڭىمپاز اتانىپ, مەملەكەتتىك تىلگە دەگەن ەرەكشە ىقىلاسىن كورسەتە ءبىلدى. 2013 جىلى قازاق مەملەكەتتىك قىزدار پەداگوگيكالىق ۋنيۆەرسيتەتى بازاسىندا ۇيىمداستىرىلعان «يازىك كاك يسپوۆەد نارودا» كونكۋرسىندا اسسامبلەيا مۇشەلەرىنەن قۇرىلعان كوماندا باس جۇلدەنى جەڭىپ الدى. 2014 جىلى الماتى قالاسى بويىنشا وتكەن «ءتىل – پاراسات» بايقاۋىندا قازاق ءتىلىن جەتىك مەڭگەرگەن ينجەنەرلىك فاكۋلتەتتىڭ ستۋدەنتى, اسسامبلەيانىڭ بەلدى مۇشەسى م.تەنياكوۆ جۇلدەلى 3-ورىنعا يە بولىپ, ۋنيۆەرسيتەت مەرەيىن ۇستەم ەتتى. قازىرگى كەزەڭدە ۋنيۆەرسيتەت ستۋدەنتتەرىنىڭ بارلىعى دەرلىك مەملەكەتتىك ءتىلدى بىلەتىندىگىن ماقتانىشپەن ايتا الامىن.
«دوستىق» ستۋدەنتتىك اسسامبلەياسى الماتى قالاسىنداعى جوعارى وقۋ ورىندارىمەن جانە جاستار ۇيىمدارىمەن تىعىز بايلانىس ورناتقان. 2013 جىلى ءال-فارابي اتىنداعى قازاق ۇلتتىق ۋنيۆەرسيتەتىمەن بىرلەسە وتكىزگەن «يارماركا كۋلتۋر» ادەبي كەشى, 2014 جىلى 16 قاراشا – حالىقارالىق تولەرانتتىلىق كۇنىنە ارنالعان قازاقستان مەنەدجمەنت, ەكونوميكا جانە بولجاۋ ينستيتۋتى جانە حالىقارالىق بيزنەس ۋنيۆەرسيتەتى ستۋدەنتتەرىنىڭ قاتىسۋىمەن ۇيىمداستىرىلعان «مى رازنىە, مى ۆمەستە» ءىس-شاراسى, «قازاقستان حالقى اسسامبلەياسى – قازاقستاندىق قوعامنىڭ كەلىسىم تىرەگى» تاقىرىبىندا الماتى قالاسى قوعامدىق ەتنومادەني بىرلەستىكتەرى وكىلدەرىمەن كەزدەسۋ كەشتەرى – وسىنداي دوستىق قارىم-قاتىناستىڭ, ىرگەلى بايلانىستىڭ ناتيجەسى. ۋنيۆەرسيتەت بازاسىندا وتكىزىلگەن «مەنىڭ وتانىم – قازاقستان» جاستار اكتسياسى, «ءححى عاسىردىڭ تۇلعاسىن تاربيەلەۋ: قازۇاۋ تاجىريبەسى», «و.سۇلەيمەنوۆ تۇلعاسى ارقىلى جاستاردى تاربيەلەۋ ۇلگىسى» رەسپۋبليكالىق فورۋمدارى, «قازاقستاندىق قوعامدا ەتنوسارالىق قارىم-قاتىناستاردى ۇيلەستىرۋ» فورۋمى, «جاستاردى رۋحاني-ادامگەرشىلىك ءتاربيەلەۋ ماسەلەلەرى» تاقىرىبىنداعى سەمينار جانە تاعى باسقا كوپتەگەن ءىس-شارالار رەسپۋبليكاداعى باسقا دا جوعارى وقۋ ورىندارىمەن تاجىريبە الماسۋعا مۇمكىندىك بەردى.
اسسامبلەيا ەلباسى نۇرسۇلتان نازارباەۆتىڭ ەڭبەكتەرىن, جىل سايىنعى جولداۋلارىن تالقىلاۋ مەن ناسيحاتتاۋ جۇمىسىن جۇرگىزە وتىرىپ, جاستاردى مەملەكەتتىڭ الەۋمەتتىك-ەكونوميكالىق جۇيەسىن جەتىلدىرۋ ءىس-شارالارىنا بەلسەندى قاتىسۋعا, ولاردى يننوۆاتسيالىق زەرتتەۋلەرمەن, عىلىمي جوبالارمەن اينالىسۋعا باعىتتاپ وتىرادى. ءداستۇرلى جولداۋلاردى تالقىلاۋ قىزۋ وتەدى, سەبەبى, پرەزيدەنتىمىزدىڭ ءاربىر ءسوزىن شىن جۇرەكپەن سەزىنە وتىرىپ, ستۋدەنت جاستار ورتاق ءۇيىمىز – قازاقستاندى اتا-بابالارىمىزدىڭ سان جىلدار بويى اسىل ارمانى بولعان «ماڭگىلىك ەلگە» اينالدىرۋ جولىندا تاتۋلىقتىڭ قانشالىقتى قاجەت ەكەنىن تۇسىنەدى.
ۇلتتار اراسىنداعى دوستىقتى بەرىك ەتۋ, قوعامىمىزداعى تولەرانتتىلىقتى ارتتىرۋ جولىنداعى ۋنيۆەرسيتەت ۇجىمىنىڭ, «دوستىق» ستۋدەنتتىك اسسامبلەياسىنىڭ جىلدار بويى اتقارعان جۇيەلى جۇمىسى ەلەنبەي قالعان جوق. 2014 جىلدىڭ جەلتوقسان ايىندا ۇلتارالىق كەلىسىمدى نىعايتىپ, حالىقتار دوستىعى مەن بىرلىگىن جانداندىرۋ ىسىنە ەل جاستارىن جۇمىلدىرۋ باعىتىندا اتقارعان قىزمەتىم ءۇشىن ەلباسى جارلىعىمەن «بىرلىك» التىن مەدالىمەن ماراپاتتالدىم. بۇل ۇلكەن مارتەبەنى ۋنيۆەرسيتەت باسشىسى رەتىندە تەك ماعان ەمەس, سونىمەن بىرگە, «دوستىق» ستۋدەنتتىك اسسامبلەياسىنىڭ توڭىرەگىنە ۇيىسقان, بىرلىگى جاراسقان ستۋدەنت جاستارىمىزعا بەرىلگەن ورتاق باعا دەپ بىلەمىن. قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ ەلباسى اتىنان مەملەكەتتىك ناگرادالاردى تاپسىرىپ تۇرىپ, ەلىمىزدەگى الەۋمەتتىك-ەكونوميكالىق جەتىستىكتەر ۇلتتار اراسىنداعى تاتۋلىق پەن سىندارلى كەلىسىم ناتيجەسىندە مۇمكىن بولىپ وتىرعاندىعىن ەرەكشە اتاپ ءوتتى.
2015 جىلدىڭ قازاقستان حالقى اسسامبلەياسىنىڭ جىلى اتالۋى رەسپۋبليكاداعى جوعارى وقۋ ورىندارى ىشىندە العاش اشىلعان ستۋدەنتتىك اسسامبلەياسى بار قازاق ۇلتتىق اگرارلىق ۋنيۆەرسيتەتىنە كوپ مىندەتتەر جۇكتەيدى. تاربيە مەن ءبىلىم بەرۋ ۇردىستەرىن تەڭ ۇستاي وتىرا, ۋنيۆەرسيتەت ەلىمىزدىڭ بولاشاعى سانالاتىن جاڭا بۋىندى قالىپتاستىرۋ جولىندا تىڭ جۇمىستاردى اتقارۋدى جوسپارلاپ وتىر. وقۋ ۇدەرىسىنە ەلباسى ن.ءا.نازارباەۆتىڭ ءومىرى مەن قىزمەتى تۋرالى ارناۋلى كۋرستار ەنگىزۋدى جوسپارلاۋ ستۋدەنتتەرگە ەلىمىزدىڭ تۇڭعىش پرەزيدەنتى جاساعان قازاقستاندىق جولدىڭ ەرەكشەلىگىن, يدەولوگياسى مەن فيلوسوفياسىن ءتۇسىندىرۋ, ەلدە جۇرگىزىلىپ وتىرعان رەفورمالار ساياساتىنىڭ لوگيكاسى مەن ەۆوليۋتسياسىن ۇعىندىرۋ قاجەتتىلىگىنەن تۋىندايدى.
كەلەشەك اۋىلدىڭ زيالى قاۋىمىنىڭ نەگىزىن قۇرايتىن ۋنيۆەرسيتەت ستۋدەنتتەرى ءوز ەلىنىڭ پاتريوتى, ازاماتتىق ۇستانىمى قالىپتاسقان, بەرەكە مەن بىرلىكتى تۋ ەتكەن تولەرانتتى مامان بولىپ شىعىپ جاتسا, وندا ءبىزدىڭ ەڭبەگىمىزدىڭ زايا كەتپەگەندىگى دەپ بىلەمىز.
تىلەكتەس ەسپولوۆ,
قازاق ۇلتتىق اگرارلىق ۋنيۆەرسيتەتىنىڭ رەكتورى, ۇلتتىق عىلىم اكادەمياسىنىڭ
ۆيتسە-پرەزيدەنتى, اكادەميك.
الماتى.