13 مامىردا الماتىداعى قورعانىس مينيسترلىگىنىڭ ورتالىق اسكەري كلينيكالىق گوسپيتالىندە 18 جاستاعى سارباز دوسىمجان ءسالىمجان قايتىس بولدى, دەپ حابارلايدى Egemen.kz.
دوسىمجان ءسالىمجان بىلتىر كۇزگى شاقىرىلىمدا ءوز قالاۋىمەن اسكەرگە كەتكەن. الايدا كوپ ۇزاماي بالا بۇيرەگىنە, وكپەسىنە شاعىمدانىپ اۋرۋحاناعا تۇسكەن. سارباز جەتىسۋ وبلىسى سارىوزەك گارنيزونىندا قىزمەت ەتكەن. دەنساۋلىعى كۇرت ناشارلاي باستاعاندا الدىمەن سارىوزەكتەگى اۋرۋحاناعا جۇگىنگەن. وندا بالانىڭ اسقازانى تازالانعان. كەيىن ول جەدەل تۇردە الماتىداعى قورعانىس مينيسترلىگىنىڭ ورتالىق اسكەري كلينيكالىق گوسپيتالىندە جانساقتاۋ بولىمىنە جاتقىزىلعان. 10 كۇننەن كەيىن بالانىڭ جۇرەگى توقتاپ قالعان.
Massaget.kz ءتىلشىسى جازعانداي, بالانىڭ اتا-اناسى ونىڭ ولىمىنە لەيتەنانتتى كىنالاپ وتىر. ولاردىڭ ايتۋىنشا, بيلىگىن اسىرا پايدالانعان اسكەري ساربازدى تۇراقتى تۇردە ۇرىپ كەلگەن, سالدارىنان بالانىڭ دەنساۋلىعى سىر بەرە باستاعان.
دارىگەرلەر بالاعا جەدەل گلومەرۋلونەفريت, ياعني بۇيرەك جەتىسپەۋشىلىگى دەگەن دياگنوز قويعان.
دوسىمجاننىڭ اناسى 3 مامىر مەن 13 مامىرعا دەيىن دەنساۋلىعى قانداي بولعانىن, قانداي ەم-شارالارىنىڭ قابىلدانعانىن, ءوزىن قالاي سەزىنگەنى تۋرالى بىلگىسى كەلەدى. ولار بالانىڭ جانازاسى وتكەننەن كەيىن قۇلسارىدان كەلگەن. اناسى بۇل ءىستىڭ بايىبىنا بارماي, جانىم تىنىشتالمايدى دەيدى. Massaget.kz ءتىلشىسى مارقۇم سارباز ەمدەلگەن اسكەري گوسپيتالگە باردى.
- مەن ونى ەمدەدىم. ول 3 مامىردا كەلىپ ءتۇستى, تۇسكەندە دەنساۋلىعى اۋىر دەپ باعالاندى. بۇيرەك جەتىسپەۋشىلىگىنىڭ بەلگىلەرى بولدى. بۇل بەلگىلەر زەرتحانالىق مالىمەتتەردەن كەيىن راستالدى. بىردەن جانساقتاۋ بولىمىنە جاتقىزدىق. سول جەردە گەمودياليز, پلەۆرالىق پۋنكتسيا جانە قان قۇيۋدى قامتيتىن قارقىندى تەراپيا كەشەنى جۇرگىزىلدى. وعان قوسا, سيمپتوماتيكالىق ەم جاسالدى. ەمدەۋ كەزىندە جاعدايى العاشىندا قالىپقا كەلىپ, جاقسارا باستادى. كەيىن اعزانىڭ باسقا دا مۇشەلەرى ب ۇلىنە باستادى. 13 مامىردا جاعدايى كۇرت ناشارلاي باستادى. جۇرەگى توقتاپ قالدى. 45 مينۋت بويى رەانيماتسيالىق شارالار جۇرگىزىلدى. ول ناتيجە بەرمەدى. 15:15-تە ءولىم تىركەلدى, - دەپ جاۋاپ بەردى ساربازدى ەمدەگەن دارىگەر يۆان كارتاشوۆ.
سارباز تۇسكەن بويدا وعان ۋدز جاسالعان. سول كەزدە ونىڭ جۇرەگى مەن ءىش-قۇرىلىسى سۋعا تولعانى انىقتالعان.
- بالانىڭ جۇرەگىن, وكپەسىن قارادىم. جۇرەگىندە دە, وكپەسىندە دە, ءىش-قۇرىلىسىندا دا سۋ كوپ مولشەردە تولىپ قالعان. بۇيرەكتىڭ جەدەل جەتىسپەۋشىلىگى بەلگىلەرى كورىندى. بالا تۇسكەندە وعان وسىنداي قورىتىندى بەرىلدى. اعزاعا سۋ جينالۋىنىڭ سەبەبى كوپ. كوپ جاعدايدا قابىنۋ اۋرۋلارىنان, سالقىن تيگەننەن, بۇيرەك دۇرىس جۇمىس ىستەمەگەننەن بولادى. جۇرەگىندە سۋ - پەرەكارد تە كوبىنە قابىنۋدان بولادى. بالا تۇسكەندە ەشقانداي جاراقات بايقامادىم, - دەيدى ۋدز مامانى.
جانساقتاۋ ءبولىمىنىڭ باسشىسى دا ناۋقاستىڭ بىردەن جانساقتاۋ بولىمىنە جاتقىزىلعانىن راستادى.
- تەكسەرىس جاسالدى. العاشىندا جاعىمدى وزگەرىس بولدى, الايدا اۋرۋدىڭ اعىمى ورشىگەننەن ناۋقاستىڭ جاعدايى ناشارلاي باستادى. 13 مامىردا ناۋقاستىڭ جاعدايى قاتتى ناشارلاپ كەتتى. كەيىن جۇرەگى توقتاپ قالدى, - دەدى ول.
ساربازدىڭ اناسىنىڭ ايتۋىنشا, 12 مامىردا بالانىڭ جاعدايى جاقسى بولعان.
- 12 مامىردا بالانىڭ جاعدايى ورتاشا اۋىر دەپ باعالاندى. ال 13 مامىردا دياليز جاسالادى دەپ جوسپارلاندى. 10 مامىردان باستاپ دەنساۋلىعى جاقسارا باستادى. ءبىز ونى ءتىپتى جانساقتاۋ بولىمىنەن پالاتاعا اۋىستىرۋ تۋرالى ويلادىق. بىراق 12 مامىردا تاڭعى 7:00-دە جاعدايىنا تالداۋ جاساۋ بارىسىندا باسقا دا اعزالارىنىڭ ناشارلاي باستاعانىن بايقاپ, جاعدايىن ورتاشا اۋىر دەپ باعالادىق, - دەدى ساربازدى ەمدەگەن دارىگەر يۆان ۆيكتوروۆيچ كارتاشوۆ.
ساربازدىڭ اناسى ارداق يمانعاليەۆا بالاسى اۋرۋحاناعا تۇسكەن بويدا كەلگەن. 4 مامىردا بالانىڭ دەنەسىن تولىق قاراپ شىققان, دەنە جاراقاتتارى جوق, الايدا موينىرندا بىرنارسە بايقاعان.
- ءيا, شىنىمەن, باس جانە مويىن تامىرلارىندا قان ۇيىلعانى ۋدز ارقىلى انىقتالدى. ول وڭ جاق مويىن تامىرىنان انىقتالدى. ءبىز بىردەن ەمدەۋ جوسپارىنا وزگەرىس ەنگىزدىك, - دەدى ساربازدى ەمدەگەن دارىگەر يۆان ۆيكتوروۆيچ كارتاشوۆ.
دارىگەرلەردىڭ ايتۋىنشا, بۇيرەك جەتىسپەۋشىلىگىنىڭ العاشقى سيمپتومدارى بايقالمايدى.
- بۇل اۋرۋعا شالدىققان ادامداردا ءزارى ايتارلىقتاي ازايادى. دەنى ساۋ ادامنىڭ ءزارى 1,5-2 ليتر بولسا, ونىڭ ءزارى 1 ليترگە دە جەتپەيتىن ەدى. اۋرۋحانادا جاتقاندا دا كوبەيمەدى. دارەتحاناعا ءوز اياعىمەن باردى, بۇيرەكتەرى دۇرىس جۇمىس ىستەمەگەن سوڭ, ءبىز دياليز (اعزادان ارتىق سۇيىقتىقتى جانە قاندا جينالعان قالدىق ونىمدەردى شىعارۋ - ەسك.) پروتسەدۋراسىن جاسادىق, - دەدى ول.
ايتا كەتەيىك, سوت-مەديتسينالىق ءالى شىقپادى. ءوز ەلىنەن ساۋ دەگەن انىقتامامەن شىققان بالا 6 ايدا مۇنداي اۋرۋعا شالدىعىپ, ءولىم قۇشۋىنىڭ سەبەبىنە بولۋى مۇمكىن؟!
بالانىڭ اناسى 9-10 مامىردا ۇلىمەن اشىق سويلەسكەن. سول كەزدە دوسىمجان بۇيرەككە 5 مينۋتتا توقتاۋسىز سوققى جاسالعانىن ايتتى. الايدا بالانىڭ دەنەسىندە ەشقانداي جاراقات ىزدەرى قالماعان.
18 جاستاعى دوسىمجاندى ۇردى دەگەن كۇدىكتى 2 ايعا ۋاقىتشا ۇستاۋ يزولياتورىنا قامالعان. ول قر قىلمىستىق كودەكسىنىڭ 451-بابى 1 جانە 2 بولىگى بويىنشا تەرگەلىپ جاتىر. ەگەر 2 بولىك بويىنشا قىلمىسى دالەلدەنسە, ول 3 جىلدان 7 جىلعا دەيىن باس بوستاندىعىنان ايىرىلۋى مۇمكىن. الايدا بالانىڭ اتا-اناسى مۇنداي جازامەن كەلىسپەيدى.
ەسكە سالايىق, بۇدان ەكى اپتا بۇرىن قايتىس بولعان سارباز دوسىمجان ءسالىمجاننىڭ تۋىسقاندارى سۇحبات بەرىپ, بۇل وقيعا تۋرالى ايتىپ بەرگەن ەدى.
- مىنەزى قاتتى, مىقتى جايدارى بالا, اقكوڭىل ەدى. اسكەرگە بىلتىر 11 قازاندا ءوز ەركىمەن كەتكەن. العاشقى كەزەڭدەرى ءبارى جاقسى بولعان, شاعىمى بولمادى. 2024 جىلعى 3 مامىردا تاڭەرتەڭ اناسىنا قوڭىراۋ شالىپ, "ماما, اۋىرىپ تۇرمىن, كەۋدەم قىسىپ تۇر, قىزۋ بار سياقتى" دەدى. اناسى "دارىگەرگە بارىپ قارال" دەدى. ءبىرازدان سوڭ سەرجانت قونىراۋ شالىپ, "بالانىز اۋرىپ قالدى, ازقازانى اۋىرىپ تۇرعان سياقتى, تاماق ىشپەگەننەن شىعار. قازىر دارىگەر تەكسەرىپ جاتىر" دەدى. سالدەن سوڭ ءوزىمىز قوڭىراۋ شالدىق, "اپا, ءسىزدىڭ بالاڭىزدى الماتىداعى اسكەري گوسپيتالعا جەدەل الىپ بارا جاتىر" دەدى. سودان حابارسىز كەتتى. كەشكە عانا پودپولكوۆنيك رۋسلان جىلقىباەۆ قوڭىراۋ شالىپ, ء"بارى جاقسى, قازىر دارىگەرلەر اسقازانىن تازالاپ جاتىر, جارا بار سياقتى" دەدى. بىراق ءبىز سوندا دا الماتىداعى تۋىسقانىمىزدى اۋرۋحاناعا جىبەردىك, ول بالانىڭ جانساقتاۋ بولىمىندە جاتقانىن ايتتى. سوندا كىم كىمدى الداپ وتىرعانى بەلگىسىز! اتا-ەنەم سول كۇنى تۇندە الماتىعا ۇشتى, - دەدى اقنيەت سۋيۋنگاليەۆا.