استانا. 15 قاڭتار. وزبەكستاننىڭ ءىس باسىنداعى پرەزيدەنتى يسلام كاريموۆ تاعى دا مەملەكەت باسشىلىعى ورىنتاعى ءۇشىن بولاتىن سايلاۋعا قاتىسادى. بۇل تۋرالى ras.kz حابارلادى.
وزبەكستاندا پرەزيدەنت سايلاۋى 2015 جىلعى 29 ناۋرىزدا وتەتىن بولىپ بەلگىلەنگەن.
76 جاستاعى ي.كاريموۆ پرەزيدەنتكە ۇمىتكەرلىككە سارسەنبى, 14 قاڭتار كۇنى وتكەن ليبەرال-دەموكراتيالىق پارتيانىڭ سەزى بارىسىندا ۇسىنىلدى. ول وسىلايشا الداعى سايلاۋداعى ەڭ العاشقى كانديدات بولىپ تىركەلدى.
بۇدان بۇرىن باسپاسوزدە يسلام كاريموۆتىڭ ىقتيمال ءىزباسارى رەتىندە ۆيتسە-پرەمەر رۋستام ازيموۆ پەن وزبەك قاۋىپسىزدىك قىزمەتىنىڭ باسشىسى رۋستام ينوياتوۆ ايتىلىپ جۇرگەن ەدى.
وزبەكستاندا پرەزيدەنت سايلاۋى ناۋقانى وتكەن جىلدىڭ 26 جەلتوقسانىندا باستالدى.
بۇل ەلدە پرەزيدەنت بەس جىلدىق مەرزىمگە سايلانادى.
وزبەكستان پرەزيدەنتتىگىنە جاستارى 30-دان اسقان, سايلاۋ الدىنداعى رەسپۋبليكا اۋماعىندا تۇرىپ كەلە جاتقان مەرزىمى 10 جىلدان كەم ەمەس ازاماتتار داۋىسقا تۇسە الادى. كانديداتتاردى ۇسىنۋ, مەملەكەت باسشىسىن سايلاۋ تۋرالى زاڭعا سايكەس, داۋىس بەرۋگە 65 كۇن قالعاننان 20 كۇن ىشىندە جۇرگىزىلەدى.
وزبەكستاندا مۇنىڭ الدىنداعى سايلاۋ 2007 جىلى ءوتىپ ەدى. سول جولى يسلام كاريموۆ ءۇشىنشى مەرزىمگە سايلانعان. ال وزبەكستان كونستيتۋتسياسى ءبىر ادامنىڭ قاتارىنان ەكى رەتتەن ارتىق مەملەكەت باسشىسى ورىنتاعىن يەمدەنۋىنە تىيىم سالادى. الايدا, ساياساتكەردىڭ جاقتاستارى سودان بەرگى ارالىقتا نەگىزگى زاڭعا ەكى رەت وزگەرىس ەنگىزىلۋىنە بايلانىستى (الدىمەن پرەزيدەنتتىك مەرزىم 7 جىلعا ۇزارتىلدى, سوسىن قايتادان 5 جىلعا ءتۇسىرىلدى) كاريموۆتىڭ بۇرىنعى ەكى رەتتىك پرەزيدەنتىگىن سىزىپ تاستاپ, وسىدان كەيىن قايتادان «نولدەن باستاتقىزدى».
يسلام-اكا ابدۋگانيەۆيچ كاريموۆ ءىس جۇزىندە وزبەكستان رەسپۋبليكاسىن 1989 جىلدان بەرى ۇزدىكسىز باسقارىپ كەلەدى. وسى جىلى ول وزبەكستان كسر كومپارتياسى ورتالىق كوميتەتىنىڭ ءبىرىنشى حاتشىسى بولىپ سايلاندى. 1991 جىلى ءبىرىنشى رەت وزبەكستان پرەزيدەنتى بولدى. ارادا ءتورت جىل وتكەننەن كەيىن كاريموۆتىڭ پرەزيدەنتتىك ۋاكىلەتتىلىگى رەفەرەندۋم جولىمەن 2000 جىلعا دەيىن سوزىلدى. ال 2000 جىلعى 9 جەلتوقساندا ەكىنشى مارتە پرەزيدەنت بولىپ سايلاندى.
ايدار ورىسباەۆ.
دەرەك: ras.kz.
سۋرەت: rbc.ru.