مەملەكەت باسشىسى قاسىم-جومارت توقاەۆ ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆتى قابىلدادى. پرەزيدەنتكە ۆەدومستۆونىڭ بيىل جىل باسىنان بەرى تەرروريزمگە جانە ءدىني ەكسترەميزمگە قارسى ءىس-قيمىل جونىندەگى جۇمىسىنىڭ نەگىزگى ناتيجەلەرى جانە الداعى كەزەڭدە قابىلداناتىن شارالار تۋرالى باياندالدى. قاسىم-جومارت توقاەۆقا وسى ۋاقىت ىشىندە ەكى لاڭكەستىك شابۋىلدىڭ جولى كەسىلگەنى تۋرالى ايتىلدى. ونىڭ بىرەۋى شەت مەملەكەتتە شەتەلدىك سەرىكتەستەرمەن بىرلەسىپ جاسالماق بولعان, دەپ جازادى Egemen.kz.
ۇلتتىق قاۋىپسىزدىك كوميتەتى تەرگەپ-تەكسەرگەن قىلمىستىق ىستەردىڭ نەگىزىندە راديكالدى ءدىني يدەولوگيانىڭ 26 جاقتاۋشىسى لاڭكەستىك جانە ەكسترەميستىك ارەكەتتەرى ءۇشىن سوتتالدى. تاعى 22 ادامعا قاتىستى سوتقا دەيىنگى تەرگەۋ امالدارى جالعاسىپ جاتىر.
ۇقك توراعاسىنىڭ مالىمەتى بويىنشا ەكسترەميستىك كوزقاراستارىنا بايلانىستى رەسپۋبليكاعا 139 شەتەلدىكتىڭ كىرۋىنە جول بەرىلمەگەن, 280-نەن استام شەتەلدىك ازامات قازاقستاننان شىعارىلعان. تىيىم سالىنعان ءدىني ادەبيەتتەردى ەلگە زاڭسىز اكەلۋگە قاتىستى 190-نان استام ارەكەتكە توسقاۋىل قويىلىپ, 19 شەتەلدىك جاۋاپقا تارتىلعان. زاڭسىز اينالىمداعى 237 اتىس قارۋى, 27 جارىلعىش قۇرىلعى, 4500-دەن استام وق-ءدارى جانە باسقا دا تەررور قۇرالدارى تاركىلەندى.
ەرمەك ساعىمباەۆ جىل باسىنان بەرى 340-تان استام تەرروريزمگە قارسى وقۋ-جاتتىعۋ جيىنى ۇيىمداستىرىلعانىن جەتكىزدى.
تەرروريزمگە قارسى كۇرەس شارالارىن كۇشەيتۋ اياسىندا ءىىم جانە ۇقك كۇشتەرى مەملەكەتتىك جانە وزگە دە نىساندارعا, ونىڭ ىشىندە حالىق كوپ جينالاتىن ورىندارعا 3400-گە جۋىق تەكسەرۋ جۇرگىزدى.
مەملەكەت باسشىسىنا ەكسترەميزم مەن تەرروريزمگە قارسى ءىس-قيمىل جۇيەسىن دامىتۋدىڭ 2023-2025 جىلدارعا ارنالعان كەشەندى جوسپارىنداعى وزگە دە شارالاردىڭ جۇزەگە اسىرىلۋ بارىسى تۋرالى مالىمەت بەرىلدى.
كەزدەسۋ سوڭىندا قاسىم-جومارت توقاەۆ تەرروريزمگە قارسى ءىس-قيمىل سالاسىنداعى جۇمىستاردى كۇشەيتۋ جونىندە بىرقاتار تاپسىرما بەردى.