شىمكەنتتە قما قىزمەتكەرلەرى زاڭسىز ماينەرلەردىڭ قىلمىستىق ارەكەتىن اشكەرەلەدى, دەپ حابارلايدى Egemen.kz.
قما مالىمەتىنشە, ءبىر توپ ادام 2023 جىلعى ءساۋىر مەن 2024 جىلعى اقپان ارالىعىندا جالپى سوماسى 100 ملن تەڭگەدەن استام ءىرى مولشەردە كىرىس الا وتىرىپ, كريپتوۆاليۋتا ءوندىرۋ بويىنشا استىرتىن ماينينگ فەرماسىن ۇيىمداستىرعان.
«تەرگەۋ بارىسىندا 1000-نان استام ASIC-تەردەن (بيتكوين ءوندىرۋ جابدىعى) تۇراتىن كريپتوۆاليۋتا وندىرۋگە ارنالعان ماينينگ فەرماسى, نوۋتبۋكتەر, بەينەتىركەگىشتەر, فلەش-تاسىمالداعىشتار, ۇيالى تەلەفوندار جانە قۇجاتتامالار تابىلىپ, تاركىلەندى. قازىر سوتقا دەيىنگى تەرگەۋ ءجۇرىپ جاتىر, ءتيىستى ساراپتامالار تاعايىندالدى», دەلىنگەن حابارلامادا.
ايتا كەتەيىك, بۇل سالاداعى زاڭسىز قىزمەت ەلدىڭ ەكونوميكالىق قاۋىپسىزدىگىنە نۇقسان كەلتىرىپ, بەلگىلى ءبىر تاۋەكەلدەردىڭ تۋىنداۋىنا الىپ كەلەدى.
قر كونستيتۋتسياسىنىڭ 77-بابىنىڭ 3-تارماعىنىڭ 1-تارماقشاسىنا جانە قر قىلمىستىق-پروتسەستىك كودەكسىنىڭ 19-بابىنىڭ 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى.