16 مامىردا ەلىمىزدىڭ 14 وبلىسىندا ۇبت باستالدى, ول 5 شىلدەگە دەيىن جالعاسادى. 4 كۇننىڭ قورىتىندىسى بويىنشا 7 مىڭنان استام تالاپكەر تەستىلەۋدەن ءوتتى. بۇل تۋرالى ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى, دەپ حابارلايدى Egemen.kz.
عىلىم جانە جوعارى ءبىلىم مينيسترلىگىنىڭ مالىمەتىنشە, 2024 جىلى مەكتەپ بىتىرۋشىلەر سانى 188 245 ادامدى قۇرايدى. ۇبت-عا تاپسىرىلعان وتىنىشتەردىڭ سانى 2 ارەكەتتى ەسەپكە العاندا 330 116 ادامدى قۇرايدى, ونىڭ 293 186-سى اعىمداعى جىلعى مەكتەپ تۇلەكتەرى, ونىڭ ىشىندە سۋ تاسقىنىنان زارداپ شەككەن 6 وبلىستان 59 799 ءوتىنىش بار.
«توتەنشە جاعداي جاريالانعان 6 وبلىستا (اقمولا, اقتوبە, اتىراۋ, باتىس قازاقستان, قوستاناي, سولتۇستىك قازاقستان) جاعدايدى ەسكەرە وتىرىپ, ۇبت وسى جىلدىڭ 25 مامىرى مەن 12 شىلدەسى ارالىعىندا وتەدى. بۇل وڭىرلەر بويىنشا دا وتىنىشتەردى قابىلداۋ 20 مامىرعا دەيىن ۇزارتىلدى», دەدى ساياسات نۇربەك.
سونىمەن قاتار ءمينيستردىڭ ايتۋىنشا, سۋ تاسقىنىنان زارداپ شەككەن 6 وبلىستىڭ مەكتەپ تۇلەكتەرىن قولداۋ ماقساتىندا جالپى مەملەكەتتىك ءبىلىم بەرۋ تاپسىرىسىنىڭ 20% (نەمەسە 12 528 گرانت) كۆوتا تۇرىندە گرانتتار ءبولۋ شارالارى جۇرگىزىلىپ جاتىر. ولاردىڭ تولىق قامتىلۋىن قامتاماسىز ەتىپ جانە وقۋدىڭ بارلىق باعىتتارى بويىنشا كونكۋرسقا قاتىسۋعا مۇمكىندىك بەرىلەدى.
قىرمىزى جۇماعاليقىزى,
ەۇۋ ستۋدەنتى