كەشە ۋكراينانىڭ قازاقستانداعى ۋاقىتشا سەنىمدى وكىلى يۋري لازەبنيك ارنايى بريفينگ وتكىزىپ, قازاقستان تاراپىنان ۋكرايناعا كورسەتىلگەن گۋمانيتارلىق كومەك تۋراسىندا ايتىپ بەردى.
«ءبىز قازاقستانداعى بۇقارالىق اقپارات قۇرالدارى ارقىلى ۋكرايناعا كورسەتىلگەن قولداۋ-كومەك ءۇشىن سىزدەردىڭ ەلدەرىڭىزگە, قازاق حالقىنا جانە, ارينە, قازاقستان باسشىلىعىنا, پرەزيدەنت نۇرسۇلتان نازارباەۆقا العىس بىلدىرگىمىز كەلەدى. بۇدان بۇرىن حابارلانعانىنداي, 10 قاڭتاردا لۋگانسك وبلىسىنىڭ اۋماعىنا گۋمانيتارلىق كومەك جەتكىزىلگەن بولاتىن. ول جەردە تۇرعىندارعا جالپى كولەمى 380 مىڭ اقش دوللارىن قۇرايتىن ازىق-ت ۇلىك تاپسىرىلدى. ازىق-ت ۇلىك ەت كونسەرۆىلەرىن, قانتتى, جارمانى, وسىمدىك مايىن, ياعني ۋكراينانىڭ انتيتەررورلىق وپەراتسيالار ورىن العان ايماعىندا تۇراتىن تۇرعىندارعا ەڭ قاجەتتى دەگەن دۇنيەلەردى قۇرايدى. ءبىز, بۇل ورايدا, اتالعان كومەكتى تاپسىرۋ ۇدەرىسى ۋكراينانىڭ زاڭناماسىنا جانە حالىقارالىق قۇقىقتىڭ بارلىق نورمالارىنا تولىقتاي سايكەس جۇزەگە اسقانى ءۇشىن قازاقستان باسشىلىعىنا ايرىقشا ريزاشىلىعىمىزدى جەتكىزگىمىز كەلەدى», دەدى يۋ.لازەبنيك ءوزىنىڭ بريفينگتە سويلەگەن سوزىندە.
ونىڭ ايتۋىنشا, قازاق جەرىنەن ماتەريالدىق, گۋمانيتارلىق كومەكتى جەتكىزۋ ءۇشىن ۋكراينانىڭ قازاقستانداعى ەلشىلىگىمەن جانە قازاقستاننىڭ ۋكرايناداعى ەلشىلىگىمەن تىعىز قارىم-قاتىناس ورناعان, بۇعان قوسا, بۇل ءىس-شاراعا لۋگانسك وبلىستىق اكىمشىلىگى مەن ۋكراينانىڭ توتەنشە جاعدايلار ءجونىندەگى مەملەكەتتىك قىزمەتى دە اتسالىسقان. وسىنىڭ ناتيجەسىندە, بۇل ۇدەرىس وتە جەدەل تۇردە جۇزەگە اسقان.
«وسى ورايدا, قازاقستان بۇكىلالەمدىك قوعامداستىققا ءوزىنىڭ جاۋاپكەرشىلىككە يە حالىقارالىق سەرىكتەس ەكەنىن جانە دوستىق نيەتتەگى ەلگە قاي كەزدە دە قولۇشىن سوزا الاتىنىن بايقاتتى. گۋمانيتارلىق كومەكتى جەتكىزۋ ۇدەرىسى, سونداي-اق, جوعارى دەڭگەيدەگى ۇنقاتىسۋدى جانداندىرۋ اۋانىندا ءوتتى. وزدەرىڭىز بىلەتىندەي, وتكەن جىلدىڭ 22 جەلتوقسانىندا قازاقستان پرەزيدەنتى نۇرسۇلتان نازارباەۆ ۋكرايناعا ساپارمەن بارعان بولاتىن. بۇل ساپار بارىسىندا قوس مەملەكەت تە قىزىعۋشىلىق تانىتىپ وتىرعان بارلىق سالالار بويىنشا ىنتىماقتاستىقتى ودان ءارى جانداندىرۋ ماسەلەلەرى بويىنشا ءتيىستى كەلىسىمدەرگە قول جەتكىزىلگەن ەدى. قازىرگى تاڭدا ۋكرايناعا كومىر جەتكىزۋ تۋراسىندا كەلىسسوزدەر جۇرۋدە. بۇل دا ماڭىزدى. سوندىقتان, قازىر ەكى ەل بۇل تۋرالى كەلىسىمگە كەلۋدە. بيىلعى جىلدىڭ ءبىرىنشى توقسانىندا ۋكراينا پرەزيدەنتى پەتر پوروشەنكونىڭ قازاقستانعا ساپارى جوسپارلانىپ وتىر. ساپاردىڭ الدىندا ەكونوميكالىق ىنتىماقتاستىق بويىنشا مەملەكەتارالىق كوميسسيانىڭ 12-ءشى وتىرىسى وتپەك. عارىشتى زەرتتەۋ سىندى ماسەلەلەر بويىنشا ەكىجاقتى ءارىپتەستىك دەڭگەيىندە ءىرى جوبالاردى ىسكە اسىرۋ دا قولعا الىنۋدا», دەدى قازاقستانداعى ۋاقىتشا سەنىمدى وكىل.
يۋ.لازەبنيك قازاقستاننىڭ ۋكرايناداعى جاعدايدى بەيبىت رەتكە كەلتىرۋدەگى رولىنە توقتالا كەلە, استانادا ۋكراينا, فرانتسيا, رەسەي پرەزيدەنتتەرىنىڭ جانە گەرمانيانىڭ فەدەرالدى كانتسلەرىنىڭ دەڭگەيىندە كەزدەسۋ وتكىزۋ جوسپارلانىپ وتىرعانىن ايتتى.
«قازاقستاندىق تاراپ قازىردىڭ وزىندە مۇنداي پىشىمدەگى كەزدەسۋدى ۇيىمداستىرۋعا دايىن ەكەندىگىن ءبىلدىردى. ەندى بۇل جيىننىڭ ءوتۋ ۋاقىتىن بەلگىلەپ, بەكىتۋ عانا قالدى. ماعان ۋكراينا پرەزيدەنتى ءالدەنەشە مارتە ايتقانداي, بۇل كەزدەسۋدى وتكىزۋدىڭ نەگىزگى ەرەجەسى وتكەن جىلدىڭ قىركۇيەك ايىنىڭ باسىندا قول جەتكىزىلگەن مينسك كەلىسسوزدەرىنىڭ تولىقتاي ورىندالۋىنا سۇيەنۋى كەرەك. مينسك ۇدەرىستەرى باستاماشىلارىنىڭ ءبىرى قازاقستان پرەزيدەنتى ەكەنى بەلگىلى. سوندىقتان كيەۆ نۇرسۇلتان نازارباەۆتىڭ مينسكىدە ۋاعدالاسىلعان كەلىسسوزدەردىڭ تولىقتاي ورىندالۋى قاجەت دەگەن ۇستانىمىن قۋاتتايدى. مەن, بۇل ورايدا, مينسك حاتتاماسىندا كورسەتىلگەن پۋنكتتەرگە نازار اۋدارعىم كەلەدى. بۇل رەسەيلىك تەلەارنالار ايرىقشا ماڭىز بەرىپ وتىرعانداي, تەك سوعىس ءورتىن وشىرۋگە جانە اسكەري كەپىلدەردى ايىرباستاۋعا عانا قاتىستى ەمەس, بۇل جەردە ماسەلە ۋكراينا اۋماعىنان رەسەيلىك بارلىق جالدامالى اسكەردى شىعارۋعا, سونداي-اق, رەسەي-ۋكراينا شەكاراسىنداعى باقىلاۋدى قايتا قالپىنا كەلتىرۋگە دە بايلانىستى بولىپ تۇر. بۇدان كەيىن ۋكراينا جوسپارىنا سايكەس, لۋگانسك پەن دونەتسكىدە ۋكراينا زاڭنامالارىنا ساي كەلەتىن وڭىرلىك سايلاۋلار وتكىزىلۋى كەرەك. ال كيەۆ بۇل سايلاۋلارعا قاتىسقان وكىلدەرمەن كەلىسسوزدەر جۇرگىزۋگە دايىن, دەدى ول ءسوز سوزىندە.
سونداي-اق, ول كەشە پەتر پوروشەنكو كيەۆ دونباسقا ەۋروپالىق وداقپەن ىنتىماقتاستىق ورناتۋ ءۇشىن دە, رەسەيمەن قارىم-قاتىناس جاساۋ ءۇشىن دە, تىلدىك رەجىم بويىنشا دا ايرىقشا قۇقىق بەرۋگە دايىن ەكەندىگىن جەتكىزگەندىگىن ايتتى.
«ياعني, بارلىق ءتيىستى قۇقىقتار بەرىلمەك. الايدا, بۇل ءۇشىن لۋگانسك, دونەتسك وبلىستارىنىڭ وكىلەتتىككە يە ازاماتتارى كەرەك. قازىرگى تاڭدا مۇنداي وكىلدەر رەسەيدىڭ ازاماتتارى بولىپ تۇر. ولاردىڭ باسىم كوپشىلىگى – باس بارلاۋ باسقارماسىنىڭ جانە باسقا دا ارنايى قىزمەتتەردىڭ وفيتسەرلەرى. ال مۇنداي وكىلدەرمەن قانداي كەلىسسوزدەر جۇرگىزىلۋى مۇمكىن», دەدى. يۋ.لازەبنيك. سونداي-اق, ول ۋكرايناعا ەۋروپا مەملەكەتتەرىنەن ماتەريالدىق جاعىنان قولداۋ تانىتىلعانىن, ال قازاقستان تمد ەلدەرىنىڭ ىشىندە عانا ەمەس, بۇرىنعى پوستكەڭەستىك كەڭىستىك ەلدەرى ىشىندە دە العاش بولىپ گۋمانيتارلىق كومەك كورسەتكەن مەملەكەت ەكەنىن اتاپ ءوتتى.
ءلايلا ەدىلقىزى,
«ەگەمەن قازاقستان».