بۇگىن مەملەكەتتىك كەڭەسشى ەرلان قاريننىڭ توراعالىعىمەن قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەستىڭ كەزەكتى وتىرىسى ءوتتى, دەپ جازادى Egemen.kz.
باسقوسۋدا كەڭەس باقىلاۋعا العان بىرقاتار ستراتەگيالىق جانە ساراپتامالىق قۇجاتتاردىڭ ازىرلەنۋ جانە جۇزەگە اسىرىلۋ بارىسى تالقىلاندى.
اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا پرەزيدەنت قاسىم-جومارت توقاەۆتىڭ بەرگەن تاپسىرماسىنا سايكەس ءتيىستى مەملەكەتتىك ورگاندار زاڭسىز ويىن بيزنەسى مەن لۋدومانياعا توسقاۋىل قويۋ ءۇشىن جۇيەلى جۇمىس جۇرگىزىپ جاتىر.
وتىرىستا لۋدومانياعا قارسى ءىس-قيمىل اياسىندا زاڭ شىعارۋ جانە ناقتى جۇمىستى ۇيلەستىرۋ قاجەت ەكەنى اتالىپ ءوتتى. پارلامەنت ءماجىلىسىنىڭ دەپۋتاتى, جاستار ساياساتى جونىندەگى كەڭەستىڭ مۇشەسى نارتاي ارالباي ۇلىنىڭ زاڭ جوباسىن دايىنداۋعا, تۋريزم جانە سپورت ۆيتسە-ءمينيسترى ميراس تولەباەۆتىڭ زاڭسىز ويىن بيزنەسى مەن لۋدومانياعا قارسى ءىس-قيمىل جونىندە كەشەندى جوسپار ازىرلەۋگە قاتىستى باياندامالارى تىڭدالدى. كەڭەس مۇشەلەرى مەملەكەتتىك ورگاندار مەن قوعامدىق ۇيىمداردىڭ جۇمىسىن دايەكتى جانە جۇيەلى تۇردە ۇيىمداستىرۋ جونىندە ۇسىنىستار بەردى.
سونىمەن قاتار جيىندا 2023-2029 جىلدارعا ارنالعان مەملەكەتتىك جاستار ساياساتى تۇجىرىمداماسىنا ەنگىزىلەتىن وزگەرىستەر مەن تولىقتىرۋلار تالقىلاندى.
بۇدان بولەك, باسقوسۋدا 2024 جىلعا ارنالعان «قازاقستان جاستارى» اتتى جىل سايىنعى ۇلتتىق باياندامانىڭ قۇرىلىمى قاراستىرىلدى.
ەرلان قارين كەزدەسۋدى قورىتىندىلاي كەلە, تىڭ وزگەرىستەردىڭ نەگىزگى قوزعاۋشى كۇشى جاستار ەكەنىنە نازار اۋداردى. سوندىقتان ەلىمىزدى دامىتۋ ءۇشىن قولعا الىنعان جالپىۇلتتىق جوبالاردى جۇزەگە اسىرۋعا ولاردىڭ بەلسەندى قاتىسۋى قاجەتتىگىن اتاپ ءوتتى.