ارماندارى – وليمپيادا

ازىرگە ەل قورجىنىنا ەڭ سوڭعى جولدامانى ۆەلوترەكتەن قازاقستان قۇراماسى سالدى. بۇل جولداما قول­دانىلماعان كۆوتالاردى قايتا ءبولۋ كەزىندە بۇيىردى. ەلىمىز كۆوتانى كەيريننەن العانىمەن, بۇل سپورتشىنىڭ سپرينتتە دە سىنعا تۇسۋىنە مۇمكىندىك بەرەدى. كۆوتا جەكەلەگەن سپورتشىعا ەمەس, كومانداعا بەرىلەتىنىن ايتا كەتكەن ءجون.

ۇستەل تەننيسى. بۇل سپورت تۇرىنەن 17-19 مامىر ارالىعىندا تاش­كەنتتە ورتالىق ازيا ايماق­تىق ىرىكتەۋ ءتۋرنيرى وتەدى. تۋرنير بارىسىندا وليمپيادا كۆوتاسى ساراپقا سالىنادى. جولداماعا ەلىمىز ساپىنان كيريلل گەراسي­مەنكو, الان كۇرمانعاليەۆ, سار­ۆينوز ميركاديروۆا, اناستاسيا لاۆروۆا تالاسادى. بۇگىنگى تاڭدا وقۋ-جاتتىعۋ جيىنىن اياقتاعان سپورت­شىلار تاشكەنتكە ۇشىپ كەتتى.

سپورتتىق گيمناستيكا. وزبەك­ستان استاناسى سپورتتىق گيمناستيكادان ليتسەنزيالىق ازيا چەمپيوناتىن قابىلدايدى. اتالعان سىنعا ۇلتتىق قۇرامانى باستاپ باراتىن باس باپكەر الەكساندر كيم ميلاد كاريمي, ناريمان قۇربانوۆ, ءىلياس ازيزوۆ, فارۋح نابيەۆ, دميتري پاتانين, دياس تويشىبەك سياقتى سپورتشىلارىمىزعا سەنىم ارتىپ وتىر. كوماندا ساپىندا كاريمي كوپسايىستان, قۇربانوۆ ات سناريادىنان وليمپيادا جولداماسىن الىپ قويعان. قالعان سپورتشىلار قۇرلىققا بولىنگەن ءبىر جولداماعا تالاسادى.

دزيۋدو. وسى سايىستان ابۋ-دابيدە وتەتىن الەم چەمپيوناتى وليمپيادا الدىنداعى ءىرى دودا بولماق. وليمپيا ويىندارىنا ءار سالماقتان ءبىر سپورتشىنىڭ عانا قاتىسۋىنا رۇقسات. سوندىقتان بۇل الەم بىرىنشىلىگىنىڭ ناتيجەلەرى باپكەرلەر قۇرامى مەن ۇلتتىق فەدەراتسيالاردىڭ دا جۇمىسىن جەڭىلدەتەتىنى انىق. ءبىزدىڭ كوماندادا ەرلەردەن 60, ايەلدەردەن 48 كگ سالماقتا ماسەلە شەشىلە قويعان جوق. ەرلەر قۇراماسىندا ءۇش سپورتشى قاجەتتى رەيتينگىلىك ۇپاي­لاردى ەنشىلەدى. ولار – ماع­جان شامشادين, ەلدوس سمە­توۆ, نۇرقانات سەرىكباەۆ. ال ايەل­دەر اراسىندا ابيبا ابۋ­جا­قىنوۆا مەن عاليا تىنباەۆا كوش باستاپ تۇر. جوعارىدا اتالعان سپورت­شىلاردىڭ ىشىنەن ماعجان شامشادين عانا الەم چەمپيوناتىنا قاتىسپايدى. باپكەرلەر سوڭعى Grand Slam تۋرنيرىندە جۇلدە العان ەلدوس سمەتوۆكە سەنىم ارتتى. ال ماعجان جاقىندا عانا جاراقاتىنا بايلانىستى ۇزىلىستەن ورالدى. سمەتوۆ بولسا الەم چەمپيونى اتانىپ, جەر جۇزىلىك جارىستا ەكى رەت قولا العان بالۋان. بىراق قازىرگى وليمپيادالىق تسيكل ول ءۇشىن اسا ءساتتى ءوتىپ جاتقان جوق. ەسكى جاراقاتتارى سىر بەرىپ, ءوزىنىڭ بار الەۋەتىن كورسەتە الار ەمەس. ساناۋلى كۇندە باستالاتىن الەم چەمپيوناتى ەلدوستىڭ قازىرگى بابىن بايقاتادى. سەبەبى اتالعان تۋرنير قورىتىندىسىنا قاراپ, ونىڭ پاريجگە بارۋ-بارماۋى بەلگىلى بولادى.

الەكساندر كيم,

سپورتتىق گيمناستيكادان قازاقستان قۇراماسىنىڭ باس باپكەرى:

– كوماندا ازيا چەمپيوناتىنا تولىق دايىن. بۇل سىنداعى باس­تى قارسىلاستارىمىز – سولتۇستىك كورەيا, وزبەكستان, ۆەتنام جانە قىتايلىق تايپەيدەن كەلەتىن كوپسايىسشىلار. ءبىزدىڭ سپورتشىلار ءبىرىنشى اۋىسىمدا باق سىنايدى. قىتايلىق تايپەي مەن وزبەكستان – كەشكى اۋىسىمدا. بۇل دا اسەرىن تيگىزەدى. دەسە دە, كەشەگى جاتتىعۋ كەزىندە كوماندا جاقسى كورىندى.

نۇربول سۇلەيمەنوۆ,

دزيۋدودان قازاقستان قۇراماسىنىڭ باس باپكەرى:

– سپورتشىلارىمىز مامىر ايىندا ءۇش ماڭىزدى جارىسقا قاتار دايىندالدى. ونىڭ الدىندا ازيا چەمپيوناتى, Grand Slam جارىستارى ناتيجەسىندە الەم چەمپيوناتىنا قاتىساتىن قۇرام جاساقتالدى. ءبىز ءۇش سالماقتا ەكى سپورتشىدان قويعاندىقتان, 90 كيلوعا دەيىنگى سالماقتاعى سپورتشىلار تەك ارالاس كوماندالىق جارىسقا قاتىسادى. ەسكەرتە كەتەتىنى, الەم چەمپيوناتىنا قاتىسۋعا دزيۋدوشىلار وليمپيادالىق رەيتينگتە توپ-100 تىزىمىندە بولۋ كەرەك. وكىنىشكە قاراي, جاس سپورتشىلارىمىز بۇل تىزىمگە ەندى عانا ەنىپ كەلەدى.

ەلميرا اليەۆا,

ۇستەل تەننيسىنەن قازاقستان قۇراماسىنىڭ باس باپكەرى:

– ءبىزدىڭ الدىمىزدا تورت­جىل­دىق دوداسىنا جولداما بەرەتىن جارىسقا بابىمىزدا بارىپ, ەرلەر مەن ايەلدەر اراسىندا ءبىر-بىردەن, جالپى ەسەبى ەكى جولداما الۋ مىندەتى تۇر. قازىرگى تاڭدا سپورتشىلارىمىز جاقسى دايىندىق وتكىزدى. قاڭتار ايىنان بەرى جوسپارلانعان تۋرنيرلەردىڭ بارىنە قاتىستىق. جاتتىعۋ جيىنىندا جەكەلەگەن قاتەلىكتەرمەن جۇمىس ىستەپ, ءاربىر تەننيسشىنىڭ ويىن مانەرىن جەتىلدىرۋگە تىرىستىق.