پرەزيدەنتكە «قازپوشتا» اكتسيونەرلىك قوعامىنىڭ بىلتىر اتقارعان قىزمەتىنىڭ ناتيجەسى جانە كومپانيانىڭ قازىرگى قارجىلىق جاعدايى جونىندە مالىمەت بەرىلدى. اسەل جاناسوۆانىڭ ايتۋىنشا, كومپانيا سوڭعى 5 جىلدا العاش رەت 2,4 ميلليارد تەڭگە كولەمىندە پايدا تاۋىپ, اكتسيونەرگە 1,5 ميلليارد تەڭگە ديۆيدەند تولەگەن. سالىق اۋدارىمدارى مەن باج الىمدارىنىڭ جالپى كولەمى 32,7 ميلليارد تەڭگەنى قۇرادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆقا بىلتىر «قازپوشتا» ارقىلى جەتكىزىلەتىن سالەمدەمەلەردىڭ سانى 35 پايىزعا كوبەيىپ, ولاردى ەل اۋماعىندا جەتكىزۋ جىلدامداعى ەكى ەسە ارتقانى تۋرالى باياندالدى.
مەملەكەت باسشىسىنا «قازپوشتا» اكتسيونەرلىك قوعامى مەن YTO Express Group كومپانياسى اراسىندا سەرىكتەستىك قاتىناس ورناعانى جايىندا ايتىلدى.
«قازپوشتا» الماتىدا اۋدانى شامامەن 40 مىڭ شارشى مەتر بولاتىن «ا» ساناتىنداعى جوعارى تەحنولوگيالىق قويما سالۋعا نيەتتى. نىسان ەۋرازيا كەڭىستىگىندە نەگىزگى ترانزيت تورابىنا اينالۋعا ءتيىس ءارى قىتايدان ەۋرووداق, ەۋرازيالىق ەكونوميكالىق وداق جانە ورتالىق ازيا باعىتتارى بويىنشا قازاقستاننىڭ جۇك وتكىزۋ الەۋەتىن ارتتىرۋعا ىقپال ەتەدى.
سونىمەن قاتار پرەزيدەنتكە وتاندىق كومپانيانىڭ ەل اۋماعىنداعى ينفراقۇرىلىمى مەن بولىمشەلەر جەلىسىنىڭ قازىرگى جاي-كۇيى تانىستىرىلدى.
كەزدەسۋ سوڭىندا قاسىم-جومارت توقاەۆ «قازپوشتا» اكتسيونەرلىك قوعامىنىڭ قارجىلىق جاعدايىن جاقسارتۋ جانە لوگيستيكالىق الەۋەتىن ارتتىرۋ جۇمىستارىن جالعاستىرۋدى تاپسىردى.