الماتى قالاسىندا ءوز ەلىمىزدە شىعارىلعان ەڭ العاشقى فاندومات پايدا بولدى. وسىلايشا, تەحنيكالىق رەجىمدە مەگاپوليستەگى پانفيلوۆ پەن تولە بي كوشەلەرىنىڭ قيىلىسىندا پلاستيكالىق بوتەلكەلەر مەن سۋسىنداردىڭ اليۋميني ىدىستارىن قابىلدايتىن العاشقى فاندومات ىسكە قوسىلدى. قۇندىق شيكىزات قاتارىنداعى تۇرمىستىق قالدىقتار مۇقيات سۇرىپتالعاننان كەيىن پايدالى تاۋارلار وندىرەتىن كاسىپورىندارعا ودان ءارى قاراي وڭدەۋگە جىبەرىلەدى.
فاندوماتتا بارلىق يننوۆاتسيالىق ەلەمەنت بار. ماسەلەن, ولاردىڭ ءبىرى – جاساندى ينتەللەكت پەن ماشينالىق وقىتۋ جۇيەسى, ول اليۋميني بانكىلەر مەن پلاستيكالىق بوتەلكەلەردىڭ شتريح-كودتارى ناشار باسىلسا نەمەسە قوراپقا دۇرىس ورناتىلماسا دا تانۋعا مۇمكىندىك بەرەدى. نەيروندىق جەلى تەحنولوگياسىن قولدانا وتىرىپ, فاندوماتتاعى كامەرا پلاستيكالىق بوتەلكەلەر مەن اليۋميني بانكىلەردىڭ ءارتۇرىن اۆتوماتتى تۇردە تانىپ, جىكتەيدى, مولشەرى مەن سالماعىن ولشەي الادى.
«بۇل وپتسيالار ءالى دە تولىقتىرىلا تۇسەدى, ءوندىرىس پەن تەحنولوگياسى جاقسارادى. قۇرىلعى تاۋلىك بويى جۇمىس ىستەيدى, سوندىقتان العاشقى فاندوماتتى پانفيلوۆ كوشەسىنە ورناتۋ جونىندە شەشىم قابىلداندى. جاقىن ارادا فاندوماتتار ارباتقا, مەدەۋ حقكو-سى مەن مەدەۋ مۇز ايدىنى ماڭىنا قويىلادى. ويتكەنى جازدا وسى ايماقتا ەنەرگەتيك سۋسىندارىنىڭ شاشىلعان پلاستيكالىق بوتەلكەلەرى مەن بانكالارى ءجيى كەزدەسەدى. جوبانىڭ 360 گرادۋس بويىنشا الەۋەتى زور. قايتا وڭدەلگەننەن كەيىن پايدالى ماتەريالعا اينالاتىن قوقىس ازايعان سايىن قالانى تازالاۋعا قاراجات پەن كۇش از جۇمسالىپ, ۇنەمدەلگەن اقشا ماڭىزدى ماسەلەلەرگە باعىتتالادى», دەدى الماتى قالاسى اكىمدىگىنىڭ «جاسىل الماتى» گربن جوبالىق كەڭسەسىنىڭ باسشىسى ەۆگەني مۇحامەدجانوۆ.
قازاقستاندا جاسالعان فاندوماتتى ىسكە قوسۋ راسىمىنە قالا اكىمىنىڭ ورىنباسارى الىشەر ابدىقادىروۆ قاتىسىپ, بۇل باستامانىڭ ەكولوگيالىق تيىمدىلىگى مەن رەسۋرستاردى ۇنەمدەۋ بارىسىنداعى ماڭىزدىلىعىنا توقتالىپ, جوباعا ات سالىسقان المالى اۋدانى اكىمدىگىنىڭ وكىلدەرىن اتاپ ءوتتى. قالا اكىمىنىڭ ورىنباسارى ارىقتاردان كۇن سايىن 60 تونناداي قوقىس شىعارىلسا, ونىڭ 30%-ى پلاستيكالىق بوتەلكەلەر مەن اليۋميني بانكالار ەكەنىن ايتادى.
جوبا مۇرىندىق بولعان ءارى نەگىزى ينۆەستور – «Freedom Holding Corp» كومپانياسى بۇل ءىستى قالا اكىمدىگىنىڭ جوبالىق كەڭسەسى, ەكولوگيا جانە قورشاعان ورتا باسقارماسىنىڭ قولداۋىمەن جۇزەگە اسىرىپ جاتىر.
ءوز ورنىن تاپقان العاشقى فاندوماتتى اۆتوماتتاندىرىلعان سالەمدەمەلەر قابىلداۋ پۋنكتتەرىن قۇرۋدا ايتارلىقتاي تاجىريبە جيناقتاعان جەرگىلىكتى «Tastamat» كومپانياسى شىعارادى. ال جوبا وپەراتورى – قازاقستاننىڭ 9 قالاسىنداعى جاسىل كەڭسە جوباسى شەڭبەرىندە بولەك جينالعان تۇرمىستىق قالدىقتاردى شىعارۋ, قايتا وڭدەۋگە جىبەرۋ, ماماندار دايارلاۋ قىزمەتىن ۇسىناتىن «EMCO Network» كومپانياسى.
وسىناۋ يننوۆاتسيالىق قۇرىلعىنىڭ بىرەگەيلىگى سوندا, قايتا وڭدەلگەن ماتەريالدان جەرگىلىكتى ساتۋشىلاردان ساتىپ الىنعان مەتالل مەن قاڭىلتىر مەتالدى قابىلداۋ پۋنكتىنەن الىنعان تەمىردەن جينالىپ, قۇراستىرىلعان.
ال قاراپايىم حالىق ءۇشىن فاندوماتتىڭ ارتىقشىلىعى – فريدوم بانك كارتاسىنا فاندومات كومەگىمەن اقشاسىن الىپ ياكي قاراجاتتى قايىرىمدىلىق ماقساتتارعا جىبەرە الادى.
ءوز كەزەگىندە ماڭىزدى باستاماعا مۇرىندىق بولىپ وتىرعان «CEO Freedom Holding Corp» – وكىلى تيمۋر تۋرلوۆ: «جاقىن ارادا الماتى مەن استانانىڭ بارلىق كورىكتى جەرىندە وسىنداي 100 فاندومات پايدا بولادى. بۇل جوبامەن ءبىز قوقىستى بولەك جيناۋعا ارنالعان قۇرال جاساپ قانا قويماي, ونىڭ اۋقىمىن كەڭەيتۋگە, ياعني ەكولوگيالىق مادەنيەت پەن ادەت قالىپتاستىرۋدى, قالدىقتاردى ازايتۋ, پارىقتى تۇتىنۋ, اينالىمداعى ەكونوميكاعا كوشۋدى كوزدەپ وتىرمىز», دەيدى.
الماتى