مەملەكەت باسشىسىنىڭ «نۇرلى جول – بولاشاققا باستار جول» اتتى قازاقستان حالقىنا ارناعان جولداۋىندا مەملەكەتتىك ساياساتتى جۇزەگە اسىرۋدىڭ ماڭىزدى باعىتتارىنىڭ ءبىرى حالىقتىڭ بارلىق توپتارىن بىلىممەن قامتۋ بولىپ تابىلاتىندىعى اتاپ كورسەتىلگەن. وسىعان بايلانىستى نۇرسۇلتان نازارباەۆ ءۇش اۋىسىمدىق وقۋدى جويۋ, مەكتەپكە دەيىنگى مەكەمەلەردە كەزەك ماسەلەسىن شەشۋ, سونىمەن قاتار, كاسىپتىك-تەحنيكالىق ءبىلىم جۇيەسىن دامىتۋ مىندەتتەرىن العا قويدى. ەلباسىنىڭ بۇل كەشەندى مىندەتتەرىن ءىس جۇزىنە اسىرۋ ماقساتىندا ەلوردانىڭ ءبىلىم بەرۋ جۇيەسى بەلسەندىلىك تانىتۋدا. كەشە استانا قالاسىنىڭ اكىمى ادىلبەك جاقسىبەكوۆ كوشپەلى كەڭەس وتكىزىپ, ءبىلىم مەكەمەلەرىنىڭ جۇمىسىمەن تانىستى. قالا باسشىسى وقۋشىلار سارايىندا, سال اۋرۋىنا شالدىققان بالالارعا ارنالعان №64 «اسىل بوبەك» بالاباقشاسىندا, №6 گيمنازيادا, استانا قالاسىنىڭ كاسىپتىك-تەحنيكالىق كوللەدجىندە بولدى. ەلورداداعى ساۋلەتتى عيماراتتاردىڭ ءبىرى – وقۋشىلار سارايى 2011 جىلى جەلتوقساندا ەلباسىنىڭ تاپسىرماسىمەن سالىندى. قازىرگى كەزدە وندا 9 مىڭنان استام بالانى قامتيتىن 109 ۇيىرمە جۇمىس ىستەيدى. مۇندا جاس جەتكىنشەكتەردىڭ شىعارماشىلىق جانە عىلىم-بىلىمدەگى الەۋەتىن دامىتۋ ءۇشىن بالالار مەن جاسوسپىرىمدەرگە ارنالعان ۇلتتىق ينتەراكتيۆتى پارك اشىلىپ, عىلىم, تەحنيكا, سپورت جانە ونەردىڭ بارلىق باعىتتارى بويىنشا ينتەراكتيۆتى ستەندتەر مەن ەكسپوناتتاردىڭ ۇلكەن كەشەنى ۇسىنىلعان. وقۋشىلار سارايىنىڭ جانىنان اشىلعان جاستار تەاترى ەلىمىزدەگى ماڭدايالدى تەاترلاردىڭ ءبىرى. مۇندا جۇمىسقا ۇزدىك جاس ارتىستەر مەن رەجيسسەرلەر تارتىلعان. پارك استانا قالاسىنىڭ تۇرعىندارى مەن قوناقتارىنا, وقۋشىلارعا عىلىمي جانە مادەني تانىمدارعا نەگىزدەلگەن قىزىقتى ءبىلىم تاجىريبەسىن ۇسىنادى, سونىمەن قاتار, جاستاردىڭ عىلىمعا, جاڭا نارسەلەردى زەرتتەۋگە, سپورتپەن شۇعىلدانۋعا جانە سالاماتتى ءومىر سالتىن ۇستانۋعا دەگەن قىزىعۋشىلىعىن ارتتىرادى. ادىلبەك جاقسىبەكوۆ مەكەمە باسشىسىنا ۇيىرمەلەردىڭ جانە سەكتسيالاردىڭ قولجەتىمدىلىگىنە, بالالاردىڭ دەمالىستارىن قىزىقتى وتكىزۋلەرىنە نازار اۋدارۋدى تاپسىردى, سونداي-اق, اتا-انالاردىڭ بالالارىن سەكتسيا مەن ۇيىرمەلەرگە جازۋ كەزىندە ەشقانداي قيىندىقتارعا تاپ بولماۋى ءتيىس ەكەندىگىن ەسكەرتتى. قالا اكىمى جاڭادان اشىلعان №64 بالاباقشادا بولىپ, ارنايى جابدىقتالعان مەديتسينالىق كابينەتتە وتكىزىلەتىن ەمدەۋ-وڭالتۋ جانە ساۋىقتىرۋ شارالارىمەن تانىستى. №64 مامانداندىرىلعان بالاباقشا 2012 جىلى اشىلعان, قازىرگى كەزدە وندا سال اۋرۋىنا شالدىققان 164 بالا وقيدى. مەكەمەدە لوگوپەدتەر مەن دەفەكتولوگ ماماندىعىن مەڭگەرگەن تاربيەشىلەرمەن قوسا, پەدياتر, فيزيوتەراپەۆت, ورتوپەد جانە باسقا بىلىكتى دارىگەرلەر جۇمىس ىستەيدى. بالاباقشادا مۋزىكالىق جانە سپورت زالدارى, ارنايى ترەناجەر زالى, سەنسورلىق بولمە, كينوزال مەن ەتنوگرافيالىق مۇراجاي بار. ءبىلىم مەكەمەلەرىن ارالاۋ بارىسىندا ەلوردا اكىمى قالالىق كاسىپتىك-تەحنيكالىق كوللەدجدە بولدى. بۇل ءبىلىم مەكەمەسى 2009 جىلى سالىنعان, قازىرگى كەزدە وندا 261 ستۋدەنت وقىپ ءجۇر. كوللەدج قۇرىلىس جانە تەحنيكالىق سالانىڭ ماماندارىن دايارلايدى, مەكەمە بازاسىندا جالپى اۋدانى 1200 شارشى مەتردى قۇرايتىن 24 وقۋ-وندىرىستىك شەبەرحانا جۇمىس ىستەيدى. سونىمەن قاتار, ادىلبەك جاقسىبەكوۆ №6 گيمنازيادا بولدى. بۇل وقۋ ورنىندا 1289 وقۋشى ءبىلىم الادى. مۇندا «اقىلدى مەكتەپ» جوباسى اياسىندا تۇراقتى باقىلاۋ جۇرگىزىلەدى, 30-عا جۋىق بەينەكامەرا ورناتىلعان. كوشپەلى كەڭەس بارىسىندا استانا اكىمى قالالىق ءبىلىم باسقارماسىنىڭ باسشىسى ەلميرا سۋحانبەرديەۆا باستاعان ماماندارعا ءبىلىم مەكەمەلەرىنىڭ ينفراقۇرىلىمىن جانە ءبىلىم بەرۋ ساپاسىن جاقسارتۋ جونىندەگى ماسەلەلەردى نازاردا ۇستاۋدى تاپسىردى. اكىم بارلىق ءبىلىم بەرۋ مەكەمەلەرىندە بالالاردى تاماقتاندىرۋدىڭ ساپاسىنا دا نازار اۋداردى. ءا.جاقسىبەكوۆ بالاباقشالاردا ورىنداردىڭ جەتىسپەۋشىلىگى ماسەلەسىن شەشۋ ءۇشىن مەملەكەتتىك-جەكە مەنشىك ارىپتەستىك سالاسىندا جۇمىستاردى كۇشەيتۋدى, سونداي-اق, اعىمداعى جىلى ورتا مەكتەپتەردە ءۇش اۋىسىمدىق وقۋدى جويۋدى, وسىلايشا, مەكتەپتەردىڭ شامادان تىس تولىق بولۋىن جويۋدى تاپسىردى. جىلقىباي جاعىپار ۇلى, «ەگەمەن قازاقستان».