اباي اتىنداعى قازاق ۇلتتىق ۋنيۆەرسيتەتىندە «مانساپ» ورتالىعىنىڭ ۇيىمداستىرۋىمەن بوس ورىندار جارمەڭكەسى ءوتتى, دەپ جازادى Egemen.kz.
جۇمىس بەرۋشىلەر مەن ءبىتىرۋشى تۇلەكتەر اراسىندا ەركىن ديالوگ قالىپتاستىرۋ – ۋنيۆەرسيتەتتە وتەتىن ءداستۇرلى شارانىڭ نەگىزگى ماقساتى. ەڭبەك نارىعىنا ساراپتاما جاساۋ ارقىلى, زامان تالابىنا ساي مامان دايارلاۋدى ۇستانىپ وتىرعان ۋنيۆەرسيتەت تۇلەكتەرىنىڭ بۇگىندە 95 پايىزى جۇمىسپەن قامتىلىپ, ءوز سالاسىندا جەمىستى ەڭبەك ەتىپ ءجۇر.
جارمەڭكەدە ۋنيۆەرسيتەتتىڭ اكادەميالىق قىزمەت جونىندەگى پرورەكتورى بانۋ ناربەكوۆا جۇمىس بەرۋشىلەرگە العىسىن ءبىلدىرىپ, تۇلەكتەردى جۇمىسپەن قامتۋعا ارنالعان جوبالار تۋرالى باياندادى. شارادا الماتى قالاسى, الماتى وبلىسىمەن قاتار رەسپۋبليكانىڭ شالعاي ايماقتارىنان كەلگەن جۇمىس بەرۋشىلەر دە قاتىسىپ, ءوز مەكەمەلەرىن تانىستىردى.
اكادەميالىق ماسەلەلەر جونىندەگى دەپارتامەنت ديرەكتورى حايرۋللا جانبەكوۆ جۇمىس بەرۋشىلەرگە ۋنيۆەرسيتەت جايىندا جانە تۇلەكتەرگە قاتىستى بىرقاتار ماڭىزدى دەرەكتەردى ايتىپ بەردى.
جارمەڭكەگە بۇل جولى 135-تەن استام مەكەمە قاتىستى. ولاردىڭ قاتارىندا ورتا ءبىلىم, مەكتەپكە دەيىنگى ءبىلىم, جەكەمەنشىك ءبىلىم بەرۋ ۇيىمدارى, وندىرىستىك جانە ساتۋمەن اينالىساتىن كومپانيالار بار. ءىس-شاراعا قاتىسقان جۇمىس بەرۋشىلەر تاراپىنان 579 بوس جۇمىس ورنى ۇسىنىلدى. بۇعان قوسا ىنتىماقتاستىق بايلانىستار اياسىندا اباي ۋنيۆەرسيتەتىنىڭ ءبىتىرۋشى تۇلەكتەرىنە رەسپۋبليكانىڭ تۇكپىر-تۇكپىرىنەن 1211 بوس جۇمىس ورىندارىنان سۇرانىس حات تۇسكەن بولاتىن. جارمەڭكەگە كەلگەن مەكەمەلەر تۇلەكتەرمەن پىكىرلەسىپ, سۇراقتارعا جاۋاپ بەردى.