«تازا قازاقستان» رەسپۋبليكالىق ەكولوگيالىق اكتسياسى اياسىندا الماتى وبلىسىندا «ونەگەلى ۇرپاق» اپتالىعى ءوتىپ جاتىر, ول ەكولوگيالىق جاعدايدى جاقسارتىپ قانا قويماي, اعا بۋىن – ارداگەرلەردى دە قولداۋعا ارنالعان.
اكتسيا اياسىندا مىڭنان استام ارداگەرلەر مەن قارت تۇرعىنداردىڭ ۇيلەرىن اباتتاندىرىپ, تازارتۋ جۇمىستارىنا ەرىكتىلەر مەن جاستار كومەكتەسىپ, قىرۋار ءىس تىندىردى. سولاردىڭ اراسىندا ىلە اۋدانىنىڭ اقساقالدارى سۇلەيمەن جۇمابەكوۆ پەن ۆلاديمير ۋدوۆيكتىڭ ۇيلەرىنىڭ اۋماعىنا وبلىس اكىمىنىڭ قاتىسۋىمەن جەمىس اعاشتارى وتىرعىزىلدى.
«بىرلىك كۇنى ەكولوگيالىق اكتسيا اياسىندا ءبىز ولكەمىزدى كوگالداندىرۋ جانە اباتتاندىرۋ جۇمىستارىن جالعاستىرىپ جاتىرمىز. اعا ۇرپاقتى قۇرمەتتەۋ – ءار ۇلت ءداستۇرىنىڭ اجىراماس بولىگى. ءبىز وتىرعىزعان الما اعاشتارى جايقالىپ ءوسىپ, جازدا سايالاپ, كۇزدە ءدامدى جەمىسىن كورۋلەرىڭىزدى تىلەيمىن», دەپ اتاپ ءوتتى ءوڭىر باسشىسى مارات سۇلتانعازيەۆ.
بىرلىك كۇنى ايماقتى كوگالداندىرۋ جانە اباتتاندىرۋ جۇمىستارىندا تۇرعىندار اۋىزبىرشىلىك تانىتىپ, بىرلىكتەرىن بەكەمدەي ءتۇستى.
ايتا كەتەيىك, «ونەگەلى ۇرپاق» اكتسياسىنا الماتى وبلىسىنىڭ 5 مىڭ ەرىكتىسى قارتتاردىڭ ۇيلەرىن رەتكە كەلتىرىپ, سونداي-اق ولاردىڭ اۋلالارىنا اباتتاندىرۋ جۇمىستارىن جۇرگىزەدى. اتالعان ءىس-شارالار ءوڭىردىڭ بارلىق تۇرعىنى ءۇشىن جايلى جانە تازا ورتا قۇرۋعا باعىتتالعان.
الماتى وبلىسى