اقىندار مەن باتىرلار ەلى – جامبىل اۋدانى تۇرعىندارىمەن كەزدەسكەن الماتى وبلىسىنىڭ اكىمى مارات سۇلتانعازيەۆ «تازا قازاقستان» جالپىۇلتتىق ەكولوگيالىق اكتسياسى اياسىندا ۇيىمداستىرىلعان ء«وز اعاشىڭدى ءوسىر» اتتى يگى ءىس-شاراعا قاتىستى.
ساپار بارىسىندا اۋدانداعى بىرقاتار الەۋمەتتىك نىساندى ارالاعان ءوڭىر باسشىسى ۇزىناعاش اۋىلىنداعى №1 مەكتەپ-ليتسەيگە ارنايى ات باسىن بۇرىپ, مەكتەپ وقۋشىلارىمەن بىرگە اعاش كوشەتتەرىن وتىرعىزىپ, كوپكە ۇلگى بولدى.
«بۇگىن «جاسىل ايماق» باعىتى بويىنشا مەكتەپ وقۋشىلارى مەن ۇجىمدارىنىڭ باستاماسىمەن وڭىرىمىزدە ء«وز اعاشىڭدى ءوسىر» اكتسياسى ۇيىمداستىرىلىپ وتىر. وعان ءبىلىم وردالارىنداعى 340 مىڭنان اسا وقۋشىنىڭ ءبىر كىسىدەي قاتىسۋى مۇنىڭ جالپى بۇقارالىق سيپاتىن كورسەتتى. وسى ارقىلى ءبىز پرەزيدەنتىمىزدىڭ ورمان القابىندا 2 ميلليارد, ەلدى مەكەندەردە 15 ميلليون اعاش وتىرعىزۋ بويىنشا تاپسىرماسىن ورىنداۋعا ءوز ۇلەسىمىزدى قوسىپ وتىرمىز. بۇل اكتسيانىڭ تاربيەلىك ءمانى وتە جوعارى. اتقارىلعان جۇمىستار تۋىپ-وسكەن جەرىمىزدى, ءوز ولكەمىزدى كوگالداندىرۋمەن قاتار, جاسىل جەلەككە وراۋعا مۇمكىندىك بەرەدى. بۇعان قوسا مۇنداي يگى ءىس-شارالار ءبىزدىڭ اۋىزبىرشىلىگىمىزدى ايقىنداپ, ەلدىگىمىزدى كورسەتەرى انىق. ەندەشە, بارلىق اتسالىسقان جەرلەستەرىمىز بەن بالدىرعاندارىمىزعا العىسىمدى بىلدىرەمىن», دەدى مارات ەلەۋسىز ۇلى.
وسى كۇنى وبلىس ورتالىعى قوناەۆ قالاسىندا «جاسىل ايماق» اكتسياسى اياسىندا 14 مەكتەپتەن 13 مىڭ وقۋشى ءبىر مەزەتتە اعاش تۇقىمىن ەگۋ راسىمىنە بەلسەندى تۇردە قاتىسقانىن اتاۋ ارتىق ەتپەس.
جالپى, «جاسىل ايماق» اپتالىعىندا قالا بويىنشا 1 500 ءتۇپ جاسىل جەلەك وتىرعىزۋ جوسپارلانعان.
الماتى وبلىسى