وتكەن جىل سوڭىندا سىرداريا اۋدانىندا مەشىت اشىلدى. يماندىلىق ءۇيىنىڭ اشىلۋىنا وبلىس اكىمى ق.كوشەرباەۆ جانە اۋدان تۇرعىندارى قاتىستى.
تاۋەلسىزدىك العان جىلدار ىشىندە ايماعىمىزدا ءدىن سالاسىندا دا ۇلكەن جۇمىستار اتقارىلدى. جاڭادان مەشىتتەر تۇرعىزىلىپ, يسلام ءدىنىن وقىتاتىن ماماندار دايارلاندى. بۇل جۇمىستار ءالى دە ءوز جالعاسىن تابۋدا. سالتاناتتى تۇردە اشىلعان 200 ورىندىق اۋداندىق مەشىتتە الدىمەن ارۋاقتارعا قۇران باعىشتالىپ, اقساقالدار باتاسىن بەردى.
– تاۋەلسىزدىك العاننان كەيىن ەلباسىمىز ءاربىر ازاماتقا ءوزىنىڭ عازيز ءدىنىن ۇستانۋىنا جاعداي جاسادى. سونىڭ ارقاسىندا, ەلىمىزدە بۇگىنگە دەيىن 2500-گە جۋىق مەشىت اشىلدى. وسىنىڭ بارلىعى ەلىمىزدىڭ بەرەكە-بىرلىگىن ارتتىراتىن جاعداي. ەلىمىز رۋحانياتىن دامىتىپ جاتقان بۇگىنگى ساتتە بۇل مەشىت ەلدى بەرەكە-بىرلىككە شاقىراتىن يماندىلىق ءۇيى, تاماشا قۇت قانا بولسىن دەپ تىلەيمىن, – دەدى وبلىس اكىمى ق.كوشەرباەۆ.
مەشىتتىڭ جانىندا 40 ورىنعا ارنالعان مەدرەسە بار. بۇل جاستاردىڭ ءدىني ساۋاتىن اشۋعا ۇلكەن مۇمكىندىك بەرەدى. سونداي-اق, اس بەرۋگە ارنالعان 200 ورىندىق اسحاناسى تۇرعىندار ءۇشىن قىزمەت ەتەتىن بولادى.