قالىڭ قازاققا «الاكولدىڭ اتىمتاي جومارتى» اتانعان بەلگىلى كاسىپكەر باۋىرجان وسپانوۆتىڭ ارقاسىندا العاش رەت شالعايداعى ەلدى مەكەندە دارىندى بالالارعا ارنالعان جاراتىلىستانۋ باعىتىندعى پاندەردى تەرەڭدەتىپ وقىتاتىن ليتسەي-مەكتەبى اشىلعان بولاتىن. الماتى وبلىسى الاكول اۋدانىنداعى جىلاندى اۋىلىنداعى بۇل مەكتەپ قازىر مەتسەنات ازاماتتىڭ ارقاسىندا زامان تالابىنا ساي, تالاپتى بالالارعا جاقسى ءبىلىم بەرۋدە. جىلاندى اۋىلىنىڭ بۇگىنگى تىرلىگى قالاداعىلاردان كەم ەمەس.
ەلدى مەكەننىڭ سىرتقى كەلبەتى عانا ءساندى ەمەس, ءىشى دە ءماندى. مادەنيەت سارايى, سپورت مەكتەبى جانە تۇرعىندار مەن جاستارعا قاجەتتى باسقا دا الەۋمەتتىك-مادەني نىساندارى بار. كۇنى كەشە عانا ءتاي-ءتاي باسىپ, تۇساۋىن كەسكەن جىلاندى مەكتەبىنىڭ وقۋشىلارى كۇزگى دەمالىس كەزىندەگى اۋدانارالىق جارىستا جوعارعى جەتىستىككە قول جەتكىزىپ, ءبىرىنشى ورىندى يەمدەندى.
ايتقانداي, وسى جىلاندى اۋىلىنا قوناققا كەلگەن الماتى قالاسىنىڭ №178 ليتسەيىنىڭ وقۋشىسى اياجان تالعات ءوز ءبىلىمىن سىناپ كورۋ ماقساتىندا جارىسقا قوناق رەتىندە قاتىسىپ ەڭ جوعارى ۇپاي جيناپ ەرەكشە ىلتيپاتقا يە بولدى. اياجان تالعاتتى جاراتىلىستانۋ باعىتىنداعى پاندەر بويىنشا كورسەتكەن جوعارعى ناتيجەسى ءۇشىن الاكول اۋداندىق اكىمدىگى العىس حاتپەن ماراپاتتادى.
الماتىدان بارعان اياجان تالعاتتىڭ وسى جولعى ولجاسى جايدان-جاي ەمەس. جەڭىمپاز بالا ءبىلىم الىپ جۇرگەن الماتى قالاسىنداعى فيزيكا-ماتەماتيكا پاندەرىن تەرەڭدەتە وقىتاتىن №178 ليتسەي – جاقسى جەتىستىكتەرىمەن ماقتالىپ جۇرگەن ءبىلىم ورداسى. رەسپۋبليكالىق بايقاۋلاردا, عىلىمي جوبالاردىڭ جارىستارىندا, ءتۇرلى مادەني شارالاردا الدىڭعى قاتاردان تابىلىپ جۇرگەن قالاداعى ماڭدايالدى ءبىلىم مەكەمەلەرىنىڭ ءبىرى. وتكەن وقۋ جىلىندا وسى ءبىلىم ۇياسىن بىتىرگەن 109 تۇلەكتىڭ ىشىندە 22 حالىقارالىق عىلىمي جوبالار جارىستارىنىڭ, حالىقارالىق كونكۋرستاردىڭ قاتىسۋشىلارى مەن جەڭىمپازدارى, 22 «التىن بەلگى» يەگەرى, 15 ەرەكشە ۇلگىدەگى اتتەستات يەگەرلەرى وزدەرىنە ارتقان سەنىمدى اقتاي ءبىلدى.
سوڭعى وقۋ جىلىندا بۇكىل رەسپۋبليكا بويىنشا ءبىرىنشى بولىپ ەڭ جوعارى بالل جيناعان دا وسى مەكتەپتىڭ تۇلەگى ايعانىم ءابدىجاپار 125 بالل جيناپ, مەكتەبىنىڭ دە, اتا-اناسىنىڭ دا, ۇستازدارىنىڭ دا مەرەيىن تاسىتقان ەدى. اياجان تالعات تا قازىر مەكتەپتەگى «التىن بەلگىدەن» ۇمىتكەر وقۋشىلاردىڭ ءبىرى. ول ءوزىنىڭ شىعارماشىل, ۇشقىر ويلى جانە ەڭ باستىسى, ءوز ءبىلىمىن ىسكە اسىراتىن تۇلعا – دارىندى وقۋشى ەكەنىن دالەلدەدى.
ايناش ەسالي,
«ەگەمەن قازاقستان».
الماتى.