«بارمىسىڭ, باۋىرىم؟» حابارىنىڭ رەداكتسياسى جانىبەك ساۆەلەۆتىڭ وقيعاسىنا بايلانىستى سوڭعى جاڭالىقتاردى ءبولىستى. باعدارلاما اۆتورى قىمبات دوسجان جانىبەكتىڭ اسىراپ العان اناسى ۆالەريمەن تۇسىرگەن سۇحبات-ۆيدەوسىنان كەيىن جەلى قولدانۋشىلارى تاراپىنان سۇراقتار جيىلەپ كەتكەنىن ايتتى, دەپ جازادى Egemen.kz.
جەلى قولدانۋشىلارى وسى جازبادان كەيىن «اقشا العان ادام, ايەلدىڭ ەسىمى, ونىڭ نەمەن اينالىساتىنى, جاسى بەلگىلى ەكەن, وندا نەگە جانىبەكتىڭ اناسى تابىلماي جاتىر» دەگەن مازمۇنداعى ساۋالدارىن قارشا بوراتقان.
قىمبات دوسجان بۇل مالىمەتتەر وسى جىلدىڭ باسىندا, 7 قاڭتاردا انىق بولعانىن ايتتى. رەداكتسيا مۇنداي اقپاراتتى جانىبەكتى اسىراپ العان ۆالەريدەن بىلگەن. قازىر وقيعاعا قاتىستى قىلمىستىق ءىستى ارقالىق وبلىستىق پوليتسيا دەپارتامەنتى تەرگەپ جاتىر. سايكەسىنشە, ۆالەريدەن اقشا العان ايەل دە تەرگەپ-تەكسەرىلىپ جاتىر. جۋرناليست تەرگەۋ مۇددەسىنە ساي باسقا مالىمەتتى جاريالاۋعا قۇقى جوق ەكەنىن ايتتى.
«ول ايەل 2004 جىلى اقشا العان كەزدە ارقالىقتا جۇمىس ىستەگەن. الايدا بارلىقتارىڭىز ويلاعانداي پەرزانتحانادا نە بالالار ۇيىندە جۇمىس ىستەمەگەن. ءتىل بىلەتىندىكتەن اۋدارماشى بولعان. 12 مىڭ دووللاردى قولىنان ساناپ العاندا جانىبەكتى اسىراپ العان اناسىنا ء«سىز از بەرىپ تۇرسىز, امەريكالىقتار ۇل بالاعا 20 مىڭ دوللار بەرەدى» دەپ ايتقانىن ۆالەريدەن ەستىدىك», دەدى قىمبات دوسجان.