ەسكى عاسىر ديدارىن ەستەلىكتەن عانا تانيتىن ءبىزدىڭ بۋىنعا فوتو-جادىگەرلەر – تاپتىرماس ولجا. اسىرەسە ادەبيەت الىپتارىنىڭ كەسكىن-كەلبەتى – شىعارماسىنان عانا شىرامىتاتىن وقىرمان قاۋىمعا قۇندى قازىنا. سول قازىنانىڭ ءبىر پاراسىن قوعام بەلسەندىسى عابيدەن جاكەي ۇلەستىردى. جەكە پاراقشاسىنا جاريالاعان ءبىر توپ قالامگەردىڭ سۋرەتى جەلى قولدانۋشىلارىنىڭ ىستىق ىقىلاسىنا بولەنىپ جاتىر. ايتۋىنشا, فوتو-ءراسىم عابيت مۇسىرەپوۆتىڭ 75 جىلدىق مەرەيتويىندا تۇسىرىلگەن.
قالامگەرلەر شوعىرىنان باۋىرجان مومىش ۇلى, ساپارعالي بەگالين, قاليجان بەكحوجين, مۇحامەتجان قاراتاەۆ, ءابدىلدا تاجىباەۆ, ءابۋ سارسەنباەۆ, سىرباي ماۋلەنوۆ, ساعي جيەنباەۆ, ءانۋار ءالىمجانوۆ, شەرحان مۇرتازا جانە باسقا جاقسى-جايساڭداردىڭ بەينەسىن تانۋعا بولادى. جازۋشىلار وداعىنىڭ فويەسىندە ءيىن تىرەسىپ تۇرعان جازۋشىلار ساۋلەتتى سارايدىڭ سالتاناتىن ودان سايىن ارتتىرىپ تۇرعانداي. سونىمەن قاتار كوريفەيلەردىڭ الدىندا مالداس قۇرىپ وتىرعان جاپ-جاس ديداحمەت ءاشىمحان ۇلىنىڭ دا وتىرعانىن بايقايمىز. اتاۋلى كۇننىڭ ايشىقتى وقيعاسى ءتىلشى كۇندەلىگىنەن شەت قالماعان ەكەن.
«جازۋشىلار وداعىندا وتكەن ع.مۇسىرەپوۆتىڭ 75 جىلدىعىنا قاتىستىق. كەشكە ع.مۇستافين باسشىلىق ەتتى. م.قاراتاەۆ بايانداما جاسادى.
كەش سوڭىندا عابيتتىڭ ءوزى سويلەدى. عاباڭ سوزىنەن جادىمدا قالعانى دا, جانىما جاققانى دا مىناۋ بولدى:
«مەن كەيبىر جاس جازۋشىلارعا رەنجيمىن. شىعارمالارىن وقىپ وتىرعاندا شيكىلىكتەرى ءبىلىنىپ تۇرادى. سول ساتتە مەن «اتتەڭ وسى دۇنيەسىن جازىپ بولعاننان كەيىن جارتى نە ءبىر جىلدان سوڭ قايتا ءبىر جازىپ شىقسا عوي, بۇدان مۇلدە باسقا, تاۋىرىرەك دۇنيە بولار ما ەدى», دەپ ويلايمىن.
تاماشا ايتىلعان ءسوز. اتتەڭ, سوعان اركىمنىڭ شىدامى جەتە بەرمەيدى-اۋ. عاباڭنىڭ ءسوزى تەگىن ەمەس. قازاق «سوزىنە قاراپ ءوزىن تانى» دەيدى ەمەس پە؟ ۇلكەن سۋرەتكەر جەتپىس بەسكە كەلگەنشە بەلگىلى-بەلگىلى بەس-التى-اق شىعارما بەرۋى ۇلكەن سىربازدىقتىڭ بەلگىسى عوي. سىرباز ەمەي نەمەنە, ەگەر سول شىعارمالارىنىڭ بىرەۋىڭ ارقاۋى بوس بولماسا. عاباڭ – سوندىعىمەن عاباڭ. عاباڭ – سوندىعىمەن د.سنەگين ايتقانداي, ۇلى جازۋشى.
ساعي جيەنباەۆتىڭ ارناۋ ولەڭى تاماشا شىقتى. اقىن عاباڭا: «كىسىلىگىمىز سىزدەي بولسىن. كيىمدى سىزدەي كيىپ, تەمەكىنى دە سىزدەي سۇلۋ تارتساق», دەدى-اۋ. ارتىقتىعى جوق. چەحوۆتىڭ: «ادام كيگەن كيىمىمەن دە, مىنەزىمەن دە, تۇلعاسىمەن دە سۇلۋ بولۋ كەرەك», دەگەنىنە سايادى. ۇيرەنۋگە بولاتىن نارسە. ءتىپتى قاجەت تە», دەپ جازبا قالدىرىپتى د.ءاشىمحان 1982 جىلدىڭ 31 ناۋرىزىندا.
ال ديداحمەت دوسىنىڭ قاسىنا قازىرگى بەلگىلى جازۋشى الىبەك اسقاروۆ جايعاسقان. ول كىسىدەن دە سۋرەت تۋرالى ەستەلىك سۇرادىق. «مەن ول كەزدە سۋرەتشىلەر ۋچيليششەسىندە ديپلومدىق جۇمىسىمدى قورعاپ جاتقان كەزىم. ادەبيەت الەمىنىڭ تابالدىرىعىن ءالى اتتاماعان ەدىم. تەك ديداحمەت ءاشىمحانوۆ, مەرەكە قۇلكەنوۆ, بولات قاناتباەۆ, ۇلىقبەك ەسداۋلەتوۆ سياقتى دوستارىمنىڭ قولقاسىمەن زەينوللا قابدولوۆتاي اكادەميكتەردىڭ ادەبي سەكتسياسىنا باراتىنمىن. مىنا سۋرەت تە سول جىلداردىڭ مۇعدارىندا تۇسىرىلگەن. بۇل مەنىڭ جازۋشىلار ورتاسىندا تۇسكەن تۇڭعىش سۋرەتىم ەكەن», دەيدى جازۋشى.
ءيا, قازىر بۇل قالامگەرلەردىڭ جارتىسىنان كوبى ارامىزدا جوق. ال سول كەزدەگى بوزجەيدە جاس جازۋشىلار بۇل كۇندە ۇلكەن رۋحانيات ۇستىندارىنا اينالىپ وتىر.