قازاقستاندا بارلىق مەكتەپ وقۋلىقتارى تسيفرلىق فورماتقا كوشىرىلدى. بۇل تۋرالى ءبىلىم جانە جوعارى ءبىلىم مينيسترلىگى مالىمدەدى, دەپ حابارلايدى Egemen.kz.
مەكتەپ وقۋلىقتارىن تسيفرلىق فورماتقا كوشىرۋ 100 پايىزدى قۇراپ وتىر, دەپ حابارلايدى مينيسترلىكتىڭ ءباسپاسوز قىزمەتى. ولار مەملەكەتتىك ساراپتامادان ءوتىپ, وقۋ-ادىستەمەلىك كەشەندەردىڭ تىزىمىنە ەنگىزىلگەن. تسيفرلىق وقۋلىقتار ەلىمىزدەگى 13 باسپانىڭ 11 پلاتفورماسىندا ازىرلەنگەن.
ءبىلىم ساپاسىن قامتاماسىز ەتۋ كوميتەتى توراعاسىنىڭ ورىنباسارى مايرا مەلدەبەكوۆانىڭ ايتۋىنشا, مۇعالىمدەرگە جاڭا وقىتۋ فورماتىن قولدانۋ بويىنشا ارنايى ادىستەمەلىك نۇسقاۋلار ازىرلەنگەن.
«مۇعالىمدەر زاماناۋي تسيفرلىق تەحنولوگيالاردى, ونلاين كوممۋنيكاتسيالاردى, سارالاۋ مەن دارالاۋدى پايدالانا وتىرىپ ساباق جۇرگىزەدى, سونىمەن قاتار ونلاين رەسۋرستاردى پايدالانۋ بويىنشا بىلىمدەرىن جەتىلدىرەدى», دەدى مەلدەبەكوۆا.
سونىمەن قاتار, قازاق مەكتەپتەرىندە روبوتوتەحنيكا, STEM, حيميا, فيزيكا, بيولوگيا پاندەرى بويىنشا 1345 زاماناۋي كابينەت اشۋ جوسپارلانۋدا. جىل سوڭىنا دەيىن 20 وبلىستاعى 1072 مەكتەپ زاماناۋي ۇلگىدەگى كابينەتتەرمەن جابدىقتالادى دەپ ۋادە ەتىلگەن.
ەسكە سالايىق, وتكەن جىلى 1-11-سىنىپتار ارالىعىنداعى بارلىق وقۋ پاندەرىنىڭ 80 پايىزى ەلەكتروندى وقۋلىقتارمەن قامتىلعانى حابارلانعان بولاتىن. ازىرلەنگەن جانە تىزىمگە ەنگىزىلگەن وقۋلىقتاردىڭ جالپى سانى 436 اتاۋدى قۇرادى. تاعى 255 ەلەكتروندى وقۋلىق ەكسپەرتيزادان ءوتتى.
قىرمىزى جۇماعاليقىزى,
ەۇۋ ستۋدەنتى