ونەر – حالىقتى ەستەتيكالىق مادەنيەت پەن ادامگەرشىلىككە تاربيەلەۋدىڭ اسا ماڭىزدى قۇرالى. كەز كەلگەن ەل ونەرىمەن باعالانىپ, قاستەرلەنەدى دەسەك, قاتەلەسپەيمىز. مۋزەي جۇمىسى وتكەن مەن بۇگىندى بايلانىستىرۋشى التىن كوپىر ىسپەتتەس. جاقىندا «الماتى وبلىسى مۋزەيلەر بىرلەستىگىنە» قاراستى «اناعا قۇرمەت» مۋزەيىنىڭ ۇيىمداستىرۋىمەن ء«داستۇردى دارىپتەگەن اجەلەر» اتتى اۋداندىق اجەلەر بايقاۋى بولىپ ءوتتى.
ءىس-شارانىڭ ماقساتى – ەلىمىزدىڭ ءوسىپ-وركەندەۋىنە ۇلەس قوسقان ارداگەر انالارىمىزدىڭ قوعامداعى بەدەلىن كوتەرۋ, ولارعا قولداۋ كورسەتۋ. شاراعا قاراساي اۋدانىنان – 3, جامبىل اۋدانىنان – 1, الماتى قالاسىنان 1 اجەلەر ءانسامبلى قاتىسىپ, باق سىنادى. ءار اۋىلدىڭ نامىسىن ارقالاپ كەلگەن اجەلەر تامىلجىتا ءان شىرقاپ, كوپشىلىكتى تامساندىردى. اۋداندىق اجەلەر ءانسامبلىنىڭ بايقاۋى «الماتى وبلىسى مۋزەيلەر بىرلەستىگىنىڭ» باسشىسى ەرجان توقتار ۇلىنىڭ قۇتتىقتاۋىمەن اشىلدى.
– ءيا, انا ءبىر قولىمەن بەسىك تەربەتسە, ءبىر قولىمەن الەمدى تەربەتەدى. ال ۇلتتىڭ التىن قورى – انا مەن بالا. سوندىقتان بۇل بايقاۋدى كوپكە ۇلگى دەپ بىلەمىن. ويتكەنى اجەلەر سالعان دانا جولدا ۇرپاقتار وسەدى, جاقسى ءتالىم-تاربيە الادى, – دەدى بىرلەستىك باسشىسى.
بايقاۋ ەرەجەسى ءۇش كەزەڭنەن تۇردى. «ونەرلى نەتكەن اجەلەر» اتتى العاشقى كەزەڭدە قاتىسۋشىلار ءوز ونەرلەرىن كورسەتسە, «بەسىك جىرى – باستى جىر» دەپ اتالاتىن ەكىنشى كەزەڭدە زاماناۋي نەمەسە وزدەرى شىعارعان بەسىك جىرىن اۋەلەتە شىرقادى. ال «ۇمىت بولعان ۇلتتىق سالت-داستۇرلەر» كەزەڭىندە ۇمىتىلا باستاعان سالت-جورالعىلارىمىز بويىنشا كورىنىس كورسەتىلدى. سونىمەن قاتار اندەر ءتۇرلى مۋزىكالىق اسپاپتاردىڭ سۇيەمەلدەۋىمەن جاندى داۋىستا ورىندالدى. ءان بۇكىل سانا-سەزىمىڭدى باۋراپ الىپ جەتكىزە الاتىن قۇدىرەتتى قاسيەتكە يە. ال اجەلەردىڭ سالعان اندەرىنىڭ ماقامى دا, مازمۇنى دا مۇلدەم بولەك بولدى. بۇلبۇلداي سايراپ, گۇلدەي قۇلپىرعان اق جاۋلىقتىلار ساحنانىڭ ءسانىن كەلتىردى. ءانسامبلدىڭ قۇرامى 10-12 ادامنان كەم بولمادى. قاتىسۋشى اجەلەردىڭ جاس ەرەكشەلىگى 65 جاستان جوعارى بولعانى ەسكەرىلدى. اجەلەر بايقاۋىنىڭ وتكىزىلۋىنە باستاماشى بولعان, باستى ۇيىمداستىرۋشىسى – «اناعا قۇرمەت» مۋزەيىنىڭ مەڭگەرۋشىسى گۇلنار باقىتقاليقىزى.
بايقاۋعا «اناعا قۇرمەت» مۋزەيىنىڭ ۇيىمداستىرۋشىسى, پروفەسسور, ارداقتى ۇستاز باقىت شپەكپاەۆا, ارداگەر جۋرناليست, كيەلى كيمەشەكتى ناسيحاتتاۋشى ارشاگۇل تويباەۆا, ۇستاز زاۋرە ناكيپوۆا, «الماتى وبلىسى مۋزەيلەر بىرلەستىگىنىڭ» باسشىسى ەرجان توقتار ۇلى تورەلىك ەتىپ, اجەلەرگە ىستىق ىقىلاسىن ءبىلدىردى.
بايقاۋدىڭ ناتيجەسىندە باس جۇلدەنى رايىمبەك اۋىلدىق وكرۋگىنىڭ «داريعا داۋرەن» اجەلەر ءانسامبلى السا, 1-ورىندى ۇمبەتالى اۋىلىنىڭ «بوپەجان» اجەلەر ءانسامبلى يەلەندى. 2-ورىنعا شامالعان اۋىلدىق وكرۋگىنىڭ «اق اجەلەر» ءانسامبلى لايىق دەپ تانىلسا, ۇزدىك ۇشتىكتەن ەلتاي اۋىلدىق وكرۋگىنىڭ «اسىل اجەلەر» ءانسامبلى كورىندى. كۇليمان انا اتىنداعى ارنايى جۇلدە «الماتى قالاسىنىڭ بەلسەندى ءومىر ءسۇرۋ ورتالىعىنىڭ» اجەلەرىنە بۇيىردى. وسىلايشا, بايقاۋدا اجەلەر اۋەندى اندەردى ناقىشىنا كەلتىرە ورىنداپ, ساز ونەرىنىڭ ءيىرىمىن ۇشتاستىردى. بولاشاققا ۇلتتىق قۇندىلىقتارىمىزدى سىرىن بۇزباي جەتكىزۋ ءدال وسىنداي شارالاردان باستاۋ الادى.
اقەركە امانتاي,
«اناعا قۇرمەت» مۋزەيىنىڭ عىلىمي قىزمەتكەرى