كۇردەلى سۋ تاسقىنى جاعدايىنا بايلانىستى Kusto Group زارداپ شەككەندەرگە كومەك كورسەتۋگە 400 ملن تەڭگە بولىنگەنى تۋرالى حابارلادى. زارداپ شەككەن ايماقتارعا قاراجات KustoHelp جەكە قورى ارقىلى بولىنەدى, دەپ جازادى Egemen.kz.
«تابيعي اپاتتان زارداپ شەككەن ازاماتتارعا جاناشىرلىق پەن قولداۋ سوزدەرىن بىلدىرەمىز. ەل باسشىلىعى, قۇزىرەتتى مەملەكەتتىك ورگاندار, ەرىكتىلەر مەن ازاماتتار ادام قۇرباندارىن توقتاتۋ مەن الدىن الۋ, زارداپ شەككەندەرگە كومەك كورسەتۋ جانە سۋ تاسقىنىنىڭ سالدارىن جويۋ ءۇشىن قاجەت نارسەنىڭ ءبارىن جاساپ جاتىر. ءبىز وسى جۇمىسقا قوسىلامىز جانە اپاتتان زارداپ شەككەن ازاماتتارعا بارىنشا كومەك كورسەتەمىز», دەدى Kusto Group نەگىزىن قالاۋشى ەركىن تاتىشەۆ.
انىقتاما ءۇشىن: Kustohelp قايىرىمدىلىق قورىن Kusto Group حالىقارالىق كومپانياسى قۇردى. قور قازاقستان رەسپۋبليكاسىندا covid-19 كوروناۆيرۋس پاندەمياسى سەبەبىنەن جاريالانعان توتەنشە جاعداي كەزەڭىندە حالىقتىڭ نەعۇرلىم زارداپ شەككەن جانە وسال توپتارىنا 1 ملرد تەڭگەدەن استام مولشەردە كومەك كورسەتۋگە بەلسەندى قاتىستى.