باتىس قازاقستان وبلىسىنا گۋمانيتارلىق كومەك جەتكىزىلدى

«امانات» پارتياسى باتىس قازاقستان وبلىسى بويىنشا فيليالىنىڭ اتقارۋشى حاتشىسىنىڭ ورىنباسارى افيزا سەمعاليەۆانىڭ ايتۋىنشا, ءبىرىنشى كەزەكتە «جاستار رۋحى» جاستار قاناتىنىڭ ەرىكتىلەرى زاچاگان كەنتىندە جۇمىس ىستەپ جاتقان توتەنشە جاعدايلار قىزمەتكەرلەرىنە ىستىق تاماق جەتكىزگەن. سونداي-اق قاراتوبى اۋدانى قورجىن اۋىلىنداعى زارداپ شەككەن حالىققا جىلى كيىممەن قامتاماسىز ەتۋ كەرەكتىگىن ايتتى.

«وسىعان وراي ءبىز پارتيا فراكتسياسىنىڭ مۇشەلەرىنە, وبلىستىق جانە قالالىق ءماسليحات دەپۋتاتتارىنا قارجى جيناۋ تۋرالى ۇسىنىس جاسادىق. فيليال قىزمەتكەرلەرى ءبىر كۇندىك جالاقىلارىن اۋداردى. ناتيجەسىندە 7,2 ملن تەڭگە جينالدى. ءبىز حالىقتان اقشا جيناعان جوقپىز, بارلىعى ءوز قاراجاتىمىزعا جاسالدى.

ءسويتىپ, قورجىن اۋىلىن سۋ باسقاننان كەيىن, كەلەسى كۇنى تۇسكە دەيىن 4 توننا گۋمانيتارلىق كومەك جەتكىزىلدى. سونداي-اق سىرىم ءوڭىرىن سۋ باسقانى بەلگىلى بولدى. جەرگىلىكتى تۇرعىندار بالالار كيىمىن, جايالىق پەن جەكە گيگيەنا قۇرالدارىن سۇرادى. كەلەسى كۇنى سىرىم اۋدانىنا 4 توننا گۋمانيتارلىق كومەك جەتكىزىلدى. تەرەكتى اۋدانى اڭقاتى اۋىلىندا جاڭا تۋعان نارەستەلەرگە ءدارى-دارمەك پەن ازىق-ت ۇلىك قاجەت بولدى. ولارعا دا قاجەتتى زاتتار جەتكىزىلدى. تۇرعىندار حابارلاسقان كەزدە قاجەتسىز, ىسىراپ بولاتىن زاتتاردى اپارماي, قارجى ءتيىمدى جۇمسالۋى ءۇشىن ناقتى نە قاجەت ەكەنىن تىزىمدەي الامىز», دەيدى ا.سەمعاليەۆا.

پارتيا فيليالىنىڭ جاۋاپتى حاتشىسىنىڭ ورىنباسارى مۇنداي كومەك سۋ تاسقىنىنان زارداپ شەككەن باسقا اۋىلدارعا دا قاجەتتىلىكتەرىنە قاراي جەتكىزىلەتىنىن تىلگە تيەك ەتتى.

«سونىمەن قاتار رەسپۋبليكانىڭ تۇكپىر-تۇكپىرىنەن پارتيالىق ارىپتەستەر بىزگە حابارلاسىپ, كومەك قولىن سوزىپ جاتىر. ماسەلەن, شىمكەنتتەن 20 توننا ازىق-ت ۇلىك, كيىم-كەشەك, جاتىن ورنى بار ارنايى كولىك كەلەدى», دەيدى ا.سەمعاليەۆا.

قىرمىزى جۇماعاليقىزى,

ەۇۋ ستۋدەنتى