كەيبىر اۋدانداردا قارعىن سۋ ەكپىندەپ كەلىپ, اۋلالارعا جايىلىپ, كۇرە جولدارعا شىعىپ كەتىپ, جەرگىلىكتى بيلىك وكىلدەرى مەن تۇرعىندار ابىگەرگە ءتۇسىپ جاتىر. وڭىردەگى قاردىڭ 70 پايىزى ءالى ەرىمەگەنىن ەسكەرسەك, دايىندىقتى كۇشەيتە ءتۇسۋ كەرەك سياقتى. سول ءۇشىن دە وبلىس باسشىلىعى سۋ تاسقىنى قاۋپى بار جەرلەردى اۋەدەن باقىلاپ قايتتى.
وسكەمەن – ريددەر قالالارى مەن التاي – گلۋبوكوە – شەمونايحا – ۇلكەن نارىن, كاتونقاراعاي اۋداندارى باعىتى بويىنشا ۇشىپ وتكەن مونيتورينگ توبى وزەندەردە مۇزدىڭ اشىلۋىن بايقاعان. سۋ دەڭگەيلەرى ارناسىنان اسىپ جاتقان جوق. بوگەۋلەر دە قالىپتى جاعدايدا دەسەدى. ەندىگى قاۋىپ – تاۋدىڭ قارى. ول ەرىگەندە وزەندەر تاسىپ, ارناسىنان شىعۋى ابدەن مۇمكىن. الدىن الۋ ءۇشىن وڭىردە 55 مىڭ دانا قاپ, 6 مىڭ توننادان اسا ينەرتتى ماتەريال, 406 توننا جانارماي دايىندالدى. تەحنيكا مەن موتوپومپالار ازىرلىككە كەلتىرىلدى, ەۆاكۋاتسيالىق پۋنكتتەر قاراستىرىلدى. وندا ۋاقىتشا تۇرۋ ءۇشىن جان-جاقتى جاعداي جاسالعان. ەلدى مەكەندەردەن 368 مىڭنان اسا تەكشە مەتر قار شىعارىلدى. 448 شاقىرىم ارىق پەن 447 كوپىردىڭ كوزدەرى تازارتىلدى.
ءساۋىر تۋا اۋا تەمپەراتۋراسى جىلىپ, تاۋلى وڭىرلەردەگى قاردىڭ كوبەسى سوگىلە باستادى. وزەن-كولدىڭ مۇزى جارىلدى. سۋ تاسقىنى قاۋىپ توندىرگەن جاعدايدا, وبلىستا 2 270 ادام, 732 بىرلىك تەحنيكا مەن 234 موتوپومپا, 61 بىرلىك ءجۇزۋ قۇرالدارى توپتاستىرىلادى. الدا-جالدا تۇرعىن ۇيلەردى سۋ باسسا, حالىقتى ورنالاستىرۋ ءۇشىن سىيىمدىلىعى 17 600 ادامدى قۇرايتىن 153 ۋاقىتشا ورنالاستىرۋ پۋنكتى دايىندالدى.
قازىرگى تاڭدا قالباتاۋ – مايقاپشاعاي تاسجولىنىڭ 1 090-1 092 شاقىرىمىندا سۋ شىعىپ, جولدى شايىپ كەتكەنى بولماسا, باسقا وڭىرلەردە سۋ باسىپ جاتقان جوق. بىراق جولدىڭ ۇستىنە شىققان سۋ تارباعاتاي اۋدانىنىڭ تۇرعىندارى ءۇشىن وتە ۇلكەن كەدەرگى بولعان. وبلىس ورتالىعىنا قاتىناۋ مۇمكىن بولماي قالعان. «قازاۆتوجول» اق شىعىس قازاقستان وبلىسى فيليالىنا قاراستى جولدىڭ جيەگىن قار سۋى شايىپ كەتكەن. ءبىر ەمەس, ەكى سۋ وتكىزۋ قۇبىرلارى بولعانىمەن, كولكىگەن سۋ دەس بەرمەگەن. تاسقىن توقتاعان سوڭ, جاۋاپتى مەكەمە جولدى قالپىنا كەلتىرۋ ءۇشىن 5 مىڭ توننا تاس توككەن, 1 800 توننا شاعىل تاس جەتكىزگەن. ءسويتىپ, جولدى اشتى. بۇل جوندەلىپ جاتقان جول بولعاندىقتان, الداعى ۋاقىتتا 13 سۋ وتپە قۇبىرلارى ورناتىلادى. ول جۇمىستار جىل سوڭىندا اياقتالۋى مۇمكىن.
– ءتىلسىز جاۋ رەسپۋبليكالىق ماڭىزى بار كۇرە جولدىڭ بويىنداعى ۋچاسكەلەردى ءبۇلدىرىپ كەتكەن. 1 ءساۋىر ساعات 15.30-دان باستاپ, ومبى – مايقاپشاعاي باعىتىنداعى سۋ شايعان تاسجولدى اشۋ جۇمىستارى جۇرگىزىلدى. ازىرشە ءبىر باعىتتىق جول اشىلىپ, كولىكتەر كەزەگىمەن وتكىزىلەدى, – دەدى «قازاۆتوجول» اق شقو فيليالى ديرەكتورىنىڭ ورىنباسارى دامير ساپارعاليەۆ.
ايتىپ وتكەندەي, قالباتاۋ – مايقاپشاعاي اراسىنداعى تاسجولدى سۋ شايىپ كەتكەندىكتەن, جولاۋشىلار جولدا قالعان. ونىڭ ىشىندە اباي وبلىسى اۋماعىندا قالىپ قالعان تارباعاتايلىق جاس انا دارىگەرلەر كومەگىنە جۇگىنگەن. شقو دەنساۋلىق ساقتاۋ باسقارماسىنىڭ ءباسپاسوز قىزمەتى مالىمدەگەندەي, 2002 جىلعى تارباعاتاي اۋدانىنىڭ تۇرعىنى وسكەمەن قالاسىنان تاكسيمەن جولعا شىققان. الايدا سۋ دەڭگەيى كوتەرىلىپ, جول جابىلعاندىقتان, اباي وبلىسىنىڭ كوكپەكتى اۋدانىنا قاراستى تاسساي اۋلىندا قالىپ قويعان. جولاي ءوزىن جايسىز سەزىنگەن ول دارىگەرلەرگە جۇگىنگەن. دارىگەرلەر دەرەۋ جاس انا مەن نارەستەنى تىكۇشاقپەن وسكەمەنگە جەتكىزىپ, وبلىستىق اۋرۋحانانىڭ گينەكولوگيا بولىمىنە جاتقىزعان. ال نارەستە انا مەن بالا ورتالىعىندا دارىگەرلەر باقىلاۋىنا الىندى.
ايتىپ وتكەندەي, قاۋىپ بەتى قايتقانشا, جولعا شىقپاس بۇرىن, تجد-دان كەلىپ ءتۇسىپ جاتقان حابارلامالارعا نازار اۋدارعان دۇرىس. قاۋىپ تاسقىن سۋدان عانا ەمەس, تاۋلى ايماقتاردا قار كوشكىنى ءتۇسىپ جاتقانىن دا ەستەن شىعارماعان ءجون.
شىعىس قازاقستان وبلىسى