اقتوبە وبلىسىندا سۋ تاسقىنىنان 3 مىڭعا جۋىق ءىرى قارا ءولدى, دەپ حابارلايدى Egemen.kz.
وبلىستىق اۋىل شارۋاشىلىعى جانە جەر قاتىناستارى باسقارماسى مال شىعىنىن ەسەپتەپ جاتىر. بۇگىنگى تاڭدا تىزىمدە 3 مىڭعا جۋىق ءىرى قارا بار.
ء«بىز كۇن سايىن اۋدانداردان جەدەل اقپارات جينايمىز. بۇگىندە 3000-عا جۋىق مال ولگەنى بەلگىلى بولدى. ولاردىڭ باسىم بولىگى ويىل جانە قوبدى اۋداندارىندا تىركەلگەن. بىراق ولار بايعانين, ىرعىز وڭىرىندە دە بار. بۇل كورسەتكىش الداعى كۇندەرى ناقتىلانادى. بۇل رەتتە مالشىلاردىڭ ۇيلەرى مەن قورالارىنىڭ قۇلاعانى تۋرالى دەرەكتەر جينالىپ جاتىر», دەيدى اقتوبە وبلىستىق اۋىل شارۋاشىلىعى جانە جەر قاتىناستارى باسقارماسىنىڭ ءبولىم باسشىسى پانابەك بيمۇراتوۆ.
ونىڭ ايتۋىنشا, اۋدان, اۋىلدىڭ مال دارىگەرلەرى ۇيلەردى, شارۋا قوجالىقتارىن ارالاپ, تىركەۋ جۇمىستارىن جۇرگىزۋ ۇستىندە.
«وسىدان كەيىن نارىقتاعى ءار مالدىڭ ورتاشا قۇنى انىقتالىپ, شىعىن وتەلەدى. بۇل ءبىر كۇننىڭ ەمەس, بىرنەشە ايدىڭ جۇمىسى. مالىمەتتەر كۇن سايىن جاڭارتىلىپ, اۋىل شارۋاشىلىعى مينيسترلىگىنە جىبەرىلەدى. فەرمەرلەردىڭ نەسيەلەرى مەن سۋبسيديالاناتىن تەحنيكاعا قاتىستى ماسەلەلەر دە قاراستىرىلادى», دەپ قوستى پانابەك بيمۇراتوۆ.