رەسپۋبليكالىق «شاكارىم وقۋلارى» بيىل دا جالعاستى. مەكتەپ وقۋشىلارى اراسىندا وتكەن بايقاۋعا قاتىسۋعا نيەتتى جاسوسپىرىمدەر قاتارى وسى جولى دا كوپ بولدى, دەپ جازادى Egemen.kz.
ەكى ايعا جۋىق ەلىمىزدىڭ بارلىق ايماعىندا ىرىكتەۋ سىنى ءوتىپ, ۇزدىك شىققان تالاپكەرلەر استانادا وتكەن قورىتىندى بايقاۋعا جولداما العان ەدى. كەشە مادەنيەت جانە اقپارات مينيسترلىگىنىڭ قولداۋىمەن ۇلتتىق اكادەميالىق كىتاپحانادا رۋحاني ءىس-شارا ءوز مارەسىنە جەتتى. بايقاۋعا «Adal as» وندىرىستىك كومپانياسى دەمەۋشىلىك جاسادى.
ۇلتتىق اكادەميالىق كىتاپحانا مەن «Adal as» وندىرىستىك كومپانياسىنىڭ ۇيىمداستىرۋىمەن ەلىمىزدىڭ بارلىق اۋماعىن قامتىعان رۋحاني ءىس-شارا بيىل ەكىنشى رەت ءوتتى. بايقاۋعا ەلىمىزدىڭ بارلىق اۋماعىنان 2000-نان اسا ۇمىتكەر قاتىسىپ, ەرەكشە بەلسەندىلىك تانىتتى. كەشە توپ جارعان 18 جاس شاكارىمتانۋشىلار استاناعا جينالىپ, اقتىق سىنعا قاتىستى. بىلتىر باستالىپ, داستۇرگە اينالعان «شاكارىم وقۋلارىنىڭ» ماقساتى شاكارىم شىعارمالارىن ناسيحاتتاۋ, ونىڭ تەرەڭ فيلوسوفيالىق ەڭبەكتەرىن جاس ۇرپاقتىڭ ءتۇسىنىپ, وي تۇيۋىنە مۇمكىندىك بەرۋ بولاتىن. ءبىز بيىل دا بۇل ۇدەدەن شىقتىق دەپ ويلايمىز, ويتكەنى وقۋشىلاردىڭ شاكارىم شىعارماشىلىعىن تانۋعا دەگەن ىزدەنىستەرى ءسۇيسىنتتى, دەيدى ۇلتتىق اكادەميالىق كىتاپحانا ديرەكتورى عازيزا قۇدايبەرگەنقىزى.
رەسپۋبليكالىق بايقاۋعا 17 وبلىستان 19 كىتاپحانا جۇمىلىپ, ءبىرىنشى كەزەڭ قاتىسۋشىلارىنا ىرىكتەۋ جاساعان ەكەن. ال اقتىق سىنعا 5-8 سىنىپتاردا وقيتىن 18 ءجاسوسپىرىم كەلىپ, ءوزارا باق سىناستى. قورتىندى بايقاۋعا اقىن, فيلولوگيا عىلىمدارىنىڭ كانديداتى, پروفەسسور جانات اسكەربەكقىزى, «شاكارىم وقۋلارى» II رەسپۋبليكالىق بايقاۋىنىڭ وتۋىنە قولداۋ ءبىلدىرىپ, دەمەۋشىلىك كورسەتكەن كاسىپكەر, مەتسانات ەرمەك مەزىباەۆ, ابايتانۋشى, اباي اكادەمياسى عىلىمي-زەرتتەۋ ينستيتۋتىنىڭ ديرەكتورى جاندوس اۋباكىر, اقىن, «دارىن» جاستار سىيلىعىنىڭ لاۋرەتى قالقامان سارين, جانە ۇلتتىق اكادەميالىق كىتاپحانا ديرەكتورى عازيزا قۇدايبەرگەنقىزى ءادىل قازىلىق ەتتى.
بايقاۋ قورىتىندىسى بويىنشا باس جۇلدە استانا قالاسىنىڭ 5 سىنىپ وقۋشىسى قيلىمبەك ۇلى ەدىگەگە بۇيىردى. ال 1 ورىندى تاراز قالاسىنىڭ 7 سىنىپ وقۋشىسى ادىلاحمەت ءاديا, 2 ورىندى باتىس قازاقستان وبلىسىنان كەلگەن, 8 سىنىپ وقۋشىسى يسليامقىزى كاۋسار, 3 ورىندى اباي وبلىسىنان 5 سىنىپ وقۋشىسى الىبەك ايارۋ جەڭىپ الدى. جەڭىمپازدارعا جانە وزگە قاتىسۋشىلارعا دەمەۋشىلەر ەسەبىنەن باعالى سىيلىقتار بەرىلسە, جەتەكشىلەرى ارنايى العىس حاتتارمەن ماراپاتتالدى.