سەنات توراعاسى ماۋلەن اشىمباەۆ اقش كونگرەسىنىڭ سەناتورى ستيۆ دەينسپەن كەزدەستى. تاراپتار ەكىجاقتى پارلامەنتارالىق ىنتىماقتاستىقتى ودان ءارى نىعايتۋ ماسەلەلەرىن تالقىلادى. كەزدەسۋ بارىسىندا قازاقستان-اقش قارىم-قاتىناسىن دامىتۋدا جوعارى دەڭگەيدەگى مەملەكەتارالىق تۇراقتى ساياسي ديالوگتىڭ ىقپالى زور ەكەنى ايتىلدى, دەپ حابارلايدى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
بىلتىر قىركۇيەك ايىندا قاسىم-جومارت توقاەۆ پەن دجو بايدەن نيۋ-يوركتەگى بۇۇ باس اسسامبلەياسى الاڭىندا وتكەن س5+1 سامميتىندە كەزدەسكەن ەدى. سونداي-اق وتكەن جىلدىڭ اقپان ايىندا اقش-تىڭ مەملەكەتتىك حاتشىسى ەنتوني بلينكەن قازاقستانعا رەسمي ساپارمەن كەلگەنى ءمالىم.
كەزدەسۋدە كوپجاقتى جانە پارلامەنتارالىق بايلانىستى دامىتۋ ماسەلەلەرىنە دە باسا ءمان بەرىلدى.
«ەكى ەلدىڭ پرەزيدەنتتەرى ءوزارا قارىم-قاتىناسىمىزدىڭ ستراتەگيالىق باسىمدىقتارىن بەلگىلەپ, قازاقستان-امەريكا بايلانىسىن ءارى قاراي دامىتۋ ءۇشىن ماڭىزدى قادامدار جاسادى. قازىرگى ۋاقىتتا ەكى مەملەكەت اراسىندا قارقىندى ساياسي ديالوگ قالىپتاسقان. ساۋدا-ەكونوميكالىق ءوزارا ءىس-قيمىل دا بەلسەندى دامىپ كەلەدى جانە اۋقىمدى شارتتىق-قۇقىقتىق بازا بار. ەلدەرىمىزدىڭ ليدەرلەرى بەلگىلەپ بەرگەن تىعىز ىنتىماقتاستىق باسقا سالالاردا, ونىڭ ىشىندە زاڭ شىعارۋشى ورگاندار اراسىندا دا جوعارى دەڭگەيدە قولداۋ تابۋعا ءتيىس», دەدى ماۋلەن اشىمباەۆ.
سونىمەن قاتار تاراپتار پارلامەنت دەپۋتاتتارىنىڭ ساۋدا-ەكونوميكالىق ىنتىماقتاستىق باعىتىنداعى بىرلەسكەن جۇمىسىن جانە باسقا ماسەلەلەردى تالقىلادى.
سەنات سپيكەرى پارلامەنتتىڭ مەملەكەت باسشىسىنىڭ باستاماسىمەن قولعا الىنعان رەفورمالاردى زاڭنامالىق تۇرعىدان قامتاماسىز ەتۋ باعىتىنداعى جۇمىسىنا, سونداي-اق, الەمدىك جانە ءداستۇرلى دىندەر ليدەرلەرى سەزىنىڭ تۇجىرىمداماسىنىڭ ىسكە اسىرىلۋ بارىسىنا دا توقتالىپ ءوتتى.
ءوز كەزەگىندە ستيۆ دەينس قازاقستاندا جۇرگىزىلگەن كەشەندى جاڭعىرۋلاردى جوعارى باعالاپ, ءبىزدىڭ ەلدە دەموكراتيانى دامىتۋعا, جاڭا ەكونوميكالىق ۇلگىگە كوشۋگە, رۋحاني ديپلوماتيانى وركەندەتۋگە ارنالعان شارالاردىڭ تيىمدىلىگىنە نازار اۋداردى جانە ءوزارا بىرلەسكەن جۇمىستى جانداندىرۋعا بەيىل ەكەنىن اتاپ ءوتتى.