الماتى وبلىسى قاراساي اۋدانىندا وتكەن جىلى عانا قولدانىسقا بەرىلگەن زاماناۋي وليمپيادالىق دايارلاۋ ورتالىعىندا گرەك-ريم, ەركىن جانە ايەلدەر كۇرەسىنەن قازاقستان رەسپۋبليكاسىنىڭ چەمپيوناتى سالتاناتتى تۇردە اشىلدى.
وندا ەلىمىزدىڭ بارلىق وڭىرىنەن, ياعني 17 وبلىس, 3 قالادان كەلگەن 20 كوماندا سپورتشىلارى ساپ تۇزەدى. چەمپيوناتتىڭ اشىلۋىنا قازاقستاننىڭ گرەك-ريم, ەركىن جانە ايەلدەر كۇرەسى فەدەراتسياسىنىڭ باس حاتشىسى ديماش سۇلتانوۆ, فەدەراتسيانىڭ ۆيتسە-پرەزيدەنتتەرى بيلالدين ۋشۋروۆ, اسقار قۋلوۆ, داۋرەن جاپپاسوۆ جانە ءوڭىردىڭ سپورت جاناشىرلارى قاتىستى.
بايراقتى باسەكەدە 17 جاسقا دەيىنگى جاسوسپىرىمدەر مەن 23 جاسقا دەيىنگى جاۋىرىنى جەرگە تيمەيتىن 1500-دەن استام جاس سپورتشىلار كۇرەستىڭ ءار تۇرىنەن 10 سالماق دارەجەسى بويىنشا بەلدەسۋدى باستاپ كەتتى.
«ەلىمىزدە گرەك-ريم كۇرەسى وتكەن عاسىردىڭ ەكىنشى جارتىسىنان دامي باستادى. ونىڭ العاشقى جەمىسى – 1980 جىلعى جازعى وليمپيادا ويىندارىنىڭ ناتيجەسى. جەرلەستەرىمىز جاقسىلىق ۇشكەمپىروۆ پەن ءشامىل سەرىكوۆ گرەك-ريم كۇرەسىنەن حالقىمىزدان شىققان تۇڭعىش وليمپيادا چەمپيوندارى اتانىپ, كەيىنگى بۋىنعا سارا جول سالدى. «سپورت – ەلدىڭ مەرەيىن اسىرىپ, ابىرويىن تاسىتاتىن سالا. تاۋەلسىزدىك جىلدارى ەل سپورتشىلارى حالىقارالىق ءىرى جارىستاردا توپ جارىپ, كوك بايراعىمىز اسقاقتاي تۇسۋدە. بۇل قازاقستان سپورتىنىڭ الەمدىك دەڭگەيدە دامىعانىن كورسەتەدى», دەگەن پرەزيدەنتىمىز قاسىم-جومارت توقاەۆ سپورتشىلارعا زور سەنىم ارتتى. سوندىقتان ارالارىڭىزدان وتانىمىزدىڭ داڭقىن اسىراتىن سپورتشىلار شىعارىنان ءۇمىتتىمىز», دەگەن الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىم سپورتشىلارعا ساتتىلىك تىلەدى.
قازاقستان چەمپيوناتىنىڭ العاشقى كۇنىندە 5 سالماق دارەجەسى بويىنشا تارتىستى بەلدەسۋلەر باستالدى. ون كۇنگە جۋىقتايتىن جارىس كۇندەلىگىندە جەڭىمپازدار ەسىمدەرى انىقتالاتىن بولادى.
الماتى وبلىسى