پرەزيدەنت جانىنداعى نەگىزگى كونسۋلتاتيۆتىك-كەڭەسشى ورگان رەتىندە ۇلتتىق قۇرىلتاي قوعام, زيالى قاۋىم وكىلدەرى جانە ساراپشىلار قاۋىمداستىعىن مەملەكەتشىلدىك ماسەلەلەردى ءبىر ارناعا بىرىكتىرەتىن ديالوگ پلاتفورماسىنىڭ ءتيىمدى ۇلگىسىن قالىپتاستىرىپ, دامىتىپ كەلەدى.
قۇرىلتاي وتىرىستارىندا پرەزيدەنت الدىندا وزەكتى سۇراقتاردىڭ شەشىمىن تالقىلاۋ فورماتى – قوعام مەن مەملەكەت اراسىنداعى ناتيجەلى ديالوگ جۇرگىزۋدىڭ جاقسى ۇلگىسى. مۇندا قوعامنىڭ وزەكتى ماسەلەلەرى تالقىلانادى. ماسەلەن, وتكەن جىلعى جيىندا كىتاپحانا ءىسىن دامىتۋ, وقۋ ساۋاتتىلىعىن ارتتىرۋ, تاربيە جۇمىسىنىڭ قۇندىلىعى تالقىلاندى.
مەملەكەت باسشىسى قۇرىلتايدا «زاڭ جانە ءتارتىپ» قاعيداتىن ادام قۇقىقتارىن قورعاۋداعى باستى ۇستانىمى رەتىندە ايتقان بولاتىن. بۇگىندە وسى قاعيدات بارلىق زاڭنامالىق باستامادا ىرگەلى نەگىز رەتىندە ايقىندالىپ وتىر.
ۇلتتىق قۇرىلتاي اياسىندا تالقىلانعان كەيبىر ماسەلەلەر دەپۋتاتتىق باستامالار نەگىزىندە زاڭنامالىق دەڭگەيدە شەشىمىن تاۋىپ كەلەدى. مىسالى, قۇرىلتايدا كوتەرىلگەن كىتاپحانالاردىڭ قىزمەتىن جاقسارتۋ, وقۋشىلار مەن جاستار اراسىندا كىتاپ وقۋدى دامىتۋعا باعىتتالعان مەملەكەت باسشىسىنىڭ تاپسىرمالارىن ورىنداۋ ماقساتىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەدى. بۇگىندە بۇل قۇجات بويىنشا ماجىلىستە جۇمىس توبى قۇرىلدى.
بارشاڭىزعا بەلگىلى, مەملەكەت باسشىسى ء«بىلىم جانە تالىمگەرلىك تۋرالى» زاڭعا قول قويدى, ونىڭ اياسىندا مەكتەپتەگى ءبىلىم, تاربيە جۇمىسىنىڭ بىرقاتار ماسەلەسى شەشىلدى. ناقتىلاپ ايتساق, ەندى, مەكتەپتەر جانە بالاباقشالار جوسپارلانباسا, كوپقاباتتى تۇرعىن ۇيلەر سالىنبايدى. سونداي-اق مەملەكەتتىك مەكتەپتەر مەن كوللەدجدەردى جەكەشەلەندىرۋگە تىيىم سالىندى. 30 جىلدان استام پايدالانىلعان مەكتەپ, بالاباقشا جانە كوللەدج عيماراتتارى ءار 5 جىل سايىن اپاتتىلىق قاۋپى بويىنشا تەكسەرىلەدى.
ءبىرىنشى سىنىپقا قابىلداۋ ءۇشىن ەمتيحان وتكىزۋگە تىيىم سالىندى. بۇل – بالالارىمىزعا تەڭ ءبىلىم مۇمكىندىكتەرىن جۇزەگە اسىرۋ ءۇشىن وزەكتى نورما.ساباق كەزىندە ۇيالى تەلەفونداردى پايدالانۋدى شەكتەۋ تۋرالى ارنايى نورما دا جوباعا ەنگىزىلدى. نورما تەك ساباق كەزىندەگى شەكتەۋلەرگە قاتىستى. بالا تەلەفونىن مەكتەپكە اكەلىپ, ءۇزىلىس كەزىندە پايدالانا الادى. بۇل تۇرعىدا ەشقانداي شەكتەۋ جوق. ساباق كەزىندە بالا تەك وقۋمەن اينالىسۋى كەرەك.
سونىمەن بىرگە تۇركىستاندا وتكەن ۇلتتىق قۇرىلتايدا پرەزيدەنت قاسىم-جومارت توقاەۆ ۆەيپ جانە ءتۇرلى ەلەكتروندى تەمەكىلەردى ۇلت ساۋلىعىنا قاۋىپ توندىرەتىن كەسەل دەپ اتاپ ءوتتى. ول ەلەكتروندى تەمەكىنىڭ بارىنە قولجەتىمدى جانە ونىڭ زيانسىزدىعى تۋرالى ءتۇرلى جارنامانىڭ كوبەيىپ كەتكەنىنە الاڭداۋشىلىق ءبىلدىردى. مەملەكەت باسشىسى وسى قاۋىپتى ۇردىسپەن كۇرەسۋ ءۇشىن جۇيەلى جانە شۇعىل شارالار قابىلداۋ قاجەت ەكەنىن ايتقان بولاتىن.
ءماجىلىس دەپۋتاتتارى ۆەيپ جانە ەلەكتروندى تەمەكىلەردىڭ سۇيىقتىعىنا, ولاردى تاۋار رەتىندە ەنگىزۋگە جانە ونىڭ اينالىمىنا تولىق تىيىم سالۋ تۋرالى نورما قابىلدادى. بۇل دا ۇلتتىق قۇرىلتاي اياسىندا ۇلتىمىزدىڭ كەلەشەگى جاستارىمىزدىڭ دەنساۋلىعى ءۇشىن شەشىمىن تاپقان وزەكتى سۇراق.
قوعامنىڭ بارلىق سالاسىنداعى وسىنداي كۇردەلى ماسەلەلەر ۇلتتىق قۇرىلتايدىڭ نەگىزىندە جۇيەلى ءارى ناتيجەلى شەشىمىن تاۋىپ كەلەدى. وعان مىسالدار كوپ. دەپۋتاتتىق كورپۋس ۇلتتىق قۇرىلتايدا كوتەرىلگەن سۇراقتاردىڭ جاۋابىن زاڭنامالىق نەگىزدە شەشىلۋدە ودان ءارى ەڭبەك ەتە بەرەدى.
جۇلدىز سۇلەيمەنوۆا,
ءماجىلىس دەپۋتاتى