ميلليونداعان حالقى بار مەگاپوليستە الەۋمەتتىك تۇرعىدا اركىمگە ءارتۇرلى قولداۋ قاجەت. بىرەۋلەر قارجىلاي كومەككە, ەندى بىرەۋلەر مامانداردىڭ كەڭەسىنە مۇقتاج بولسا, ال مۇگەدەكتىگى بار جانداردىڭ ءجۇرىپ-تۇرۋى ءۇشىن زامانعا ساي ارنايى اساي-مۇسەيلەر كەرەك.
مىسالى, وتكەن جىلى الماتىدا مۇگەدەكتىگى بار 433 ادام يننوۆاتسيالىق تەحنيكالىق وڭالتۋ قۇرالدارىمەن قامتاماسىز ەتىلگەن. ياعني 2023 جىلعى مەملەكەتتىك ساتىپ الۋ ارقىلى 150 پروتەز, 200 اربا, 76 سويلەۋ پروتسەسسورى مەن يننوۆاتسيالىق 7 ەستۋ اپپاراتى الىندى.
وسىنداي يننوۆاتسيالىق پروتەزدىڭ بىرەۋىنە قولى جەتكەن پاراليمپياداشى دجانەت جاكيەننىڭ ەندىگى جەردە قالانى وڭاي ارالاپ, پاۋەرليفتينگپەن اينالىسۋدى جالعاستىرىپ جاتقانى قۋانتادى.
«مەن 1976 جىلدان باستاپ پروتەزبەن جۇرە باستاعاندا جاساندى اياقتار اۋىر ءارى ىڭعايسىز بولاتىن. ۋاقىت وتە كەلە ولار جەڭىل بولىپ شىعارىلا باستادى دا, بۇل ءومىردى ەداۋىر جەڭىلدەتىپ, يكەمدى بولدى. الايدا, وكىنىشكە قاراي, مۇنداي پروتەزدەر سپورتتىق جۇكتەمەلەرگە شىداس بەرە المايتىن. قازىرگى زاماناۋي پروتەزدەر – جۇرۋگە دە, جاتتىعۋعا دا ىڭعايلى. ارنايى بەكىتەتىن ق ۇلىپتارى مەن سيليكون قاقپاقتارى بار», دەيدى پاراليمپياداشى.
وسى ماقساتتا بيىل الماتىدا جەرگىلىكتى بيۋدجەتتەن 1 ملرد 396 ملن 550 مىڭ تەڭگە سوماسىندا مۇگەدەكتىگى بار 288 ادامدى يننوۆاتسيالىق تەحنيكالىق قۇرالدارىمەن قامتاماسىز ەتۋ ءۇشىن قاراجات ءبولىنىپ وتىر.
ساپا باستى ورىندا بولعاندىقتان, مەگاپوليس باسشىسى ەربولات دوساەۆ قالا تۇرعىندارىمەن كەزدەسكەن كەزدە وڭالتۋ قۇرالدارىن جەتكىزۋشىلەردى تاڭداۋدا مەملەكەتتىك ساتىپ الۋ تۋرالى زاڭعا ەنگەن وزگەرىستەرگە قاتىستى تۇسىنىكتەمە بەردى. سەبەبى ناۋرىزباي اۋدانى تۇرعىندارىنىڭ ءبىرى قالا اكىمىمەن كەزدەسۋ بارىسىندا جول كارتاسى باعدارلاماسى ارقىلى بىلتىر كوپفۋنكتسيونالدى اربا العانىن, سول ارقىلى بالاسىنىڭ تالاي اجەتى وتەلىپ, باسىن, دەنەسىن, اياعىن ۇستاپ تۇرا الاتىنىن, ەمدىك اسەرى دە بار ەكەنىن العىس سەزىممەن جەتكىزدى. «بۇل بالامنىڭ وڭالۋىنا اسا قاجەتتى, ساپالى گادجەت ەكەن. جەتكىزۋشىلەردى تاڭداعان كەزدە تاۋارلار مەن قىزمەتتەردىڭ وسىنداي ساپاسىنا ءمان بەرۋدى سۇراعىم كەلەدى», دەگەن ەدى ول.
قالا تۇرعىنىنىڭ شىنايى العىسىنا ريزاشىلىعىن بىلدىرگەن الماتى اكىمى: «بالالارىمىزعا وڭالتۋ قۇرالدارىن ساتىپ الۋ تاسىلدەرىن قايتا قاراستىردىق. اتا-انالارعا ىڭعايلى ءارى شيپاسى بار زاماناۋي اربالاردى ساتىپ الۋدى قاداعالاپ وتىرمىز. وعان قوسا پروتەزدەردى اۋىستىردىق, ەستۋ قابىلەتى ناشار بالالاردى وڭالتۋ ماسەلەلەرىن قايتا قاراستىردىق», دەدى.
ە.دوساەۆ بىلتىر وسى ماقساتقا 1,3 ملرد تەڭگە ءبولىنىپ, وڭالتۋ قۇرالدارىمەن 433 ادام قامتىلعانىن, بيىل شامامەن وسىنشاما سوما بولىنگەنىن جەتكىزدى.
الماتى قالاسىنىڭ اكىمى جەتكىزۋشىلەردى تاڭداۋدا ساپا ولشەمى بويىنشا ەڭبەك جانە الەۋمەتتىك قورعاۋ مينيسترلىگىنە ۇسىنىستار تۇسىرگەنىن العا تارتا كەلە: «قازىر مەملەكەتتىك ساتىپ الۋ اياسىندا بىزگە باعا جاعىنان ساناسۋعا تۋرا كەلەدى, بىراق مينيسترلىك ءبىزدى قولدايدى دەپ ۇمىتتەنەمىن جانە بالالارىمىز بەن مۇمكىندىگى شەكتەۋلى ەرەسەكتەر ءۇشىن ەڭ جاقسىسىن ساتىپ الۋعا تىرىسامىز», دەدى.
الماتى