جوعارعى سوتتىڭ سۋدياسى نازگۇل راحمەتۋللينا قوعامدى ءدۇر سىلكىندىرگەن ەكس-مينيستر ق.بيشىمباەۆتىڭ سوت پروتسەسىنە جۋرناليستەردىڭ قاتىسۋ قۇقىعىن تالقىلاپ, پىكىر ءبىلدىردى, دەپ جازادى Egemen.kz.
سۋديا كەيىنگى كۇندەرى باق وكىلدەرىنىڭ سوت زالىنا كىرگىزىلمەگەنى تۋرالى نارازىلىق مانىندەگى ماتەريالدار ءجيى نازارىنا ىلىككەنىن ايتىپ, «جاريالىلىق» ۇعىمىنا تۇسىنىك بەردى.
«بۇل ۇعىمنىڭ مازمۇنى جوعارعى سوتتىڭ «قىلمىستىق ىستەر بويىنشا سوت ءىسىن جۇرگىزۋدىڭ اشىقتىعى قاعيداتىن ساقتاۋ تۋرالى» نورماتيۆتىك قاۋلىسىمەن تۇسىندىرىلگەن. سوت ءىسىن جۇرگىزۋدىڭ جاريالىلىعىن اشىق سوت تالقىلاۋىن وتكىزۋ عانا ەمەس, وعان تاراپتاردىڭ قاتىسۋىن, ىسكە قاتىسپايتىن باسقا تۇلعالاردىڭ قاتىسۋ مۇمكىندىگىن قامتاماسىز ەتۋ دەپ ءتۇسىنۋ كەرەك. بۇل پرينتسيپكە سوت شەشىمىن كوپشىلىك الدىندا جاريا ەتۋ جاتادى», دەدى نازگۇل راحمەتۋللينا.
ول سوت قىزمەتىندەگى جاريالىلىقتىڭ ەكى شارتىن ناقتىلادى:
ء«بىرىنشى. سوت وتىرىسىنا پروتسەسكە قاتىسۋشىلار جىبەرىلەدى جانە قاتىسادى.بۇل تەك مەملەكەتتىك ايىپتاۋشى, جابىرلەنۋشى(لەر), ولاردىڭ رەسمي وكىلدەرى, سوتتالۋشى(لار), ولاردىڭ قورعاۋشىلارى ء(تيىستى قاۋلىمەن جىبەرىلگەن جاقىن تۋىستارى), قورعاۋشى-ادۆوكاتتار.سوت تالقىلاۋىنىڭ باستى ماقساتى – قىلمىستىق ءىستى شەشۋ, ءادىل ۇكىم شىعارۋ ەكەنىن ۇمىتپاۋىمىز كەرەك.وسىعان سايكەس سوت, ەڭ الدىمەن, ايىپتاۋ جانە قورعاۋ تاراپتارىنا ولاردىڭ قۇقىقتارىن كەدەرگىسىز جانە تولىق قورعاۋ ءۇشىن جاعداي جاساۋعا مىندەتتى.
ەكىنشى. سوت تالقىلاۋى اشىق تۇردە وتەدى. ياعني, پروتسەسس تۋرالى اقپارات بارلىعىنا قولجەتىمدى بولۋى كەرەك: نە بولىپ جاتىر, كىم ايتىپ جاتىر, نە ايتادى جانە ت.ب. سوت زالىنا كەيدە بارلىق تىلەۋلەس جۋرناليستەر مەن وپەراتورلار سىيماي جاتادى. ونداي كەزدە باق-قا قولجەتىمدىلىكتى قامتاماسىز ەتۋ ءۇشىن قولدا بار تەحنولوگيالار ءساتتى قولدانىلادى. پروتسەستىڭ ونلاين ترانسلياتسياسى باسقا بولمەدە كورسەتىلەدى», دەپ جازدى جوعارعى سوتتىڭ سۋدياسى.
نازگۇل راحمەتۋللينا سوت زالىنا بارلىق كەلۋشىلەردىڭ سىيماۋ جاعدايىن ەسكەرىپ, باق ءۇشىن ونلاين اقپارات تاراتۋعا قولايلى بولمە جابدىقتالعان بولسا بۇل جۋرناليستەردىڭ كاسىبي قىزمەتىنە كەدەرگى كەلتىرۋ دەرەگىنە قيىسپايتىنىن ءتۇسىندىردى.
«باق وكىلدەرى ەگەر كورشى بولمەدە وتىرسا جانە سوت پروتسەسىن باسىنان اياعىنا دەيىن باقىلاپ, ءبارىن جازىپ الىپ, ونلاين جاريالاۋعا مۇمكىندىگى بولسا, «باق-تى سوت وتىرىسى زالىنا جىبەرمەدى دەپ ايتا الامىز با؟ مەنىڭشە, جوق.مەن بۇل تۋرالى بۇرىن دا جازدىم.سوت – قوعامنىڭ ءبىر بولىگى. وندا ءسىز سياقتى ەلىمىزدىڭ ازاماتتارى جۇمىس ىستەيدى. مىسالى, سوتتا نەمەسە باسقا دا قوعامدىق ورىنداردا ءوزىمىزدى ۇستاۋىمىز - ءوزىمىزدى قانشالىقتى قۇرمەتتەيتىنىمىزدى, تاربيە دەڭگەيىن, ءوزىن-ءوزى ۇستاۋ مادەنيەتىن كورسەتەدى. بۇل – جاس ۇرپاققا ۇلگى, الەم جۇرتشىلىعى الدىنداعى ءبىزدىڭ «كەسكىن-كەلبەتىمىز», دەدى ن.راحمەتۋللينا.