شىمكەنت قالاسى اكىمىنىڭ ورىنباسارى قىزمەتىن اتقارعان ماقسۇت يساحوۆ وتكەن جىلدىڭ جازىندا قاماۋعا الىنعان ەدى. ول 200 مىڭ دوللار كولەمىندە پارا الدى دەگەن كۇدىككە ءىلىندى, دەپ حابارلايدى Egemen.kz.
شىمكەنت اكىمىنىڭ ەكس-ورىنباسارىنا قاتىستى دەرەك قىلمىستىق ىستەر جونىندەگى مامانداندىرىلعان اۋدانارالىق سوتتا قارالىپ جاتىر. تەرگەۋ ماتەريالدارى 21 تومعا جيناقتالعان.
بۇعان دەيىن بلوگەر ايگۇل ورىنبەك ونىڭ كاسىپكەرمەن سويلەسكەن اۋديو جازباسىن جەلىگە جاريالاعان ەدى. ول جازبادا جەرگىلىكتى كاسىپكەرلەردىڭ ءبىرى 2020 جىلى قالاداعى جىلۋ قۇبىر جۇيەسىن اۋىستىراتىن مەملەكەتتىك كونكۋرسقا قاتىسقانى كورسەتىلگەن. كاسىپكەر ەڭ تومەنگى باعانى ۇسىنسا دا, اشىق كونكۋرستان شەتتەتىلىپتى. كەيىن سوت ارقىلى جەڭىسكە جەتكەن. ال اكىمدىك بەس كۇننەن كەيىن كەلىسىمشارت ۇسىنۋعا ءتيىس ەدى. الايدا ماقسۇت يساحوۆ كاسىپكەرمەن بايلانىسىپ, 187 ميلليون تەڭگە كولەمىندە پارا سۇرايدى.
سول ءساتتى كاسىپكەر ديكتوفونعا جازىپ العان.
كاسىپكەردىڭ ايتۋىنشا, قۇقىق قورعاۋ ورگاندارىنا تۇسىرگەن شاعىمدى ەشكىم ەلەمەگەن.
ەندى ايىپتالۋشىنىڭ قىلمىسقا قاتىسى بارى دالەلدەنسە, 10 جىلدان 15 جىلعا دەيىن سوتتالۋى مۇمكىن.
«التى بالام بار, ونىڭ بەسەۋى كامەلەتكە تولماعان. 75 جاستاعى كارى انام دا مەنىڭ قولىمدا. 8 ايدان بەرى تەرگەۋ كەزىندە كورمەگەن قورلىعىم جوق. ءبىر كىسىلىك كامەراعا وتىرعىزىپ قويدى. ەشكىمنىڭ باسىنا مۇنداي سىناق بەرمەسىن. ايىپ ەتپەڭىزدەر», دەگەن ماقسۇت يساحوۆ سوت الدىندا كوز جاسىنا ەرىك بەردى.