بەكزاتقا وكپە جوق

داڭقتى نۇرماگومەدوۆتەر ديناستياسى وكىلىنىڭ وسى سپورت ءتۇرىن سەرىك ەتكەنىنە سەگىز جىل بولدى. سول ارالىقتا 16 كەزدەسۋ وتكىزىپ, بارلىعىندا جەڭىسكە جەتتى. توعىز باسەكەدە ايقىن باسىمدىق تانىتتى. ۋماردان ۇتىلعاندار اراسىندا ءبىزدىڭ سەرگەي موروزوۆ تا بار. وسىدان ءۇش جىل بۇرىن ءابۋ-دابيدەگى دودادا ول وتاندا­سىمىزدى ەكىنشى راۋندتا «قىل­عىندىرۋ» ادىسىمەن ۇتتى. تاعى ءبىر ايتا كەتەرلىگى, 28 جاستاعى ۋمار – داڭقى جەر جارعان حابيب نۇر­ماگومەدوۆتىڭ نەمەرە ءىنىسى. ال تۋعان اعاسى ۋسمان دا – ناعىز «سەن تۇر, مەن اتايىننىڭ» ءوزى. ول – Bellator پروموۋشەنىنىڭ چەمپيونى. 2020 جىلدىڭ شىلدە ايىندا جەر-جاھاندى جايلاعان كوروناۆيرۋس دەرتىنەن كوز جۇمعان ايگىلى باپكەر ابدۋلماناپ ماگومەد ۇلىنىڭ وسى شاكىرتتەرىنىڭ بىردە-بىرەۋى ءالى دە جەڭىلىستىڭ كەرمەك ءدامىن تاتقان ەمەس.

بەكزات تا – وسالدار ساناتى­نان ەمەس. 26 جاستاعى قانداسى­مىز 18 جەكپە-جەكتىڭ بى­رەۋىن­دە عانا ۇتىلدى. 2020 جىلدىڭ قازان ايىندا ول ويدا-جوقتا قىرعىزستاندىق سۇلتان جولداشبەككە جول بەردى. 17 جە­ڭىسىنىڭ 15-ىندە الماحان ايقىن باسىمدىق تانىتتى. تارقاتىپ ايت­ساق, 13 قارسىلاسىن ۇرىپ شى­عىپ, ەكى رەتىندە «قىلعىندىرۋ» ءتاسىلىن قولداندى.

كەشەگى لاس-ۆەگاستاعى جارىستا كورەرمەندەردىڭ سپورت كەشە­نىن باسىنا كوتەرىپ, ايعايعا باسقاندارىنا قاراپ, ۋمار نۇرماگومەدوۆتى قولداۋ ءۇشىن بۇكىل دا­عىستان امەريكاعا كوشىپ كەلگەندەي اسەردە بولدىق. بىراق بۇل جاعداي قانداسىمىزعا ەش اسەر ەتكەن جوق. ازۋلى قارسىلاسىمەن ول ايانباي ايقاستى. نەگىزىندە بەكزات تىك تۇرىپ توبەلەسۋدى قالادى. ال گرەپپلينگى وتە كۇشتى ۋمار كۇ­رەستىڭ ادىسىنە جۇگىنۋدى قۇپ كوردى. قاپ تاۋىنىڭ قىرانى قازاقتىڭ ۇلىن قايتا-قايتا جىعىپ الىپ, ەركىن كوسىلۋىنە مۇمكىندىك بەرمەدى. جەردە جاتىپ ارپالىسقان ساتتەردە نۇرماگومەدوۆ الماحاندى بىرنە­شە رەت «سابميشن» تاسىلدەرىن قول­دانىپ, «قاقپانعا» تۇسىرگىسى كەلدى. دەسەك تە قازاق سپورتشىسى بارلىق قاۋىپتىڭ بەتىن قايتاردى. سوڭعى راۋندقا دەيىن سوزىلعان سايىستىڭ قورىتىندىسىندا تورەشىلەر ۋمار­دى جەڭىمپاز دەپ تانىدى.

بەكزات الماحان لاس-ۆەگاستاعى جارىستا جەڭىلىس تاپسا دا, وعان وكپە ايتقان ەشكىم جوق. بىرىنشىدەن, بۇل – قانداسىمىزدىڭ UFC-دەگى تۇساۋكەسەر كەزدەسۋى. ەكىنشىدەن, الەمدەگى ەڭ بەلدى پروموۋشەننىڭ پرەزيدەنتى دانا ۋايت ونى بىردەن وتە مىقتى سپورتشىعا قارسى شىعاردى. شىنى كەرەك, جەڭىل سالماقتا ونەر كورسەتىپ جۇرگەن «مەن» دەگەن جىگىتتەردىڭ دەنى نۇرماگومەدوۆپەن جەكپە-جەككە شىعۋعا جۇرەكسىنەدى. وز­گەلەردى ايتپاعاندا, توپ-10-دىققا كىرەتىن فايتەرلەردىڭ وزدەرى داعىستاندىقتىڭ ەسىمىن ەستىسە, توبە شاشتارى تىك تۇرادى. ال بەكزات بولسا, ۋمارمەن كۇش سى­ناسۋدان باس تارتقان جوق. ۇيىم­داستىرۋشىلار تاراپىنان ۇسىنىس تۇسكەندە بىردەن كەلىسىمىن بەردى. وكتاگوندا ول ازۋلى ءارى قارۋلى قارسىلاسىمەن ەش ايانباي ايقاستى. سول سەبەپتى دە قازاقتىڭ قايسار ۇلى ءدۇيىم جۇرتتىڭ قوشەمەتىنە بولەندى. ەڭ باستىسى, ول ءوزىنىڭ جۇ­رەكتى جىگىت ەكەنىن مويىنداتتى. ۋاقىت وزا بەكزاتتىڭ UFC-دە تو­بەلەسىپ جۇرگەن تالاي ساڭلاقتاردى سا­بايتىنىنا قىلاۋداي دا كۇما­نىمىز جوق.