باحا ءبۇبىحانوۆا دەگەن كىم, ونىڭ اتىنداعى العاشقى بايقاۋدىڭ باس جۇلدەسى نەگە قىرعىز جاستارىنا بۇيىردى دەگەن ساۋالعا جاۋاپ بەرمەس بۇرىن, وسى جارىستىڭ اقتىق سىنىنا شىققان جاس سۋرەتشىنىڭ جۇمىسى ءا.قاستەەۆ اتىنداعى مەملەكەتتىك ونەر مۇراجايىنىڭ قورىنا قوسىلاتىنىن ايتا كەتۋ كەرەك.
بۇل كۇندەرى الماتىداعى Aspan Gallery الاڭىندا ءساۋىردىڭ اياعىنا دەيىن ايالدايتىن B.Bubikanova Art Prize بايقاۋى قاتىسۋشىلارىنىڭ كورمەسى ءوتىپ جاتىر. العاش رەت ۇيىمداستىرىلعان ب.ءبۇبىحانوۆا اتىنداعى بايقاۋعا باستاپقىدا الەمنىڭ 35 ەلىنەن ءارتۇرلى تەحنيكادا ورىندالعان 188 تۋىندى تۇسسە, ونىڭ ىشىندە 11 ءفيناليستىڭ جۇمىسى Aspan Gallery الاڭىنداعى كورمەگە قويىلدى.
سونىمەن ءا.قاستەەۆ اتىنداعى ءموم ساراپشىلارىنان قۇرالعان ىرىكتەۋ كوميسسياسىنىڭ تاڭداۋى – 32 جاستاعى مادينا جولدىبەكتىڭ «كادىمگى جۇلدىز», «نەيتروندى جۇلدىز», «قارا قۇردىم» اتتى تريپتيح جانرىنداعى جۇمىسىنا ءتۇستى. كارتينا گونكونگ پەن پاريجدەگى كورمەلەرگە قاتىسقان. وسى ەڭبەگى ءۇشىن اباي اتىنداعى ۇلتتىق وپەرا جانە بالەت تەاترىنىڭ ديرەكتورى جوبا دەمەۋشىسى – اينۇر كوپباساروۆا تاعايىنداعان 1 000 000 تەڭگە كولەمىندەگى جۇلدەگە يە بولدى.
ال بايقاۋدىڭ باس جۇلدەسى بىشكەكتەن كەلگەن «زامانباپ ونەرى» توبىنىڭ «قىشقى تەاتر» (قىسقى تەاتر) ينستاللياتسياسىنا بۇيىردى. چىنگىز ايداروۆ, ايزۋرۋ باقالوۆ, مارات رايىمقۇلوۆ سىندى جاستاردان قۇرالعان ونەر ۇجىمى 2022 جىلى بىشكەك قالاسىندا دۇنيەگە كەلگەن. اۆتورلارىنا قۇلشىنىس پەن قۋانىش سىيلاعان ينستاللياتسيانى Almaty Museum of Arts ساتىپ الىپ, 1 000 000 تەڭگە كولەمىندە سىياقى تاعايىندادى.
ءبىرىنشى بايقاۋدا باعى جانعان مادينا جولدىبەك: «شىنىمدى ايتسام, بايقاۋدا جەڭىمپاز بولامىن دەپ ويلامادىم. ويتكەنى مەملەكەتتىك مۇراجاي وسىناۋ اشىق بەينەلەنگەن انا بولۋ, بالا ەمىزۋدىڭ كوزدەن تاسا تۇستارى جايىنداعى ديسكۋسسياعا ازىرگە دايىن ەمەس دەپ ويلادىم. بۇل تاقىرىپتا ءالى دە تاپتاۋرىن كوزقاراستار مەن ميف وتە كوپ. مەن كىشىگىرىم بولسا دا انالاردىڭ ءوز ويىن جەتكىزۋدە ىلگەرىلەۋلەردىڭ بار ەكەنىن بايقايمىن», دەيدى.
«بايقاۋ جاريالانعاننان كەيىن قاتىسۋعا بەل بۋدىق. باقىت ءبۇبىحانوۆا – ايماقتىق كوركەم ۇدەرىستىڭ ءبىر بولىگى. سۋرەتشىنىڭ قالدىرعان جۇمباقتارىن ءالى ۇزاق ۋاقىت بويى شەشۋگە تۋرا كەلەدى. ول قاراپايىم دا ناقتى جۇمىس ىستەۋدىڭ جولىن كورسەتىپ, ارت ەتيكەتتىڭ تىزبەكتىك ەرەجەلەرىن ۇستانباي-اق, قاتەلەسۋدەن قورىقپاۋعا جانە ءتىپتى مۇنىڭ كەرەك ەكەندىگىن پاش ەتە ءبىلدى», دەيدى سۋرەتشى مارات رايىمقۇلوۆ.
الماتى