سەناتور گەننادي شيپوۆسكيح ۇكىمەت باسشىسى ولجاس بەكتەنوۆتىڭ اتىنا دەپۋتاتتىق ساۋال جولداپ, ەلدە سينتەتيكالىق ەسىرتكىنىڭ تارالۋ پروبلەماسى ۋشىعىپ بارا جاتقانىنا الاڭداۋشىلىق ءبىلدىردى, دەپ جازادى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
دەپۋتات بالالار مەن جاسوسپىرىمدەر سينتەتيكالىق ەسىرتكىنىڭ كەڭ تارالۋ قاۋپىنە ۇشىرايتىن ەڭ وسال ورتا سانالاتىنىن ەسكەرتتى. ونىڭ ايتۋىنشا, قاسكويلەر ەسىرتكىنى ينتەرنەت-مەسسەندجەرلەر ارقىلى ارزان باعامەن ساتىپ جاستاردى ۋلايدى, تاۋەلدى ەتەدى.
2021-2023 جىلدار ارالىعىندا سينتەتيكالىق ەسىرتكى زاتتارىن تاراتقانى ءۇشىن 1 021 ادامنىڭ ۇستىنەن قىلمىستىق ءىس قوزعالدى. سوڭعى 3 جىلدا سينتەتيكالىق ەسىرتكىنى الۋ كولەمى 100 كگ-نان 1 تونناعا دەيىن ءوستى. 2021 جىلى 17, 2022 جىلى 68 جانە 2023 جىلى 81 ەسىرتكى زەرتحاناسىنىڭ قىزمەتى انىقتالدى.
«ەسىرتكى قاۋپىنە بەلسەندى قارسى تۇرۋ – مەملەكەت پەن قوعامنىڭ ەڭ ماڭىزدى مىندەتتەرىنىڭ ءبىرى. ەلدەگى ەسىرتكى ساۋداسىنىڭ ورشۋىنە بايلانىستى تىكەلەي پرەزيدەنتكە باعىنىشتى ارنايى ەسىرتكىگە قارسى قىزمەت جۇرگىزەتىن جەكە-دارا مەكەمە قۇرۋ مۇمكىندىگىن قاراستىرۋدى سۇرايمىز. سينتەتيكالىق ەسىرتكىنى ساتۋعا قاتىساتىن سايتتاردىڭ جارنامالاۋ فاكتىلەرىنىڭ جولىن كەسۋ جونىندەگى جۇمىستى كۇشەيتىپ, جارنامالاۋشىلاردى قاتاڭ جازالاۋ قاجەت. مەكتەپ, كوللەدجدەر مەن جوعارعى وقۋ ورىندارىندا وقيتىن جاستارعا ەسىرتكىنى تاراتۋدىڭ سالدارى تۋرالى ءتۇسىندىرۋ شارالارىن جانداندىرۋ قاجەت. جاستار, اسىرەسە ستۋدەنتتەر اراسىنداعى سينتەتيكالىق ەسىرتكىنى تاسىمالداۋشىلاردىڭ (جاسىرىن قويىپ كەتۋشى) سانىنىڭ وسۋىنە بايلانىستى ناقتى ءىس-شارالار جوسپارىن ازىرلەۋدى ورىندى دەپ سانايمىز», دەدى گ.شيپوۆسكيح.