پوليتسيا قىزمەتكەرلەرى قازاقستان اۋماعىندا ەسىرتكى ساتپاق بولعان شەتەلدىكتەن قۇنى 3 ملن تەڭگە بولاتىن گاشيش تاركىلەدى, دەپ جازادى Egemen.kz Polisia.kz-كە سىلتەمە جاساپ.
«كوكشەتاۋ قالاسىنداعى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى تىيىم سالىنعان زاتتاردى وتكىزدى دەگەن كۇدىكپەن تاجىكستان رەسپۋبليكاسى ازاماتىنىڭ زاڭسىز قىزمەتىن توقتاتتى.
شەتەلدىكتىڭ جۇمىسقا ورنالاسۋ ماقساتىندا قازاقستان اۋماعىنا كەلگەنى الدىن الا انىقتالدى. كۇدىكتىنىڭ باستى ماقساتى ەسىرتكىنى تەك اقمولا ءوڭىرىنىڭ اۋماعىندا عانا ەمەس, كورشى وبلىستاردا دا تاراتۋ بولعان. ۇستاۋ كەزىندە جەدەل قىزمەتكەرلەر ديلەردەن سالماعى 965 گرامنان اساتىن كىرپىش تۇرىندەگى تسەللوفان پاكەتىن تاۋىپ, تاركىلەدى. ساراپتاما كورسەتكەندەي, تاركىلەنگەن زات گاشيش ەسىرتكى قۇرالى بولىپ شىقتى, ال مۇنداي «كىرپىشتىڭ» قۇنى 3 ملن تەڭگەدەن اسادى. اتالعان دەرەك بويىنشا قىلمىستىق ءىس قوزعالدى», دەلىنگەن اقپاراتتا. ەسىرتكى ساتۋشى ۋاقىتشا ۇستاۋ يزولياتورىنا قامالدى.