2024 جىلعى 29 اقپاننان 1 ناۋرىزعا قاراعان ءتۇنى ماڭعىستاۋ, اتىراۋ, باتىس قازاقستان, اقتوبە جانە قىزىلوردا وبلىستارىنان باسقا بارلىق ايماقتار بىرىڭعاي ۋاقىت بەلدەۋىنە كوشەدى, دەپ حابارلايدى Egemen.kz قر تسيفرلىق دامۋ, يننوۆاتسيالار جانە اەروعارىش مينيسترلىگىنە سىلتەمە جاساپ.
وسى ءىس-شارانى جۇزەگە اسىرۋ ماقساتىندا كەلەسى شارالار قابىلداندى:
1. IANA (ينتەرنەت مەكەنجاي كەڭىستىگىنىڭ اكىمشىلىگى), حەبو, رسس, ICANN, IETF, IESG سىندى حالىقارالىق ۇيىمدارعا قازاقستاننىڭ بىرىڭعاي 5-ءشى ۋاقىت بەلدەۋىنە كوشۋى, سونداي-اق قازاقستان ءۇشىن ۋاقىت بەلدەۋلەرىنىڭ (time zone database) جالپىعا قولجەتىمدى دەرەكقورىنداعى دەرەكتەردى جاڭارتۋ قاجەتتىلىگى تۋرالى رەسمي حابارلاندى.
وسىعان بايلانىستى ابونەنتتەر شىعارىلعان جاڭارتۋلاردى Android جانە IOS سياقتى حالىقارالىق وپەراتسيالىق جۇيەلەرمەن جاڭارتۋى قاجەت.
2. تسيفرلىق دامۋ ءمينيسترىنىڭ تاپسىرماسىنا سايكەس, بايلانىس وپەراتورلارى:
وزدەرىنىڭ اقپاراتتىق جۇيەلەرىنىڭ قاجەتتى ولشەمدەرىن دايىنداۋ بويىنشا ۇيىمداستىرۋشىلىق-تەحنيكالىق ءىس-شارالارىن وتكىزەدى; ۇيالى بايلانىس وپەراتورلارىنىڭ قىسقا ماتىندىك حابارلامالاردى جىبەرۋىن, سونداي-اق ينتەرنەت-رەسۋرستا جانە ءموبيلدى قوسىمشادا (بار بولعان جاعدايدا) حابارلاۋدى قوسا العاندا, قىزمەت كورسەتۋ ارنالارى ارقىلى ءوز ابونەنتتەرى مەن پايدالانۋشىلارىنا جۇرگىزىلىپ جاتقان جۇمىستار تۋرالى الدىن الا حابارلاۋ بويىنشا شارالاردى جۇزەگە اسىرادى; ينتەرنەتتى قوسا العاندا, ۇسىنىلاتىن بايلانىس سەرۆيستەرى مەن قىزمەتتەرىنىڭ تۇراقتىلىعىن ساقتاۋ, سونداي-اق ءتاريفتىڭ اي سايىنعى تولەمىن ەكى ەسە ەسەپتەۋ جاعدايلارىن بولدىرماۋ ماقساتىندا تەحنيكالىق ينفراقۇرىلىمدى دايىندايدى.تولىعىراق اقپارات الۋ ءۇشىن بايلانىس وپەراتورلارىنا حابارلاسۋعا بولادى.