26 اقپان مەن 3 ناۋرىز ارالىعىندا تايپەيدە مانەرلەپ سىرعاناۋدان جاستار اراسىنداعى الەم بىرىنشىلىگىنىڭ جالاۋى جەلبىرەيدى. بۇل جارىستىڭ جەكەلەگەن سايىسىندا قازاقستاننىڭ ەكى ورەنى ونەر كورسەتەدى. ولار – ولەگ مەلنيكوۆ پەن ەكاتەرينا باليۋبا.
1976 جىلدان بەرى ۇزدىكسىز ۇيىمداستىرىلىپ كەلە جاتقان جارىستا قازاقستان قۇراماسى كومانداسىنىڭ مۇشەلەرى تەك ءبىر رەت جەڭىس تۇعىرىنا كوتەرىلدى. ونداي باق ميحايل شادوروۆقا بۇيىردى. الماتىنىڭ تۋماسى 2022 جىلى ەستونيانىڭ استاناسى تالليندە وتكەن بايراقتى باسەكەدە كۇمىس مەدالدى ولجالادى.
وزگەلەردى ايتپاعاندا, دەنيس تەن مەن ەليزابەت تۇرسىنباەۆاعا دا جاستاردىڭ الەم بىرىنشىلىگىندە جۇلدە الۋ باقىتى بۇيىرعان جوق. ماسەلەن, تەن جاسوسپىرىمدەر مەن جاستار بۋىنى اراسىنداعى باسەكەلەرگە بەس مارتە قاتىستى. ەڭ ۇزدىك كورسەتكىشى – 4-ورىن. 2015 جىلى ەليزابەت تۇرسىنباەۆا 4-ورىننان اسا المادى.
ەسەسىنە ەرەسەكتەر دۋىنا ەركىن قوسىلعان قوس جەرلەسىمىز وزدەرىنىڭ اسقان شەبەرلىگىمەن جاھان جانكۇيەرلەرىن ءتانتى ەتتى. دەنيس تەن 2014 جىلى سوچي وليمپياداسىندا كۇمىس السا, 2013 جىلى لوندون جانە 2015 جىلى شانحايداعى الەم چەمپيوناتتارىندا ەكىنشى جانە ءۇشىنشى ورىنداردى يەلەندى. دۇنيەجۇزىلىك ۋنيۆەرسيادا, ازيا ويىندارى جانە ءتورت قۇرلىق بىرىنشىلىكتەرىن ۇتتى. كىم ءبىلسىن, ەگەر 2018 جىلدىڭ شىلىڭگىر شىلدەسىندە جول تورىعان جاۋىزدار دەنيستى ءولتىرىپ كەتپەگەندە, اتاعى الىسقا جايىلعان سپورتشىنىڭ تۇعىرى بۇگىنگىدەن دە بيىك بولار ما ەدى؟!
ەليزابەت 2019 جىلى سايتاماداعى الەم چەمپيوناتىندا, كراسنويارسكىدەگى دۇنيەجۇزىلىك ۋنيۆەرسيادادا جانە اناحايمداعى ءتورت قۇرلىق بىرىنشىلىگىندە كۇمىس مەدالدى موينىندا جارقىراتتى. جوعارىدا اتالعان جارىستاردا ەليزابەتتىڭ مۇز ايدىنداعى مىڭ بۇرالعان ءبيى مەن ورەلى ونەرىنە سۇيسىنگەن تورتكۇل دۇنيە جانكۇيەرلەرى قۇلشىنا قول سوقتى. ەڭ وكىنىشتىسى, ەسكى جاراقاتى ءجيى-ءجيى مازالاعاننان سوڭ, 2021 جىلى ناعىز كەمەلدەنگەن 21 جاسىندا سۇلۋ دا سىمباتتى قىز ۇلكەن سپورتپەن تۇبەگەيلى قوش ايتىستى.
جاستار اراسىنداعى سوڭعى الەم بىرىنشىلىگى 2023 جىلى كانادانىڭ كالگاري قالاسىندا ءوتتى. ۇلداردىڭ باسەكەسىندە جاپونيانىڭ جاس جۇلدىزدارى كاو ميۋرا التىن السا, نادزومۋ ەسيوكا قولاعا قول سوزدى. شۆەيتساريانىڭ تۋى استىندا ونەر كورسەتەتىن تاعى ءبىر جاپون جىگىتى ناوكي روسسي كۇمىسپەن كۇپتەلدى. قىزداردىڭ سايىسىندا كۇنشىعىس ەلىنەن كەلگەن ماو سيمادا باس جۇلدەنى ولجالاسا, امي ناكاي ۇزدىك ۇشتىكتى تۇيىندەدى. وڭتۇستىك كورەيانىڭ وكىلى سين دجيا كۇمىس مەدالدى موينىنا ءىلدى. جۇپتىق جارىستا امەريكالىق سوفيا بارام مەن دەنيەل تيۋمەنتسەۆ توپ جارسا, سپورتتىق بيدە چەحيالىق كاتەرجينا مرازكوۆا مەن دانيەل مرازەكتىڭ مەرەيى ۇستەم بولدى.
ۇيەڭكى جاپىراقتار ەلىندە قازاقستاننىڭ مانەرلەپ سىرعاناۋشىلارى اراسىنان دياس جيرەنباەۆ پەن راحات برالين قىسقا باعدارلامادا ءتاۋىر سىرعاناپ, فينالدىق كەزەڭگە ءوتتى. بىراق شەشۋشى تۇستا ولار كەڭىنەن كوسىلە الماي, قالىڭ توپتىڭ اراسىندا قالىپ قويدى. قوس جاتتىعۋدىڭ قورىتىندىسى بويىنشا دياس 16-ورىنعا تۇراقتاسا, راحات 20-ساتىعا جايعاستى. ال ولەگ مەلنيكوۆ پەن اننا لەۆكوۆەتس 35-ورىندى قاناعات تۇتتى.
تايپەيدەگى بىرىنشىلىكتە ەكى وتانداسىمىزدىڭ باق سىنايتىنىن جوعارىدا ايتتىق. 18 جاستاعى ولەگ مەلنيكوۆ 2022 جىلى تۇركيادا وتكەن بوسفور كۋبوگىندە ءۇشىنشى ورىندى يەلەندى. بۇل – ونىڭ حالىقارالىق جارىستارداعى ونىڭ ەڭ ۇزدىك ناتيجەسى. سونىمەن قاتار مەلنيكوۆ بىلتىر كالاگاريدەگى باسەكەدە باق سىناپ, سول ساپاردان ءبىراز تاجىريبە جيناپ قايتقان. 14 جاستاعى ەكاتەرينا باليۋبا ءۇشىن بۇل – العاشقى ءدۇبىرلى دودا. ول ەلىشىلىك جارىستاردا جۇلدە الىپ, ماجارستانداعى «Jegvirag Cup» تۋرنيرىندە ۇزدىك ۇشتىكتىڭ قاتارىنان كورىندى.