1 ناۋرىزدا قازاقستاندا ۋاقىت بەلدەۋى اۋىسادى. وسىعان بايلانىستى وقۋ-اعارتۋ ءمينيسترى عاني بەيسەمباەۆ ۇكىمەتتە وتكەن بريفينگتە مەكتەپتەردە ساباقتىڭ باستالۋ ۋاقىتى دا وزگەرۋى مۇمكىن ەكەنىن مالىمدەدى, دەپ جازادى Egemen.kz kaz.tengrinews.kz-كە سىلتەمە جاساپ.
عاني بەيسەمباەۆ ەلىمىزدىڭ بىرىڭعاي ۋاقىت بەلدەۋىنە كوشۋى ساراپشىلار مەن عالىمداردىڭ زەرتتەۋىنەن كەيىن ماقۇلدانىپ وتىرعانىن العا تارتتى. جاڭا ۋاقىتقا بايلانىستى ساباقتىڭ باستالۋ ۋاقىتىن بەلگىلەۋ پارمەنى اكىمدىكتەردىڭ قۇزىرەتىنە بەرىلمەك.
«وقۋ ۋاقىتىنا كەلەتىن بولساق, بۇل جەردە, ارينە, قاجەت بولعان جاعدايدا ساباقتىڭ باستالۋ ۋاقىتىن قايتا قاراۋعا اكىمدىكتەرگە مۇمكىندىك بەرەمىز, ەشقانداي كەدەرگى جوق. مىسالى, 8:00-دە ساباق باستالاتىن مەكتەپتەر ساعات 8:30-دا باستاي الادى جانە ت.ب. مۇندا ءاربىر ۇيىم مەن اكىمدىكتە دەربەس شەشىم قابىلداۋعا بولادى», دەدى وقۋ-اعارتۋ ءمينيسترى.