بۇگىن ۇكىمەت وتىرىسىندا «جايلى مەكتەپ» ۇلتتىق جوباسىن ىسكە اسىرۋ بارىسى قارالدى. جيىندا پرەمەر-مينيستر «جايلى مەكتەپ» جوباسىن ىسكە اسىرۋدا بەلگىلى ءبىر شيكىلىكتەر بارىن ايتتى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ۇكىمەت باسشىسىنىڭ ايتۋىنشا, مەكتەپتەر ءاۋ باستان تسيفرلىق كامەرالارمەن جابدىقتالىپ, پوليتسيانىڭ جەدەل باسقارۋ ورتالىقتارىنا جالعانۋى ءتيىس. وعان قوسا جاڭا, ينتەراكتيۆتى وقىتۋ ادىستەرىن قولدانۋعا مۇمكىندىك بەرەتىن جىلدامدىعى جوعارى ينتەرنەت جۇرگىزىلۋى كەرەك.
پرەمەر-مينيستر ۇلتتىق جوبانى ىسكە اسىرۋدا بەلگىلى ءبىر شيكىلىكتەر بارىن ايتتى. اتاپ ايتقاندا, مەملەكەت باسشىسى ۋچاسكەلەردى بولۋ جانە جوبالىق قۇجاتتامانى ازىرلەۋ قارقىنىن سىنعا الدى. وسىعان بايلانىستى بارلىق پروبلەمانى قىسقا مەرزىمدە جويۋ تاپسىرىلدى.
«قۇرىلىس ماتەريالدارىن, جابدىقتار مەن جيھازداردى ساتىپ الۋ ىسىنە بارىنشا وتاندىق وندىرۋشىلەردى تارتۋ قاجەت. جالپى مەملەكەت باسشىسىنىڭ جاڭا فورماتتاعى مەكتەپتەر سالۋ تۋرالى تاپسىرماسىن ورىنداۋ ءۇشىن بار كۇشىمىزدى جۇمىلدىرۋىمىز كەرەك», دەدى ول.
وعان قوسا ۇكىمەت باسشىسى وبەكتىلەر اشىلعاننان كەيىن بىردەن ناقتى جوسپارلى وقۋ پروتسەسىن ۇيىمداستىرۋ ءۇشىن سالىنىپ جاتقان مەكتەپتەردى الدىن الا پەداگوگ كادرلارمەن قامتاماسىز ەتۋ كەرەك ەكەنىن ايتتى.
ء«بىز ۇلتتىق جوبانى ىسكە اسىرۋ بارىسىن ماۋسىم ايىندا قايتا قارايمىز. ەگەر جۇمىس ءتاسىلى وزگەرمەسە, جاۋاپتى تۇلعالارعا قاتاڭ شارالار قولدانىلادى», دەپ تۇيىندەدى ولجاس بەكتەنوۆ.