باسىڭ اۋىرىپ, بالتىرىڭ سىزداسا, ەم-دوم ىزدەپ باراتىنىڭ كىم؟ جانىڭ شىرقىراپ, كەۋدەڭ قىسىپ, ۇيقىڭ قاشىپ, اقىلىڭ اداسقاندا الاسۇرىپ تاعى دا ىزدەيتىنىڭ كىم ەدى؟ ارينە, دارىگەر. دارىگەرلىكتىڭ باستاۋى – تامىرىڭدى ۇستايتىن, جۇرەك قاعىسىڭدى ءبىرىنشى بولىپ تىڭدايتىن تەراپەۆت.
ەندەشە, اڭگىمە كەۋدەسىنە دارىگەرلىك ورناپ, ساۋساقتارىنا مىڭ-سان شيپا قونعان, سىرقاتتانىپ كەلگەن ءاربىر جاننىڭ جۇزىنە شۋاق سىيلاعاندا, «باياندى باقىتىم باسىمدا تۇر!» دەپ جارىلا قۋاناتىن, اينالاسىنا شاپاعات شاشۋدان شارشامايتىن شىرايلى ءبىر جان تۋرالى بولادى. ول – استانالىق دارۋمەن ەگۋشى مايا مولداحان.
كەيىپكەرىمىزدىڭ اكەسى مولداحان تۇرعىنباي ۇلىنىڭ اتا-باباسى ءتۇپ-تۇقياننان بەرى ءبورىلى بايراق تىگىلگەن وسىناۋ بايان-ولگەيدە تابان اۋدارماي تىرشىلىك كەشىپ كەلگەن. توقپاعى كوپ بولعان 90-جىلدارى قازاقتىڭ تاۋەلسىزدىك تۋى تىك كوتەرىلگەن شاقتا ءتۇرلى جاعدايمەن كورشى ەلدەر قارماپ قالعان الاشتىڭ بايىرعى مەكەنىن ءالى كۇنگە كەڭ جايلاپ وتىرعان كيىز تۋىرلىقتىڭ سانالى ۇل-قىزدارىنىڭ كەيبىرى انتالاعان ارماننىڭ اساۋ ارعىماعىن اتاجۇرتقا بۇردى. ول كەزدە مايا قىز – ۇلانباتىر مەديتسينا ۋنيۆەرسيتەتىنىڭ 1-كۋرس بىلىمگەرى. كەلەر جىلى ءوزى قۇرالپى كوپ جاقسىمەن كوكجيەگى مەنمۇندالاپ, كۇن ديدارلى كوك تۋى جەلبىرەگەن قازاقتىڭ كىندىك جەرىنە جونەلدى دە كەتتى. وندا دا ەل ەتەگىندە قالىپ قويماي, ارقانىڭ ءتورى – استاناعا كەلگەن.
جىلى قۇشاعىن اشقان اتاجۇرتتا 6 جىلدا دارىگەرلىكتىڭ بارلىق وقۋىن اداقتاپ, 6 بالانى قاتارىنان كەم قىلمايمىن دەپ كۇندى كۇنگە, تاڭدى تاڭعا ۇرىپ ءجۇرىپ دەنساۋلىعىنان ايىرىلعان, اۋرۋشاڭ اناسىن ايالاپ, ەمدەپ, قايىرا اياققا تۇرعىزارى انىق. تەك سابىرمەن اللانىڭ مەيىرىمىنە بولەنىپ, پاناسىندا تۇرا تۇرسا بولعانى.
ادامنىڭ ايتقانىنىڭ ءبارى ورىندالعان با؟ كەيدە تاعدىردىڭ جازۋى مەن ءومىردىڭ شىن ورنەگى مۇلدە بولەك بولۋى بەك ىقتيمال. ارادان جىل وتەر-وتپەستە باقىتىنىڭ بەرىك بايلاۋى – بالالارىنىڭ اسقار تاۋدان بيىك اكەسى, ماڭگىلىك ماحابباتتىڭ باس يەسىن جولىقتىردى. جاستىقتىڭ لاپىلداعان جالىنى قانداي دا كەدەرگى مەن كۇدىك-كۇماندى ورتەپ, ك ۇلىن كوككە ۇشىرماي ما؟ كوزىڭ مەن كوڭىلىڭە عاشىق جاردىڭ تۇلعاسى عانا كورىنىپ, قۇلاعىڭا سونىڭ عانا جۇرەك قاعىسى ەستىلمەي مە؟ سونىمەن بەرىمباي بالاسى امانبولمەن ءبىر جاستىققا باس قويىپ, جۇماقتان كەلگەندەي جۇپارعا قالىڭ ورانىپ, جاڭا ومىرگە قادام باستى.
تۇرمىستا ءجۇرىپ, وقۋدى تەڭ ۇستاۋ دا جەڭىل بولا قويعان جوق. ەرى جەر-انادان ريزىق ايىرۋعا اگرونوم ماماندىعى بويىنشا ءتالىم السا, مايا ادام بويىنداعى سىرقاتتىڭ سىرىن ىزدەپ, تاپقانىنىڭ سەبەپ-سالدارىن زەرتتەۋمەن الەك. وقۋى اياقتالار تۇستا ساعىنىشى مەن اڭسارىن القالاعان, قىزىنىڭ تىلەۋىن تىلەپ, جولىنا قاراپ جۇرگەن اياۋلى اناسىنان ءبىر جاپىراق حات كەلدى. «بوتام, دارىگەرلىكتى وقىپ ەمدەيمىن, اياققا تۇرعىزامىن دەگەن ۋادەڭ قايدا؟ استانادا قالماعىڭ انىق پا؟», دەپ جازىلعان. ساعىنىشقا تولى جۇرەگى تارس جارىلدى. جولعا قامداندى. «استانادا قالايىق» دەۋمەن ەمىرەنگەن جارى بۇل جولى جانىنا شىن جالاۋ بولدى. جولىن بايلامادى. مۇنداعى شارۋاسىن رەتتەپ, اراعا 3-4 اي سالىپ ءوزى دە ورالدى. ويتكەنى قازاق پەن موڭعولدىڭ تەڭ جازۋشىسى اتانعان اكەسى بەرىمباي ىسقاق ۇلى مەن مۇقىم اۋلەتى ءالى بايان-ولگەيدە ەدى.
اقمولا ەلوردا بولىپ, الماتىدان استاناعا تارتىلعان ۇلى كوش باستالعان شاقتا ناۋقاس اناسىنىڭ شاقىرتۋىمەن بابالارى قۇت مەكەن ەتكەن بايان-ولگەي جەرىنە تەراپەۆت مايا سولاي قايتا باردى. تۇرمىستاعى قىز بولسا دا دىمكاس اناسىن قولىنا الدى. بۇل – اعا-جەڭگەنىڭ كەمشىلىگى, جاماندىعى ەمەس. جالپى, مەديتسينا دارىگەرى سىرقات ابدەن مەڭدەگەن انا دەنساۋلىعىن ءوزى قالپىنا كەلتىرگىسى كەلدى.
دۇنيەدەن ەرتە كوشكەن اكە اماناتىن ورىنداۋدى ماقسات ەتتى. ول كەزدە مايا 5 جاستا, اكە موينىندا وتىرىپ مەيلىنشە ەركەلەيتىن. ساۋدا مەكەمەسىندە ەكونوميست-بۋحگالتەر بولعاندىقتان با, ۇستەلى قاعازعا تولىپ جاتاتىن اكەسى بالاجان ەدى. بوتالارىن وبەكتەپ, جاقسى ازامات, مىقتى مامان بولۋ كەرەك ەكەنىن ەركەلەتە ءجۇرىپ, قۇلاعىنا قۇياتىن.
اۋىرىپ تۇرسا دا اينالىپ-تولعانۋىن تولاستاتپايتىن اياۋلى اناسىن 5 جىل ەمدەدى. وڭىردە سىرقاتقا شالدىققان قانشاما ادامنىڭ دەنساۋلىعىن تۇزەپ, قالىپتى ومىرگە قايتا اكەلدى. شيپاسىن الىپ, شىن ريزا بولعان جۇرتتىڭ العىسى مەن باتاسىنا كومىلىپ, جان اسىلى اناسىن كۇتىپ باقتى. تاعدىردىڭ جازۋىنا, حاق تاعالانىڭ بۇيرىعىنا داۋا دا, شارا دا جوق. ومىردەن ەرتە كەتكەن اكەسى مەن اپكەتايىنىڭ ارتىنان اناسى دا باقيعا وزىپ جۇرە بەردى. ءۇش اعا مەن ءبىر ءىنى اراسىندا ءبىر تال قىز كوزدىڭ جاسىن كولدەتتى.
دارىگەرلىك ءومىردىڭ 25-جىلىن جالعاستىرعان مايانىڭ تۇڭعىشى – قىز. قىتاي مەن اعىلشىن تىلدەرىنىڭ مامانى. ارينە, ولاردىڭ الدىندا تۇرعان انا ءتىلى مەن ورىس ءتىلى تاعى بار. كاسىپكەر كۇيەۋىمەن بىرگە 3 جيەندى تاربيەلەپ, ءوسىرىپ جاتىر. ءالى دە كوبەيە بەرسەك دەگەن نيەت, تىلەكتەرى ءتۇزۋ. تۇڭعىشتىڭ سوڭىنان ەرگەن ءىنىسى مەن ءسىڭلىسى دە ەرجەتىپ, بويجەتىپ قالعان.
جوعارى وقۋدى استانادا ءتامامداپ, ەڭبەك جولى – ناعىز دارىگەرلىكتى موڭعول ەلىندە باستاعان كەيىپكەرىمىز جاڭا مىڭجىلدىقتىڭ ءۇشىنشى جىلى ءبىلىم الىپ, ازامات بولىپ قالىپتاسقان قالاسىنا قايتا ورالدى. ء«داستۇرلى مەديتسينا ورتالىعىنا» قىزمەتكە تۇردى. ارادا «تەمىر جول» اۋرۋحاناسى ەمحاناسىندا ەڭبەك ەتىپ, 2020 جىلى قازىرگى قالالىق №14 ەمحاناعا الماستى. بۇكىل سانالى ومىرىندە ادام ەمدەپ كەلە جاتقان كەيىپكەر ەل-جۇرتتىڭ تىنىشتىعىن, وتباسىنىڭ اماندىعىن, قولىنان ەم-دوم العان جانداردىڭ قاتارعا قايتا قوسىلعانىن باياندى باقىتى سانايدى.