تەننيستەن دوحادا ءوتىپ جاتقان WTA-1000 دوداسىندا ەلەنا رىباكينا (№4) تابىستى ونەر كورسەتىپ جاتىر. ول العاشقى اينالىمدا بوس بولىپ, كەلەسى كەزەڭدە قىتايلىق چجۋ ءليندى (№57) ۇتتى.
كەشە ەلىمىزدىڭ ءبىرىنشى راكەتكاسى يسپانيالىق ەمما ناۆاررومەن (№23) شەبەرلىك سىناستى. ءبىرىنشى سەتتە ەلەنا قارسىلاسىن وڭاي ەڭسەرگەنىمەن, ەكىنشىسىندە تاي-برەيكتە ەسە جىبەردى. دەسەك تە, شەشۋشى كەزەڭدە قارقىنىن كۇرت كۇشەيتكەن وتانداسىمىز بۇل باسەكەنى ءوز پايداسىنا شەشتى – 6:1, 6:7, 6:4. شيرەك فينالدا رىباكينا كانادالىق لەيلا فەرناندەسپەن (№38) كەزدەسەدى. مانامادا ۇيىمداستىرىلعان تۋرنيردە ميحايل كۋكۋشكين دە (231) ءدال مەجەگە جەتتى. 1/8 فينالدا ول شۆەيتساريالىق الەكساندر ريچاردتان (№181) باسىم ءتۇستى – 6:4, 6:1.
ال الەكساندر بۋبليك (№23) روتتەردامداعى ATP-500 جارىسىنىڭ ەكىنشى كەزەڭىنەن اسا المادى. وتانداسىمىز كەزىندە الەمدەگى ۇزدىك ءۇش تەننيسشىنىڭ قاتارىنا ەنگەن, قازىرگى كەزدە 309-ساتىعا تۇراقتاعان كانادانىڭ وكىلى ميلوش راونيچتەن ويدا-جوقتا ۇتىلدى – 4:6, 4:6.