شەتەلدە ءبىلىم الىپ جاتقان 10-سىنىپ وقۋشىسى ادەلينا مۇحامەتجانوۆا تاياۋدا اقش-تاعى حالىقارالىق ۆوكاليستەر بايقاۋىندا لاتيف ءحاميديدىڭ «بۇلبۇل» رومانسىن ورىنداپ, ءبىرىنشى جۇلدەنى يەلەندى.
وسىلايشا, 16 جاستاعى قازاق قىزى امەريكالىق تىڭداۋشىلارىنىڭ جۇرەگىن جاۋلادى. ادەلينا 2022 جىلى اقش-تاعى ميننەسوتا شتاتىنداعى مەكتەپكە قابىلدانعاننان كەيىن, وسى ەلدەگى 9 ۆوكالدىق كونكۋرسقا قاتىسسا, ونىڭ كوپشىلىگىندە جەڭىسكە جەتكەن.
وتكەن دەمالىس كۇندەرى اقتىق سىنعا شىققانداردى انىقتاعان «Radda Rise International Piano and Vocal Competition» حالىقارالىق بايقاۋى ونىڭ مۋزىكالىق تابىسىن ءبىراۋىزدان ماقۇلدادى.
قازىلار القاسىنىڭ مۇشەسى, باريتون داۋىستىڭ يەسى, بەدەلدى Saint Thomas Choir School ۆوكالدىق وقىتۋشىسى, Manhattan School of Music Precollege ۆوكال فاكۋلتەتىنىڭ مۇشەسى دجۋزەپپە سپولەتيني: «ادەلينا – ۆيرتۋوزدى ورىنداۋشى, ونىڭ تەحنيكالىق جاعىنان وتە كۇردەلى كومپوزيتسيانى تاڭداپ, ارقايسىمىزعا ەستەن كەتپەستەي اسەر سىيلادى. مەن بۇل ءاننىڭ نە تۋرالى ەكەنىن تۇسىنبەيمىن. بىراق ءاربىر نوتانى سەزىنۋگە جەتەلەيدى. «بۇلبۇل» تاعى دا ورىندالۋعا ءتيىس!», دەدى.
ال ادەلينانىڭ ءوزى: «بايقاۋعا مەن 3 كومپوزيتسيا ۇسىندىم. قازاقتىڭ اكادەميالىق كلاسسيكاسىنا ءىلتيپات ءبىلدىرىلىپ, وسىنداي جىلى لەبىزدەر ەستىگەنىمە وتە قۋانىشتىمىن. وعان قوسا مەنىڭ باسەكەلەستەرىم وتە مىقتى بولدى. ءۇشىنشى ورىن امەريكالىق ونەر جانە مۋزىكا سالاسىنداعى ەڭ ءىرى جوعارى وقۋ ورىندارىنىڭ ءبىرى The Julliard School ستۋدەنتىنە بەرىلگەنىن بىلەمىن. ارينە, وسىنداي جەڭىس بۇدان دا كوپ ەڭبەكتەنۋگە قۇلشىندىرادى», دەيدى.
سونىمەن ادەلينا مۇحامەتجانوۆا 7 جىلدان بەرى اكادەميالىق ۆوكال بويىنشا ءبىلىم الىپ كەلەدى, ونىڭ ۇستازى – قۇرمانعازى اتىنداعى قازاق ۇلتتىق كونسەرۆاتورياسىنىڭ «ۆوكال ونەرى» كافەدراسىنىڭ دوتسەنتى گۇلنار نۇرعاليەۆا.
ورايى كەلىپ تۇرعاندا ادەلينا 2020 جىلى قازاقستانداعى ەڭ جاس ۇمىتكەر رەتىندە شىعارماشىلىق جەتىستىكتەرى ءۇشىن «جىل تاڭداۋى» سىيلىعىمەن ماراپاتتالعانىن, 2019 جىلدىڭ جەلتوقسانىندا جەڭىمپاز رەتىندە كارنەگي حولدا ونەر كورسەتتى. ول بۇل كونتسەرتكە American Protege بايقاۋىنىڭ جەڭىمپازى رەتىندە شاقىرىلدى. 2018 جىلى يتاليادا Festival & Contest قاۋىمداستىعىنىڭ پرەزيدەنتى كريستيان كاروچەتيدىڭ ارنايى جۇلدەسىنە يە بولعان.
سونداي-اق جاس ونەرپاز – اتاقتى حالىقارالىق Sanremojunior بايقاۋىنىڭ جۇلدەگەرى (سان-رەمو, يتاليا), ورىس اندەرى حالىقارالىق فەستيۆال-بايقاۋىنىڭ ءفيناليسى (لوندون, ۇلىبريتانيا), زارينا التىنباەۆانىڭ «Prima Nota Fest» رەسپۋبليكالىق بايقاۋىنىڭ, ەلەنا وبرازتسوۆا بايقاۋلارىنىڭ جەڭىمپازى, Central Asia Got Talent شوۋىنىڭ قاتىسۋشىسى (قازاقتان, 2022).
الماتى