سەنات توراعاسى ماۋلەن اشىمباەۆ پالاتا وتىرىسىندا نارىققا جەكە كومپانيالاردى تارتۋ قاجەتتىگى تۋرالى ويىن ايتتى. مۇنداي ۇسىنىس سەناتورلاردىڭ «قازاقستان تەمىر جولى» اق قىزمەتى تۋرالى دەپۋتاتتىق ساۋالىنا كولىك ءمينيسترى مارات قاراباەۆتىڭ بەرگەن جاۋابىنا بايلانىستى ايتىلدى, دەپ حابارلايدى Egemen.kz.
ماۋلەن اشىمباەۆ قازىرگى تاڭدا جۇمىس كولەمى مەن جۇكتەمە ارتىپ وتىرعانىن اتاپ ءوتتى. سوندىقتان قتج-نىڭ بۇگىنگى جۇمىس كولەمىنىڭ ءوزى جەتكىلىكسىز ەكەنى بايقالۋدا. وسىعان بايلانىستى بۇل ىسكە ءۇشىنشى تاراپتى – جەكە كومپانيالاردى تارتۋ قاجەتتىلىگى تۋىنداپ وتىر. ماگيسترالدىق تەمىر جول جەلىلەرىن جاڭعىرتۋ جانە سالانىڭ باسقا دا وزەكتى ماسەلەلەرىن شەشۋ ءۇشىن ينۆەستيتسيا سالۋ قاجەت.
«قازىر «قازاقستان تەمىر جولى» كومپانياسىنداعى تۇيتكىلدەرگە قاراپ, ينۆەستيتسيا سالۋدى جالعاستىرۋ كەرەك ەكەنىن كورىپ وتىرمىز. ۆاگوندار مەن لوكوموتيۆتەردى ساتىپ الۋعا, ماگيسترالدىق تەمىرجول جەلىلەرىن جاڭعىرتۋعا ينۆەستيتسيا قاجەت. كەي جەردە تاسىمالداۋ كولەمى كوبەيىپ, قتج ۇلگەرمەي قالىپ جاتىر. ارينە, كومپانيا اۋقىمدى جۇمىس اتقارۋدا. لوكوموتيۆتەر ساتىپ الىنىپ, ۆاگوندار جاڭارتىلدى. الايدا, سونىڭ ءوزى جەتكىلىكسىز بولىپ وتىر. ياعني, ەگەر رەسۋرس جەتپەسە, كومپانيا ءبارىن جاڭارتىپ ۇلگەرمەسە, وندا قوسىمشا كۇش تارتۋ كەرەك دەگەن ءسوز. نەگىزگى ءمان دە وسى. قوسىمشا كۇش دەگەن – جەكە سەكتور, جەكە كومپانيالار. بۇل تۋرالى نە ايتاسىزدار؟ ازىرگە كورىپ-ەستىپ وتىرعانىمىزداي, ءبارى مەملەكەتتىك بولادى. ءتىپتى جاڭا ەكى كومپانياعا دا مەملەكەت قاتىسپاق. سوندىقتان سالاعا جەكە كومپانيالاردى تارتۋ جونىندەگى ستراتەگيا قانداي؟», دەدى ماۋلەن اشىمباەۆ كولىك ءمينيسترى مارات قاراباەۆتىڭ جاۋابىن تىڭداي كەلىپ.
سەنات توراعاسى ماگيسترالدىق تەمىرجول جەلىلەرى سالاسىن رەفورمالاۋ بويىنشا ەكى ساتىلى تاسىلگە نازار اۋدارىپ, ول سالانى جاڭعىرتۋ قارقىنىن كەشەۋىلدەتۋگە اكەلۋى مۇمكىن ەكەنىن ايتتى.
مينيستر ءوز كەزەگىندە رەفورمالاۋدىڭ ەكى ساتىلى ءتاسىلى وزگەرىستەر قارقىنىن تالدايتىن تەستىلەۋدىڭ ءبىر ءتۇرى ەكەنىن اتاپ ءوتتى. مارات قاراباەۆ جەكە كومپانيالاردى تارتۋعا قاتىستى پالاتا توراعاسىنىڭ ۇسىنىسىنا قولداۋ ءبىلدىرىپ, وسىنداي ءوزارا ءىس-قيمىل كوزدەلىپ وتىرعانىن ناقتىلادى.
پالاتا وتىرىسىندا كولىك ءمينيسترى مارات قاراباەۆتىڭ «قازاقستان تەمىر جولى» ۇلتتىق كومپانياسى» اق قىزمەتى تۋرالى سەناتورلاردىڭ دەپۋتاتتىق ساۋالىنا اۋىزشا جاۋابى تىڭدالدى. وندا ەكسپورت تاسىمالىنىڭ بۇزىلۋى مەن باسەكەلەستىكتە تەڭسىزدىك جاعدايىنىڭ تۋىنداۋى دەپۋتاتتاردىڭ نارازىلىعىن تۋدىرعان ەدى.
وتىرىسقا باسەكەلەستىكتى قورعاۋ جانە دامىتۋ اگەنتتىگىنىڭ, ۇلتتىق ەكونوميكا مينيسترلىگىنىڭ جانە «قازاقستان تەمىر جولى» ۇلتتىق كومپانياسى» اق باسشىلارى دا قاتىستى.