بۇگىن كەڭەس اسكەرىنىڭ اۋعان جەرىنەن شىعارىلعانىنا 35 جىل تولۋىنا وراي, وبلىس ورتالىعى – قوناەۆ قالاسىندا سالتاناتتى ءىس-شارا ءوتتى, دەپ حابارلايدى Egemen.kz.
جەڭىس ساياباعىنداعى ەڭسەلى ەسكەرتكىشكە جينالعان اۋعان سوعىسىنىڭ ارداگەرلەرى مەن اسكەريلەر, اقساقالدار مەن قالا تۇرعىندارى القىزىل گۇل شوقتارىن قويىپ, قان مايداندا ەرلىك كورسەتكەن, سوعىستىڭ زاردابىن تاتىپ, ومىردەن وتكەن جاۋىنگەرلەردىڭ رۋحىنا تاعزىم ەتتى.
بۇدان سوڭ مادەنيەت ۇيىندە جالعاسىن تاپقان جيىنعا قوناەۆ قالاسى اكىمىنىڭ ورىنباسارى ساۋلە نۇرسولتانوۆا قاتىسىپ, لەبىزىن ءبىلدىردى.
«9 جىل 10 ايعا سوزىلعان اۋعان سوعىسى تۋرالى دەرەكتەرگە سۇيەنسەك, كەڭەس وداعىنان 600 مىڭنان استام ادام اتتانىپتى. وسىدان 35 جىل بۇرىن اۋعان سوعىسىنان 21371 ارداگەر امان-ەسەن وتانىنا ورالعان ەكەن. ولاردىڭ قاتارىنداعى 91 ارداگەر بۇگىندە قوناەۆ قالاسىنىڭ تۇرعىندارى», دەگەن قالا اكىمىنىڭ ورىنباسارى بۇل ءىس-شارانىڭ وسكەلەڭ ۇرپاققا بەرەر تاربيەلىك ءمانى زور ەكەندىگىن اتاي كەلە, قايسارلىق پەن ەرلىكتىڭ ۇلگىسىن كورسەتكەن اۋعان سوعىسى ارداگەرلەرىنە العىسىن ءبىلدىردى.
سالتاناتتى جيىن بارىسىندا اۋعان سوعىسىنىڭ ارداگەرى مارات كالگۋلوۆقا قوناەۆ قالاسىنىڭ قۇرمەتتى ازاماتى اتاعى بەرىلدى.
سونداي-اق ارداگەرلەرگە 35 جىلدىق مەرەكەلىك مەدالى مەن العىس حاتتار تابىس ەتىلدى.
باسقوسۋدىڭ سوڭى پاتريوتتىق اندەر ورىندالعان كونتسەرتتىك باعدارلاماعا ۇلاستى.